كوشپەندىلەر ويىندارى: قازاق كۇرەسى ەلىمىزدىڭ جۇلدەلەرىن ەسەلەدى

وسى كۇندەرى قىرعىز رەسپۋبليكاسىنىڭ  چولپون-اتا قالاسىندا ءوتىپ جاتقان III دۇنيەجۇزىلىك كوشپەندىلەر ويىندارى الدىندا دۇنيەجۇزىلىك قازاق كۇرەسى فەدەراتسياسى تورەشىلەرگە سەمينار ۇيىمداستىرىپ، جارىستى وتكىزەتىن  جاۋاپتى توپ مۇشەلەرىن سايلاعان ەدى.  جاۋاپتى سىن الدىنداعى سەمينار كەڭەسكە قاتىسقان  فەدەراتسيانىڭ ءبىرىنشى ۆيتسە-پرەزيدەنتى سەرىك ادام ۇلى تۇكەەۆ پەن UWW-ءدىڭ (بىرىككەن كۇرەس قاۋىمداستىعىنىڭ) تەحنيكالىق ديرەكتورى ونۋر شيمشەك مىرزالار، ايىر قالپاقتى اعايىنداردىڭ  ەلىندە وتكەلى وتىرعان III دۇنيەجۇزىلىك كوشپەندىلەر ويىندارىنىڭ باعدارلاماسىنا ەنگەن قازاق كۇرەسىنىڭ ەلىمىز ءۇشىن الار ورنى ەرەكشە ەكەندىگىنە  توقتالىپ، ءادىل تورەلىك ەتۋگە اسا نازار اۋدارعان بولاتىن.

سونداي-اق، سەميناردى جۇرگىزگەن ازيا قۇرلىعى قازاق كۇرەسى فەدەراتسياسىنىڭ  باس حاتشىسى رافاەل حابيروۆ  ءتول كۇرەسىمىزدەن تەحنيكالىق ءىس-شارا قويىلىمدارى، ونىڭ ءادىس-تاسىلدەرى، قازاق كۇرەسىنىڭ كيىمى مەن تاريحى تۋرالى بەينەبايان كورسەتىپ، ۇلتتىق كۇرەسىمىزدىڭ ەرەجەلەرىنىڭ وزەكتى ماسەلەلەرىن تالقىلاپ، پىكىر الىسقان ەدى. سول سەميناردا  جارىستىڭ باس تورەشىسى  بولىپ UWW-ءدىڭ (بىرىككەن كۇرەس قاۋىمداستىعىنىڭ)  باس ۇيلەستىرۋشىسى  نيدەرلاندىدان كەلگەن حالىقارالىق دەڭگەيدەگى تورەشى ەدمار ابدۋللاەۆ تاعايىندالسا، باس حاتشى قىزمەتىنە بەلارۋس مەملەكەتىنىڭ وكىلى الەكساندر شاراەۆ بەكىتىلدى.  جارىستا رەسەي، وزبەكستان، قىرعىز رەسپۋبليكاسى، گەرمانيا، نيدەرلاندى، بەلارۋس ەلدەرىنىڭ حالىقارالىق دارەجەدەگى تورەشىلەرى قىزمەت ەتەتىن بولىپ شەشىلدى. تورەشىلەر اراسىندا لوندوندا وتكەن XXX جازعى وليمپيدا ويىندارىنىڭ ەركىن كۇرەستەن ايەلدەر اراسىنداعى قولا جۇلدەگەرى، حالىقارالىق دەڭگەيدەگى تورەشى يۋليا رادكەۆيچ دا بار. مۇنىڭ ءبارىن ءتىزىپ ايتىپ وتىرعانىمىز، قانداي جارىس بولماسىن بىلىكتى ماماندار قۇراماسى جاساقتالىنىپ الىنعاندا عانا جارىستىڭ جاقسى وتەتىنى بەلگىلى. اسقان جاۋاپكەرشلىكپەن بىلەك تۇرە كىرىسكەن جۇمىس اركەزدە جەمىسىن بەرەدى.

وسى كۇنگە دەيىن دۇنيەجۇزىلىك قازاق كۇرەسى فەدەراتسياسى مەن  (UWW) بىرىككەن كۇرەس قاۋىمداستىعى بىرىگىپ ۇيىمداستىرعان ءاربىر الامان جەكپە-جەكتەر ۇلتتىق كۇرەسىمىزدى بيىك بەلەستەرگە شىعارىپ كەلەدى.  ارينە، قازاق كۇرەسىنىڭ الار اسۋلارى ءالى الدا دەپ بىلەمىز، دەگەنىمەن دە بۇگىنگى تاڭعا دەيىن اتا كۇرەسىمىزدەن 7 الەم، 11ازيا، 3 الەم كۋبوكتارى مەن گران –پري جارىستارىنىڭ وتكىزىلىپ كەلۋىنە يسلام الماقان ۇلى ابىشەۆ پەن سەرىك ادامبولسىن ۇلى تۇكەەۆ سەكىلدى ۇلتتىق كۇرەسىمىزدىڭ جاناشىرلارى اتسالىسىپ جاتقانىن ۇمىتپاي، ەسكە الىپ وتىرعانىمىز ابزال.  يا، ەل بولعان سوڭ ءارتۇرلى پىكىرلەر بولادى. قازاق كۇرەسى ازيا ويىندارىنا نەگە كىرمەي ءجۇر دەگەن سىناي ايتقان پىكىرلەر دە كەزدەسىپ جاتادى. ال، سول جوعارىدا ايتىپ وتكەن قازاق كۇرەسىنە باسىنان باقايشىعىنا دەيىن جانى اشيتىن جاناشىر قوس ازماتتىڭ تىنىمسىز تاباندى جۇمىستارىنىڭ ناتيجەسىندە ۇلتتىق كۇرەسىمىز اشعابادتا جابىق كەشەندە وتكەن  ازيا ويىندارىنىڭ  باعدارلاماسىنا كىرىپ، ءۇش سالماقتا ءۇش بالۋانىمىز ەكى التىن ءبىر قولا جۇلدەلى بولىپ قايتقانىمىزدى قالاي عانا ۇمىتامىز. «باردى بار، جوقتى جوق»، دەپ ايتۋعا ارينە، مىندەتتىمىز. قازاق كۇرەسى ازيا جابىق كەشەندى ازيا ويىندارىنىڭ باعدارلاماسىنا ەنگەنى تۋرالى سۇيىنشىلەپ تە ايتقان بولاتىنبىز. دۇنيەجۇزىلىك قازاق كۇرەسى فەدەراتسياسىنىڭ كوپ جىلدار بويى قاجىرلى جۇمىستارى ەش ەلەۋسىز قالماسى ءبىر انىق. ال، وسى III دۇنيەجۇزىلىك كوشپەندىلەر ويىندارىندا ءتول كۇرەسىمىزدىڭ تولاعاي تابىستى قادامى جىلدار بويى جۇيەلى جۇرگىزىپ كەلە جاتقان جۇمىستىڭ تاعى ءبىر جەمىسى دەپ بىلەمىز.

حوش، سونىمەن ءۇش  سالماق 70 كگ، 90 كگ، + 90كگ دارەجەسى بويىنشا  چولپان-اتادا   وتكەن قازاق كۇرەسىنەن بايراقتى سىندارعا كەلسەك. ءۇشىنشى دۇنيەجۇزىلىك كوشپەندىلەر ويىندارىنا 82 مەملەكەتتەن سپورتشىلار شاقىرىلسا، قازاق كۇرەسىنە الەمنىڭ  22 ەلىنەن 50 بالۋان جەڭىس ءۇشىن   بوزكىلەمگە شىقتى. قىركۇيەكتىڭ 4 كۇنى وتكەن الامان جەكپە-جەكتەردىڭ قورىتىندىسى بويىنشا فينالدا توپجارىپ، جەڭىس تۇعىرىنا كوتەرىلگەندەردىڭ ەسىمدەرى دە انىق بولعان ەدى.

سونىمەن 70 كگ سالماقتا باس جۇلدەنى قىرعىز بالۋانى مەرلان ەراليەۆتىڭ جاۋىرىن جەرگە اۋناتقان  ابىلقايىر ماۋلەنين جەڭىپ الدى. ال، وسى سالماقتا قول جۇلدەلەر تۇرىكمەنستاندىق مۋحاممەد گۋربانوۆ  پەن رەسەيلىك ۆلاديميرجدانوۆتارعا تاپسىرىلدى. 90 كگ سالماقتا جەرلەسىمىز ەرسۇلتان مۇزاپپاروۆ وزبەك بالۋانى سارۆار يكروموۆتى جەڭىپ، قازاقستان قۇراماسىنىڭ قورجىنىنا  قازاق كۇرەسىنەن ەكىنشى التىن مەدالدى جەڭىپ اپەردى. بۇل سالماقتا ءۇشىنشى ورىن ەستون بالۋانى الەكساندر مارمەليۋك  مەن رەسەيلىك اندرەي گۋساروۆتەرگە بۇيىردى. اتان جىلىكتى 90 كيلودان اسا سالماقتا وتكەن فينالدا رەسەيلىك  دميتري باليانوۆتى الىپ ۇرعان موڭعول بالۋانى سەرىك بەردىمۇراتوۆ التىن جۇلدەنى جەڭىپ الىپ كەتتى. قولا مەدالدار قازاقستاندىق بالۋان نۇرداۋلەت جارلىعاپوۆ پەن رەسەيلىك رومان بوبيكوۆتىڭ مويىندارىنا تاعىلدى.

وسىلايشا، قىرعىز ەلىندە ءوتىپ جاتقان  III دۇنيەجۇزىلىك كوشپەندىلەر ويىندارىندا قازاق كۇرەسىنىڭ بالۋاندارى 2 التىن 1 قولا مەدالدى الىپ، قازاقستان قۇرامىسىنىڭ جۇلدە جيىنتىعىنداعى  جاعدايىن جاقسارتۋعا ۇلكەن ۇلەسىن قوستى. سونىمەن قازاقستان قۇراماسى قازاق كۇرەسىنىڭ بالۋاندارى جەڭىپ اپەرگەن التىن، قولا مەدالداردىڭ ناتيجەسىندە قىرعىزستان مەن رەسەيدەن كەيىن ۇزدىك ۇشتىكتە كەلەدى.

اقىن ورداباي ۇلى،

الماتى