Chempıondar lıgasy: «Qaırattyń» eń jas qaqpashysy Qalmyrza alańǵa shyqty (VIDEO)

Almatynyń «Qaırat» klýby fýtboldan UEFA Chempıondar lıgasy negizgi kezeńindegi alǵashqy matchynda Portýgalııanyń «Sportıng» komandasynan jeńildi. Esep – 1:4

Bul matchta «Qaırattyń» qaqpashysy Sherhan Qalmyrzanyń oıyny qalyń jankúıerdiń nazaryn aýdartty. Ol komandanyń negizgi qaqpashysy Aleksandr Zarýkıı men ekinshi qaqpashy Temirlan Anarbekovtiń jaraqat alyp qalýyna baılanysty úshinshi nomerli qaqpashy bolyp oınady. Osylaısha ol UEFA Chempıondar lıgasy tarıhyndaǵy eń jas qaqpashylar qataryna qosyldy. Ol dúnıege kelgenine 18 jas, 3 aı, 3 kún ótkende jasyl alańǵa shyqty.

Birinshi taımda Sherhan Qalmyrza senimdi oınady. Ol matchtyń 4-mınýtynda Pedronyń tepken dobyna aıaǵyn qoıyp, seıv jasasa, 21-mınýtta Morten Iýlmannyń 11-metrlik penaltıin keri qaıtardy. Odan keıin de birneshe ret qaqpany qorǵap qaldy.

44-mınýtta «Sportıng» sapynan Fransıský Trınkan esep ashty.

Ekinshi taımda alań ıeleri tórt mınýtta «Qaırattyń» qaqpasyna úsh gol saldy. Áýeli Fransıský Trınkan 64-mınýtta dop soqsa, odan keıin Alısson Santos 66, Jeovanı Kenda 68-mınýtta nysanany dál kózdedi.

Oıynnyń 86-mınýtynda «Qaırat» sapynan Edmılson bir golmen ǵana jaýap qaıtardy.

Endi «Qaırat» 30 qyrkúıekte Almatyda Ispanııanyń «Real Madrıd» komandasymen oınaıdy. Sondaı-aq olar «Inter» (Italııa), «Arsenal» (Anglııa), «Brıýgge» (Belgııa), «Olımpıakos» (Grekııa), «Pafos» (Kıpr), «Kopengagen» (Danııa) klýbtarymen kúsh synasyp kóredi.

Dastan KENJALIN,

ASTANA