Almatyda Keńes áskeriniń Germanııadaǵy tobynyń qurylǵanyna 80 jyl tolǵany ataldy

Búgin Almaty qalasynda Germanııadaǵy Keńes áskeri tobynyń (GKÁT — VKShÁT) qurylǵanyna 80 jyl tolýyna arnalǵan saltanatty is-shara ótti, dep habarlady adyrna.kz.

Mereıtoılyq is-sharany GKÁT-VKShÁT ardagerleri respýblıkalyq qoǵamdyq birlestiginiń Almaty qalalyq fılıaly uıymdastyrdy. Ol tańǵy saǵat 9:00-de 28 gvardııashy-panfılovshylar atyndaǵy saıabaqtaǵy Dańq memorıaly janynda bastaldy.

Is-sharaǵa Qazaqstan Respýblıkasy Bas shtabynyń Uıymdastyrý-jumyldyrý jumystary departamentiniń aǵa ofıeri, polkovnık Dáýrenbek Shegebaev, Almaty qalasy GSVG-GVVD ardagerleri qoǵamynyń fılıal basshysy Qurmanǵazy Tastanbek, sondaı-aq Qazaqstan Respýblıkasynyń memleket jáne áskerı qaıratkeri Mahmut О́tegenuly qatysty.

Saltanatty jıynda ardagerler men qonaqtar Máńgilik alaýǵa gúl shoqtaryn qoıyp, qurmet kórsetti. Is-sharada sarbazdardyń saptyq sherýi men áskerı dástúrlerge saı rásimder boldy. Sonymen qatar, qatysýshylar Armııa úıindegi Áskerı mýzeıdi jáne ashyq aspan astyndaǵy áskerı tehnıka kórmesin tamashalady, — delingen habarlamada.

Mereıtoı qurmetine arnaıy qonaqtar men ardagerlerge Germanııadaǵy Keńes áskeri tobynyń qurylǵanyna 80 jyl tolýyna arnalǵan merekelik tósbelgiler men Alǵys hattar tabys etildi.

Bul mańyzdy is-shara – áskerı tarıhqa, ardagerlerdiń eren eńbegine qurmet kórsetip, jas urpaqqa patrıottyq tárbıe berýdiń jarqyn úlgisi boldy.