سۋ سپورتىنان اچ: قازاقستان ۆاتەرپولو كوماندالارى — قولا جۇلدەگەر!

ءۇندىستاننىڭ احمەداباد قالاسىندا سۋ سپورتى تۇرلەرىنەن ازيا چەمپيوناتى اياقتالدى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

ءتۋرنيردىڭ سوڭعى كۇنىندە سۋ دوبىنان قازاقستان ەرلەر جانە ايەلدەر قۇرامالارى ءۇشىنشى ورىن ءۇشىن وتكەن ماتچتاردا باق سىناپ، قولا مەدال يەلەندى. ەرلەر قۇراماسى تارتىستى ويىندا جاپونيا كومانداسىن 16:14 ەسەبىمەن جەڭدى.

ايەلدەر قۇراماسى تايلاند سپورتشىلارىمەن كەزدەسىپ، ويىننىڭ نەگىزگى ۋاقىتى 6:6 ەسەبىمەن تەڭ اياقتالىپ، جەڭىمپازدار كوماندا سايىس سوڭىنداعى پەنالتي سەرياسىندا انىقتالدى. ناتيجەسىندە، ارۋلارىمىز دالدىك تانىتىپ، 3:2 ەسەبىمەن قارسىلاستارىنان باسىم ءتۇستى. قورىتىندى ەسەپ – 9:8.

وسىلايشا، قازاقستان ەرلەر جانە ايەلدەر كوماندالارى ازيا چەمپيوناتىنىڭ قولا جۇلدەسىنە يە بولدى.