وليمپيادا چەمپيونى بەكارىس سادۋاقاس تۋرالى ءبىر ۇزىك سىر

بيىل ارگەنتينانىڭ بۋەنوس-ايرەس قالاسىندا جاسوسپىرىمدەر اراسىنداعى جازعى ويمپيادا ويىندارى وتكىزىلدى. ول الدىمەن 2010 جىلى سينگاپۋردە، سوسىن 2014 جىلى نانكيندە جالاۋى جەلبىرەپ، ءۇشىنشى مارتە ۇيىمداستىرىلدى. بۇل جارىستا دزيۋدو كۇرەسىنەن التىن جۇلدەنى كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ  وقۋشىسى بەكارىس سادۋاقاس جەڭىپ الىپ، قازاقستاننىڭ اتىن اتويلاپ شىعاردى.

6-18 قازان ارالىعىندا وتكەن الامان سايىسقا 206 مەملەكەتتەن 3998 ساڭلاق سپورتتىڭ 32 تۇرىنەن سىنعا ءتۇستى. جاسوسپىرىمدەردىڭ جازعى وليمپياداسىندا تۇڭعىش رەت ۇلدارمەن قاتار قىزدار دا  تەڭدەي  ساندا ونەر كورسەتۋى جارىستىڭ باستى جاڭالىعىنىڭ ءبىرى بولىپ تاريح قويناۋىنا ەندى. سونىمەن ارگەنتينانانىڭ استاناسى بۋەنوس-ايرەستە  جاسوسپىرىمدەر اراسىندا اياقتالعان  وليمپيادا ويىندارىنىڭ قورىتىندىسى بويىنشا  كوماندالىق ەسەپتە  رەسەي 29 التىن، 18 كۇمىس، 12 قولا مەدالمەن ءبىرىنشى ورىنعا كوتەرىلسە، قىتاي 18 التىن، 9 كۇمىس،  9 قولا مەدالمەن ەكىنشى ورىندى، جاپونيا 15 التىن، 12 كۇمىس، 12 قولا جۇلدەمەن  ءۇشىنشى ورىندى يەلەندى.

قازاقستان سپورتشىلارى 2014 جىلى ەلگە نانكيننەن 8 مەدال اكەلسە، بۋەنوس-ايرەستە  10 جۇلدەنى جەڭىپ الدى. ونىڭ 4 التىن، 4 كۇمىس، 2 قولا مەدالمەن  جاسوسپىرىمدەر وليمپاداسىنىڭ تاريحىندا بولماعان رەكوردتى جاڭارتىپ، ۇلكەن ناتيجەگە جەتتى.

ايتۋلى باسەكەدە ەل نامىسىن قورعايتىن سپورتشىلاردىڭ اراسىندا كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ  دارىندى جاستارى دا جەتەرلىك ەكەنىن قۋانا ايتۋعا بولادى. سپورتتىڭ ءار تۇرىنەن سىن الاڭدارىنا شىعىپ، ەل نامىسىن قورعاعان  جالىندى جاستاردىڭ ىشىندە مەكتەپ-ينتەرناتتا ءدارىس الىپ جاتقان، سونىمەن بىرگە، كيەلى مەكتەپ قابىرعاسىنان  قاناتتارى بەكىگەن تالانتتى جاس تۇلەكتەر دە بارشىلىق ەدى. مىسالى، بايداركا مەن كانوەدا ەسكەك ەسۋدەن ولگا سۋرمينا، جۇزۋدەن اناستاسيا رەزۆانتسەۆا، جاعاجاي ۆولەيبولىنان 11 سىنىپ وقۋشىلارى الينا راچەنكو، ەليزاۆەتا ەروپكينا، ابدۋلماجيد موحامادتەر، دزيۋدودان بەكارىس سادۋاقاس، باسكەتبولدان 11 سىنىپ وقۋشىلارى ۆاسيلي بەلوزەر، نيل فوميچەۆ، انۋار شاكيروۆ پەن سۋعا سەكىرۋدەن ەليزاۆەتا بوروۆالار بار. بۇل اتتارى اتالعان سپورتشىلاردىڭ بارلىعى دەرلىك، ارگەنتينادا وتكەن  جاسوسپىرىمدەر اراسىنداعى وليمپيادادا  ەل نامىسى ءۇشىن ايانباي ونەرلەرىن كورسەتتى. دەگەنمەن دە،  ەڭ باستى سۇيىنشىلەپ ايتار جاڭالىعىمىز قازاقستان قۇرامىسىنىڭ قورجىنىنا دزيۋدو جەكپە-جەكتەرىندەگى سىندا  تۇسكەن التىن مەدالدى كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ  وقۋشىسى بەكارىس سادۋاقاس جەڭىپ الىپ بەردى. بەكارىس 100كگ سالماقتا  دەس بەرمەي، جەڭىستىڭ باس تۇعىرىنا كوتەرىلىپ، ەلىمىزدىڭ ءانۇرانىن ارگەنتينا تورىندە ويناتتى.

دارىندى جاس بالۋان وسىلايشا ءوزى كۇندەلىكتى جاتتىعىپ جۇرگەن ايتۋلى مەكتەپ-ينتەرناتتىڭ عانا ەمەس، بۇكىل قازاق ەلىنىڭ ابرويىن اسقاقتاپ ورالدى. بابالارىمىز «ۇيادا نە كورسەڭ ۇشقاندا سونى ىلەسىڭ»، دەپ جاتادى. بۇل ءسوز بەكارىستاي انادان دارا تۋعان بالاعا ارنالعان شىعار. ويتكەنى، تۋمىسىنان كۇرەسكە  بەيىم جاس وسە كەلە قاناتىنىڭ قاتايۋىنا بىردەن-ءبىر سەبەپكەر بولاتىن وقۋ-جاتتىعۋ ۇياسىن ءدال تاپقان دەپ ايتا الامىز. وقۋدا دا سپورتتا دا الدا جۇرەتىن بەكارىستىڭ كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىندە ءبىلىمى مەن بىرگە دزيۋدو كۇرەسىندەگى اسقار بيىكتەرگە جەتۋىنە ايتۋلى التىن ۇيا مەكتەپ-ينتەرناتىنداعى باپكەرلەرى مەن باسشىلاردىڭ قامقورلىقتارى دا شەكسىز بولعانى  ءسوزسىز. ال، قازاقستان جەرىندە دە بۇل سپورت ءتۇرى دامىپ قانا قويماي، وليمپيادا مەن  باسقا دا جارىستاردا بالۋاندارىمىز جەمىستى ونەر كورسەتىپ، ەلىمىزدىڭ اتىن الەمگە تانىتتى. ايتالىق، اسحات جيتكەەۆ، ەلدوس سمەتوۆ سىندى ساڭىلاقتارىمىز وليمپيادا ويىندارىندا كۇمىس جۇلدەلەردى يەلەنىپ، كوك بايراعىمىزدى كوكتەن جەلبىرەتتى. ال، وسى اتتارى اتالعان قوس دارابوز بالۋانىمىز دا  كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ  تۇلەكتەرى. بۇگىنگى تاڭدا ايتۋلى مەكتەپ-ينتەرنات كوللەدجىنىڭ ديرەكتورى سەيىلحان باقتىعالي ۇلى قاراقوۆ مىرزانىڭ بەلسەندى جۇمىسىنىڭ ناتيجەسىندە  بوي كوتەرگەن ءزاۋلىم دزيۋدو اكادەمياسىندا بىلكتى مامان باپكەرلەردىڭ جاتتىقتىرۋىندا ءجاسوسپىرىم بالۋاندار شەبەرلىكتەرىن  شىڭداۋدا. تاعى  ءبىر ايتا كەتەر قۋانىشتى جاڭالىق، جاسوسپىرىمدەردى جاپونيادان ارنايى كەلگەن تانىمال باپكەر جاتتىقتىرادى. مۇنداي پراكتيكا العاش رەت كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ  تۇلەكتەرىنە قولدانىپ وتىر. بىلگىر ماماننىڭ كەلۋى بالۋاندارعا اسەرىن بەرىپ، جەتىستىكتەرگە جەتۋدە.  بۇل دزيۋدو اكادەمياسى ەلىمىزدەگى دزيۋدو كۇرەسىنە ارنالعان كوشباسشى سپورت سارايىنىڭ ءبىرى بىرەگەيى دەپ ايتۋعا تولىق نەگىز بار. ويتكەنى، تابالدىرىقتان باسىپ كىرگەن ىنتالى جاسقا، دزيۋدو كۇرەسىندە ۇلكەن جەتىستىككە جەتۋ ءۇشىن بارلىق جاعداي جان-جاقتى جاسالعان. «اعاعا قاراپ ءىنى وسەر»، دەمەكشى، اتتارى ايگىلى اعالارىنىڭ ءىزىن باسار جاس بالۋاندار قالايدا وليمپيادا بيىگىن باعىندىرۋدى ماقسات ەتكەن. سوندىقتان دا دزيۋدو كۇرەسىنە ەرەكشە قولداۋ جاساپ،  كوڭىل ءبولىپ وتىرعان كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ الار اسۋى ءالى الدا دەپ بىلەمىز.

ەندەشە، التىن جۇلدەلى  بەكارىس الدا ەرلەر اراسىنداعى الامان جەكپە-جەكتەردە دە ەلىمىزدىڭ نامىسىن ءدال وسىنداي ۇلكەن تابىسپەن قۋانتا بەرەر دەگەن سەنىمدە بولايىق.

كەلەسى وليمپيادا ويىندارى سەنەگالدىڭ استاناسى داكاردا وتەدى. سول جارىستا دا  قازاق سپورتشىلار بۇدان دا جوعارى ساتىعا كوتەرىلۋ ءۇشىن ايانباي تەر توگەتىن بولادى.

اقىن ورداباي ۇلى،

 الماتى