III TMD elderi oıyndary: Qazaqstan karate men nysana kózdeýden top jardy

Ázerbaıjanda ótip jatqan III TMD elderi oıyndarynda Qazaqstan sportshylary taǵy 10 medal aldy, dep habarlady Týrızm jáne sport mınıstrligi Sportty damytý dırekııasynyń baspasóz qyzmeti.

Búgin Mıngıachevır qalasynda karateshiler 3 altyn, 3 kúmis jáne 2 qola júldeni jeńip aldy. Altyn medaldi Darhan Temiralıev (-60 kg), Aıjan Bákirova (-61 kg), Dıas Anarbekov (+84 kg) ıelense, Asylaı Savıdova (+68 kg), Shyńǵys Taılıev (-75 kg) pen Natalı Kasıkova (kata)  kúmis júldege ıe boldy. Qola medaldi Malıka Abjanova (-50 kg) men Aıshabıbi Sharahan (-55 kg) qanaǵat  tutty.

Osydan eki jyl buryn Belarýste jalaý kótergen II TMD elderi oıyndarynda WKF karateden Qazaqstan quramasy 3 altyn, 1 kúmis júlde ıelengen.

Qazir Qazaqstan quramasy Ázerbaıjandaǵy keshende jarysta 8 altyn medalmen jalpy esepte besinshi orynda kele jatyr.

Gıandja qalasynda nysana kózdeýden III TMD elderi oıyndarynyń alǵashqy júldeleri óz ıesin tapty.

Pnevmatıkalyq vıntovkamen 10 metrden oq atýda Dmıtrıı Kım eshkimge des bermedi. Ol fınalda 249.4 upaı jınady. Taǵy bir otandasymyz Nıkıta Shahtorın fınalda besinshi oryn aldy.

Áıelder arasynda Parıj Olımpıadasynyń qola júldegeri (mıkst) Aleksandra Le kúmis júldeger atandy. Otandasymyz fınalda 253 ball jınady. Al Elızaveta Bezrýkova tórtinshi satyǵa jaıǵasty.

Qazir Qazaqstan quramasynyń III TMD elderi oıyndaryndaǵy altyn sany tórteýge jetti.