SportPress.kz قازاقستان سپورت جاڭالىقتارى
بۇگىن الماتى قالاسىندا گەرمانياداعى كەڭەس اسكەرى توبىنىڭ (گكات — ۆكشات) قۇرىلعانىنا 80 جىل تولۋىنا ارنالعان سالتاناتتى ءىس-شارا ءوتتى، دەپ حابارلادى adyrna.kz.
مەرەيتويلىق ءىس-شارانى گكات-ۆكشات ارداگەرلەرى رەسپۋبليكالىق قوعامدىق بىرلەستىگىنىڭ الماتى قالالىق فيليالى ۇيىمداستىردى. ول تاڭعى ساعات 9:00-دە 28 گۆاردياشى-پانفيلوۆشىلار اتىنداعى ساياباقتاعى داڭق مەموريالى جانىندا باستالدى.
ءىس-شاراعا قازاقستان رەسپۋبليكاسى باس شتابىنىڭ ۇيىمداستىرۋ-جۇمىلدىرۋ جۇمىستارى دەپارتامەنتىنىڭ اعا وفيتسەرى، پولكوۆنيك داۋرەنبەك شەگەباەۆ، الماتى قالاسى گسۆگ-گۆۆد ارداگەرلەرى قوعامىنىڭ فيليال باسشىسى قۇرمانعازى تاستانبەك، سونداي-اق قازاقستان رەسپۋبليكاسىنىڭ مەملەكەت جانە اسكەري قايراتكەرى ماحمۇت وتەگەن ۇلى قاتىستى.
سالتاناتتى جيىندا ارداگەرلەر مەن قوناقتار ماڭگىلىك الاۋعا گۇل شوقتارىن قويىپ، قۇرمەت كورسەتتى. ءىس-شارادا ساربازداردىڭ ساپتىق شەرۋى مەن اسكەري داستۇرلەرگە ساي راسىمدەر بولدى. سونىمەن قاتار، قاتىسۋشىلار ارميا ۇيىندەگى اسكەري مۋزەيدى جانە اشىق اسپان استىنداعى اسكەري تەحنيكا كورمەسىن تاماشالادى، — دەلىنگەن حابارلامادا.
مەرەيتوي قۇرمەتىنە ارنايى قوناقتار مەن ارداگەرلەرگە گەرمانياداعى كەڭەس اسكەرى توبىنىڭ قۇرىلعانىنا 80 جىل تولۋىنا ارنالعان مەرەكەلىك توسبەلگىلەر مەن العىس حاتتار تابىس ەتىلدى.
بۇل ماڭىزدى ءىس-شارا – اسكەري تاريحقا، ارداگەرلەردىڭ ەرەن ەڭبەگىنە قۇرمەت كورسەتىپ، جاس ۇرپاققا پاتريوتتىق تاربيە بەرۋدىڭ جارقىن ۇلگىسى بولدى.
