Para velosportshylar Azııa chempıonatynda bes medal jeńip aldy

Para velosporttan Almatyda ótken XI Azııa chempıonatynda Qazaqstan quramasy eki altyn, eki kúmis jáne bir qola medaldi jeńip aldy.

Kórý qabileti zaqymdanǵan sportshylar arasynda ótken tandemdik dısıplınasynda Seıitjan Kenjegúl (stoker) men Anton Lavrentev (pılot) márege 20:27.9 ýaqytta jetip, chempıon atandy.

Ekinshi oryndy ıelengen Aleksandr Malygın (stoker) men Devıd Kýsakov (pılot) márege 21:13.5 mınýtta kese, qola medal Tálim Dastan (stoker) men Maksat Nurpeısovke (pılot) buıyrdy. Olar jarysty 22:37.7 ýaqytta aıaqtady.

Áıelder arasynda chempıonattyń tandemdik dısıplınasynda Juldyz Qaınarova (stoker) men Ýlıana Chýgaı (pılot) 22:03.4 ýaqytqa márege kelip,  altyn júldeni jeńip aldy. Kúmis medaldi Ásel Kalıeva (stoker) men Aıgerim Nurǵalı (pılot) ıelendi. Olar 28:08.8 ýaqytta márege jetti.

Men velosportpen 15 jyldan astam ýaqyt aınalysyp kelemin. Alaıda, tandemdik dısıplına jeke jarystan qıynyraq. Sebebi, seriktes úshin jaýapkershiliktiń júgi aýyr. Tehnıkalyq qıyndyqtarǵa qaramastan, biz, árıne, jeńiske jetýdi kózdedik. Eń bastysy, osy jarysta Azııanyń chempıony atandyq, – dedi Anton Lavrentev.

Qazaqstannyń para velosporttan ulttyq quramanyń bas jattyqtyrýshysy Nıkolaı Zaıevtiń aıtýynsha, chempıonat aldynda sportshylar úsh oqý-jattyǵý jıynynda boldy. Onyń ekeýi Almaty qalasynda jáne bireýi Tekeli aýdanynda ótkizildi.

Sportshylar trassany muqııat zerttep, sheberliktiń arttyrýǵa talaı jumys atqardy. Osynyń arqasynda elimizdiń sportshylary bes medal jeńip aldy, – dedi  ol.

Para velosporttan Azııa chempıonaty «Almaty Arena» alańynda boldy. Oǵan Saýd Arabııasy, Tájikstan, BAÁ, О́zbekstan, Taıland, Oman, Palestına, Úndistan men elimizdiń  kórý qabileti  jáne tirek-qımyl apparaty zaqymdalǵan para velosportshylary qatysty.

Dodada barlyǵy 69 sportshy kúsh synasty (56 er jáne 13 áıel).

Quralaı ÁShIMHANOVA,

ASTANA