قازاقستان تەننيسشىلەرى ازيا قۇرلىعىندا قۇرمەت تۇعىرىنان كورىندى

الەكساندر بۋبليك ATP تۋرنيرلەرىندەگى سەگىزىنشى تيتۋلىن جەڭىپ الدى. بۇل تۋرالى قازاقستان تەننيس فەدەراتسياسى حابارلادى.

قازاقستاننىڭ ءبىرىنشى، الەمنىڭ 19-راكەتكاسى الەكساندر بۋبليك قىتايدىڭ چانچجوۋ قالاسىندا جالاۋى كوتەرىلگەن اتر 250 تۋرنيرىندە جەڭىمپاز اتاندى.

ول جارىستىڭ 3-راكەتكاسى بولىپ تىركەلىپ، فينالدا دۇنيەجۇزىلىك رەيتينگىدە 88-ورىندا تۇرعان فرانتسيالىق ۆالەنتەن رۋاەمەن وينادى.

ءبىرىنشى پارتيادا بۋبليك تاي-برەيكتە قارسىلاسىن 7:6 (7:4)، ەكىنشى سەتتە دە 7:6 (7:4) ەسەبىمەن جەڭدى.

الەكساندر بۋبليك ءبىر ساعات 53 مينۋتتا 21 ەيس جاسادى. فرانتسۋز تەننيسشى 8 ەيستەن اسا المادى. ەكەۋى دە 2 برەيك-پوينتتى پايدالانا المادى.

وسىلايشا، الەكساندر بۋبليك سپورتتىق جولىندا ATP تۋرنيرلەرىندەگى سەگىزىنشى تيتۋلىن جەڭىپ الدى.

فيليپپيندە 14 جاسقا دەيىنگى جاسوسپىرىمدەر اراسىندا تەننيستەن ازيا جەكەلەي چەمپيوناتى مارەسىنە جەتتى.

وعان ازيا تەننيس فەدەراتسياسىنان ارنايى شاقىرتۋ العان اسقار ءامىر، ياسمين دۇيسەمباەۆا جانە سوفيا مالىشەۆا قاتىستى.

جارىس قورىتىندىسىندا ياسمين دۇيسەمباەۆا ءۇشىنشى ورىن الىپ، قولا مەدالعا يە بولدى. وسى جەڭىسىنەن كەيىن ول كەلەسى جىلى اۆستراليا اشىق چەمپيوناتىنىڭ ەكىنشى اپتاسىندا وتەتىن Elite Junior Trophy 14 & Under تۋرنيرىندە باق سىناۋعا مۇمكىندىك الدى.

وتانداستارىمىزدان 2023 جىلى Elite Junior Trophy 14 & Under دوداسىندا البينا كاكەنوۆا، بىلتىر ەۆا كورىشەۆا فينالعا دەيىن جەتتى. 2025 جىلى روديون ترايگەل قاتىسىپ قايتتى.