عىلىم مەن سپورتتى قاتار الىپ جۇرگەن ازامات

بەلگىلى پەداگوگ-عالىم، فيلولوگيا عىلىمدارىنىڭ كانديداتى، دوتسەنت، قازاقستان جۋرناليستەر وداعىنىڭ مۇشەسى، ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىسى باۋىرجان ءسابيت ۇلى يمانعاليەۆ پەداگوگيكا عىلىمدارى اكادەمياسىنىڭ كوررەسپوندەنت-مۇشەسى بولىپ سايلاندى. بۇل عىلىمي اتاق اكادەميانىڭ جالپى جينالىسىندا كوپشىلىك داۋىسقا سالۋ ارقىلى بەرىلدى. ايتا كەتەرلىگى، مۇنداي اتاق عىلىم كانديداتى نەمەسە دوكتورى عىلىمي دارەجەسى بار ءبىلىم، عىلىم، مادەنيەت سالاسىنىڭ كورنەكتى وكىلدەرىنە عانا بەرىلەدى. باۋىرجان ءسابيت ۇلىنا مۇشەلىك ديپلوم مەن كۋالىكتى اكادەميا پرەزيدەنتى، پەداگوگيكا عىلىمدارىنىڭ دوكتورى، پروفەسسور اسقاربەك قۇسايىنوۆ تابىس ەتتى.

باۋىرجان يمانعاليەۆ 1995 جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا فاكۋلتەتىن ۇزدىك ديپلوممەن بىتىرگەن. ۋنيۆەرسيتەت قابىرعاسىندا فيلولوگيا عىلىمدارىنىڭ دوكتورى، اكادەميكتەر — ز.قابدولوۆ، ز.احمەتوۆ، پروفەسسورلار — ت.كاكىشەۆ، م.سەرعاليەۆ، ا.قىراۋباەۆا، ج.دادەباەۆ سەكىلدى رەسپۋبليكاعا بەلگىلى عالىمداردان ءتالىم الىپ،  جاس تا بولسا قىزمەتتەس بولعان. باۋىرجان ءسابيت ۇلىنىڭ عىلىمي-زەرتتەۋ وبەكتىسى — الاش ۇراندى ادەبيەت،  قازاقتىڭ ءبىرتۋار ۇلى، مەملەكەت جانە قوعام قايراتكەرى تەمىربەك جۇرگەنوۆتىڭ ادەبي-شىعارمالىق مۇراسى. ب.يمانعاليەۆ حالىق اعارتۋ كوميسسارىنىڭ شىعارماشىلىعىن عىلىمي اينالىمعا ءتۇسىرىپ، زەرتتەگەن العاشقى جۇرگەنوۆتانۋشى-عالىم. ول رەسەي، وزبەكستان، تاجىكستان رەسپۋبليكالارى مەن قىزىلوردا، الماتى قالالارىنداعى سيرەك قولجازبالار مۇراعاتتارىن اقتارىپ، تەمىربەك جۇرگەنوۆتىڭ ەڭبەكتەرىن عىلىمي مۇراعا قوستى. ونىڭ قايراتكەر تۋرالى 4 كىتابى جارىققا شىقتى، ءتۇرلى تاقىرىپتارعا جازعان 100-دەن اسا عىلىمي-پۋبليتسيستيكالىق ماقالالارى ءباسپاسوز بەتتەرىندە تۇراقتى جاريالانىپ كەلەدى. 1998 جىلى قر ۇعا-نىڭ  اكادەميگى، حالىق جازۋشىسى زەينوللا قابدولوۆتىڭ جەتەكشىلىگىمەن «تەمىربەك جۇرگەنوۆتىڭ ادەبي-پۋبليتسيستيكالىق مۇراسى» اتتى تاقىرىپتا كانديداتتىق ديسسەرتاتسيا قورعادى.

ول سونداي-اق، سپورتتى دا جانىنداي سۇيەتىن جانداردىڭ ءبىرى. بوس ۋاقىتىندا سۋدا ءجۇزۋدى، ۆولەيبول مەن شاحمات ويناۋدى جاقسى كورەدى. تاەكۆوندودان 1-ءشى رازريادى بار. «ەڭبەك پەن سپورت — ەگىز» دەگەن ۇستانىمدى ءومىر بويى ۇستانىپ كەلەدى. ءوز كاسىبىنە ادالدىق تانىتىپ، كوپ جىلدار بويى ەلىمىزدىڭ تاۋەلسىزدىگىنە، جاس ۇرپاقتى وقىتۋعا بار كۇش-جىگەرىن جۇمساپ كەلە جاتقان ەلجاندى باۋىرجان اعامىزدى ايتۋلى اتاعىمەن شىن جۇرەكتەن قۇتتىقتايمىز! ۇزاق عۇمىر، زور دەنساۋلىق، وتباسىنا باقىت، ەڭبەكتە تولايىم تابىستار تىلەيمىز!

تولەن تىلەۋباي،

استانا قالاسى