بىلتىر «وقجەتپەس» شيپاجايدارىندا 45 مىڭعا جۋىق ادام ەم العان

بىلتىر پرەزيدەنت ءىس باسقارماسى مەديتسينالىق ورتالىعىنا قاراستى شيپاجايلاردا 45 مىڭعا جۋىق ادام ەم العان. ونىڭ ىشىندە «وقجەتپەس» ەمدەۋ-ساۋىقتىرۋ كەشەنىندە 27 554 ادام ەمدەلسە، ونىڭ 1 936 شەتەل ازاماتتارى.

«Almaty resort» الماتى قالاسىنداعى شيپاجاي فيليالىندا 261 شەتەل ازاماتىن قوسقاندا 10 992 ادام ەم العان. ەسسەنتۋكي كۋرورتتىق قالاسىندا ورنالاسقان «قازاقستان» شيپاجايىنا 4 881 ادام بارسا، سونىڭ ىشىندە 1 489 شەتەل ازاماتى ەمدەلگەن.

«وقجەتپەس» برەندىنە بۇگىندە ءۇش ءىرى شيپاجاي كىرەدى. ولار: بۋرابايداعى «وقجەتپەس»، الماتى قالاسىندا ورنالاسقان «Almaty resort» جانە ەسسەنتۋكي كۋرورتتىق-ايماعىنداعى «قازاقستان» شيپاجايى. ءار شيپاجايدا 13 ساۋىقتىرۋ جانە 10-نان استام وڭالتۋ باعدارلاماسى مەن 112 ەمدىك شاراسى بار.

ەلىمىزدەگى مەديتسينالىق ءتۋريزمدى دامىتۋ ماقساتىندا ءار شيپاجاي بىرەگەي ەمدەلۋ باعدارلامالارىن ۇسىنادى. ءۇش شيپاجايعا شەتەل ازاماتتار تاراپىنان قىزىعۋشىلىق ارتىپ كەلەدى. ونىڭ ىشىندە كوش باستاپ تۇرعان رەسەي مەن ازەربايجان مەملەكەتى.

ەڭ كوپ سۇرانىسقا يە ەم شارالار تىزىمىندە سۋمەن ەمدەۋ (گيدروتەراپيا)، گالوتەراپيا، پانتوتەراپيا جانە نافتالان شاراسى بار.

سالتانات قاجىكەن،

الماتى