Olımpıada chempıony Bekarys Sádýaqas týraly bir úzik syr

Bıyl Argentınanyń Býenos-Aıres qalasynda jasóspirimder arasyndaǵy Jazǵy Oımpıada oıyndary ótkizildi. Ol aldymen 2010 jyly Sıngapýrde, sosyn 2014 jyly Nankınde jalaýy jelbirep, úshinshi márte uıymdastyryldy. Bul jarysta dzıýdo kúresinen altyn júldeni Karken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat kolledjiniń  oqýshysy Bekarys Sádýaqas jeńip alyp, Qazaqstannyń atyn atoılap shyǵardy.

6-18 qazan aralyǵynda ótken alaman saıysqa 206 memleketten 3998 sańlaq sporttyń 32 túrinen synǵa tústi. Jasóspirimderdiń Jazǵy Olımpıadasynda tuńǵysh ret uldarmen qatar qyzdar da  teńdeı  sanda óner kórsetýi jarystyń basty jańalyǵynyń biri bolyp tarıh qoınaýyna endi. Sonymen Argentınananyń astanasy Býenos-Aıreste  jasóspirimder arasynda aıaqtalǵan  Olımpıada oıyndarynyń qorytyndysy boıynsha  komandalyq esepte  Reseı 29 altyn, 18 kúmis, 12 qola medalmen birinshi orynǵa kóterilse, Qytaı 18 altyn, 9 kúmis,  9 qola medalmen ekinshi oryndy, Japonııa 15 altyn, 12 kúmis, 12 qola júldemen  úshinshi oryndy ıelendi.

Qazaqstan sportshylary 2014 jyly elge Nankınnen 8 medal ákelse, Býenos-Aıreste  10 júldeni jeńip aldy. Onyń 4 altyn, 4 kúmis, 2 qola medalmen  jasóspirimder Olımpadasynyń tarıhynda bolmaǵan rekordty jańartyp, úlken nátıjege jetti.

Aıtýly básekede el namysyn qorǵaıtyn sportshylardyń arasynda Karken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat kolledjiniń  daryndy jastary da jeterlik ekenin qýana aıtýǵa bolady. Sporttyń ár túrinen syn alańdaryna shyǵyp, el namysyn qorǵaǵan  jalyndy jastardyń ishinde mektep-ınternatta dáris alyp jatqan, sonymen birge, kıeli mektep qabyrǵasynan  qanattary bekigen talantty jas túlekter de barshylyq edi. Mysaly, baıdarka men kanoeda eskek esýden Olga Sýrmına, júzýden Anastasııa Rezvaneva, jaǵajaı voleıbolynan 11 synyp oqýshylary Alına Rachenko, Elızaveta Eropkına, Abdýlmajıd Mohamadter, dzıýdodan Bekarys Sádýaqas, basketboldan 11 synyp oqýshylary Vasılıı Belozer, Nıl Fomıchev, Anýar Shakırov pen sýǵa sekirýden Elızaveta Borovalar bar. Bul attary atalǵan sportshylardyń barlyǵy derlik, Argentınada ótken  jasóspirimder arasyndaǵy Olımpıadada  el namysy úshin aıanbaı ónerlerin kórsetti. Degenmen de,  eń basty súıinshilep aıtar jańalyǵymyz Qazaqstan quramysynyń qorjynyna dzıýdo jekpe-jekterindegi synda  túsken altyn medaldi Karken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat kolledjiniń  oqýshysy Bekarys Sádýaqas jeńip alyp berdi. Bekarys 100kg salmaqta  des bermeı, jeńistiń bas tuǵyryna kóterilip, elimizdiń ánuranyn Argentına tórinde oınatty.

Daryndy jas balýan osylaısha ózi kúndelikti jattyǵyp júrgen aıtýly mektep-ınternattyń ǵana emes, búkil qazaq eliniń abroıyn asqaqtap oraldy. Babalarymyz «uıada ne kórseń ushqanda sony ilesiń», dep jatady. Bul sóz Bekarystaı anadan dara týǵan balaǵa arnalǵan shyǵar. О́ıtkeni, týmysynan kúreske  beıim jas óse kele qanatynyń qataıýyna birden-bir sebepker bolatyn oqý-jattyǵý uıasyn dál tapqan dep aıta alamyz. Oqýda da sportta da alda júretin Bekarystyń Karken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat kolledjinde bilimi men birge dzıýdo kúresindegi asqar bıikterge jetýine aıtýly altyn uıa mektep-ınternatyndaǵy bapkerleri men basshylardyń qamqorlyqtary da sheksiz bolǵany  sózsiz. Al, Qazaqstan jerinde de bul sport túri damyp qana qoımaı, Olımpıada men  basqa da jarystarda balýandarymyz jemisti óner kórsetip, elimizdiń atyn álemge tanytty. Aıtalyq, Ashat Jıtkeev, Eldos Smetov syndy sańylaqtarymyz Olımpıada oıyndarynda kúmis júldelerdi ıelenip, kók baıraǵymyzdy kókten jelbiretti. Al, osy attary atalǵan qos daraboz balýanymyz da  Karken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat kolledjiniń  túlekteri. Búgingi tańda aıtýly mektep-ınternat kolledjiniń dırektory Seıilhan Baqtyǵalıuly Qaraqov myrzanyń belsendi jumysynyń nátıjesinde  boı kótergen záýlim dzıýdo akademııasynda bilkti maman bapkerlerdiń jattyqtyrýynda jasóspirim balýandar sheberlikterin  shyńdaýda. Taǵy  bir aıta keter qýanyshty jańalyq, jasóspirimderdi Japonııadan arnaıy kelgen tanymal bapker jattyqtyrady. Mundaı praktıka alǵash ret Karken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat kolledjiniń  túlekterine qoldanyp otyr. Bilgir mamannyń kelýi balýandarǵa áserin berip, jetistikterge jetýde.  Bul dzıýdo akademııasy elimizdegi dzıýdo kúresine arnalǵan kóshbasshy sport saraıynyń biri biregeıi dep aıtýǵa tolyq negiz bar. О́ıtkeni, tabaldyryqtan basyp kirgen yntaly jasqa, dzıýdo kúresinde úlken jetistikke jetý úshin barlyq jaǵdaı jan-jaqty jasalǵan. «Aǵaǵa qarap ini óser», demekshi, attary áıgili aǵalarynyń izin basar jas balýandar qalaıda Olımpıada bıigin baǵyndyrýdy maqsat etken. Sondyqtan da dzıýdo kúresine erekshe qoldaý jasap,  kóńil bólip otyrǵan Karken Ahmetov atyndaǵy Olımpıada rezerviniń respýblıkalyq mamandandyrylǵan mektep-ınternat kolledjiniń alar asýy áli alda dep bilemiz.

Endeshe, altyn júldeli  Bekarys alda erler arasyndaǵy alaman jekpe-jekterde de elimizdiń namysyn dál osyndaı úlken tabyspen qýanta berer degen senimde bolaıyq.

Kelesi Olımpıada oıyndary Senegaldyń astanasy Dakarda ótedi. Sol jarysta da  qazaq sportshylar budan da joǵary satyǵa kóterilý úshin aıanbaı ter tógetin bolady.

Aqyn ORDABAIULY,

 ALMATY