SportPress.kz قازاقستان سپورت جاڭالىقتارى
ءال-فارابي اتىنداعى قازۇۋ-دىڭ جۋرناليستيكا فاكۋلتەتىندە بەيبىتشىلىك پەن دامۋ جولىنداعى دۇنيەجۇزىلىك عىلىم كۇنىنە ارنالعان «جاھاندىق كوممۋنيكاتسيا: وركەنيەتتىك دامۋدىڭ ۇلتتىق اقپاراتتىق مودەلى جانە جاساندى ينتەللەكت» تاقىرىبىندا حالىقارالىق عىلىمي-تاجىريبەلىك كونفەرەنتسيا جانە IV ءداستۇرلى كەنجالين وقۋلارى ءوتتى، دەپ حابارلادى يۋنەسكو-نىڭ جۋرناليستيكا جانە كوممۋنيكاتسيا كافەدراسى.
يۋنەسكو-نىڭ جۋرناليستيكا جانە كوممۋنيكاتسيا كافەدراسى ۇيىمداستىرعان شارانىڭ نەگىزگى ماقساتى — جاھاندانۋ داۋىرىندەگى اقپاراتتىق مەديا ساياساتتاعى ۇلت بىرەگەيلىگى ماسەلەلەرى، جاساندى ينتەللەكتىنىڭ بۇقارالىق اقپارات قۇرالدارىنا دەگەن وڭ جانە تەرىس ىقپالدارىن تالقىلاۋعا باعىتتالدى.
جيىنعا ۋنيۆەرسيتەت باسشىلىعى، شەتەلدىك جانە وتاندىق عالىمدار، قوعام قايراتكەرلەرى، مەديا جانە جي سالاسىنىڭ ماماندارى جانە ءبىلىم الۋشى جاستار قاتىستى.
جيىندا ءسوز العان الەۋمەتتىك دامۋ جونىندەگى پرورەكتور باقىتجان وماروۆ: «كەنجالين وقۋلارى – جاس بۋىندى كاسىبي جاۋاپكەرشىلىككە، ۇلتتىق رۋحقا جانە ءادىل اقپارات تاراتۋ مادەنيەتىنە تاربيەلەيتىن ەرەكشە مەكتەپ. بۇل – عىلىم مەن جۋرناليستيكانىڭ توعىسقان تۇسى»، – دەدى. سونداي-اق ول زەيىندى زەرتتەۋشى، قايراتكەر ءارى قالامگەر ج.كەنجاليننىڭ ۇلتتىق اقپاراتتىق كەڭىستىكتىڭ دامۋىنا قوسقان زور ۇلەسىن اتاپ ءوتتى.
-قازاق جۋرناليستيكاسىنىڭ دامۋىنداعى ج.كەنجاليننىڭ ەسىمى – ادالدىق پەن جاۋاپكەرشىلىكتىڭ سيمۆولى. ول رەداكتور رەتىندە دە، عالىم رەتىندە دە ءار ءسوزدىڭ سالماعىن سەزىنەتىن تۇلعا ەدى. كەنجالين جۋرناليستيكانى حالىققا قىزمەت ەتۋدىڭ بيىك مىنبەرى دەپ ءتۇسىندى. ونىڭ ەڭبەكتەرى بۇگىنگى جاس جۋرناليستەرگە ۇلگى بولىپ قالا بەرەدى، – دەدى جيىندا ءسوز العان پروفەسسور نامازالى وماشەۆ.
بۇۇ جاھاندىق كوممۋنيكاتسيالار دەپارتامەنتىنىڭ وكىلى جانە قازاقستانداعى بۇۇ تۇراقتى ۇيلەستىرۋشىسى ۆلاستيميل سامەك قازىرگى تاڭدا جاساندى ينتەللەكتىنىڭ وركەنيەتتىك دامۋداعى الار ۇلەسىنىڭ ماڭىزدىلىعىنا توقتالا كەلىپ، بۇۇ-نىڭ باس حاتشىسى انتونيۋ گۋتەرريشتىڭ جاساندى ينتەللەكتى تۋرالى بۇۇ-نىڭ جاقىنداعى سەسسياسىندا ارنايى بايانداما جاساپ، «يننوۆاتسيالاردىڭ بارلىعى تەك قانا ادامزاتتىڭ يگىلىگى ماقساتىندا عانا قىزمەت ەتىپ، قولدانىلۋى كەرەك» دەگەن ءسوزىن العا تارتتى.
«Alatau-Aqparat» مەديا حولدينگىنىڭ باس ديرەكتورى ەرجان تولەك قازاقستاننىڭ اقپاراتتىق كەڭىستىگىن قازىرگى جاعدايدا ءۇش دەڭگەيلى جۇيە ارقىلى قورعاۋ ماڭىزدىلىعىنا توقتالىپ، ولاردى بىلايشا سانامالاپ بەردى: ءبىرىنشى – ۇلتتىق اقپاراتتىق كەڭىستىك، ەكىنشى – ورتا ازيالىق اقپاراتتىق كەڭىستىك، ءۇشىنشى – تۇركى الەمىنىڭ ورتاق اقپاراتتىق شەڭبەرى.
سونىمەن قاتار حالىقارالىق شارا بارىسىندا سانكت-پەتەربۋرگ مەملەكەتتىك ۋنيۆەرسيتەتى جۋرناليستيكا جانە بۇقارالىق كوممۋنيكاتسيا جوعارى مەكتەبىنىڭ پروفەسسورى، ساياساتتانۋ عىلىمدارىنىڭ دوكتورى ي.ا. بىكوۆ، قازاقستاننىڭ اۆياتسيالىق اكىمشىلىگىنىڭ كوممۋنيكاتسيالار جونىندەگى ديرەكتورى قۇماروۆا مەرۋەرت جانە يۋنەسكو-نىڭ جۋرناليستيكا جانە كوممۋنيكاتسيا كافەدراسىنىڭ مەڭگەرۋشىسى و.ج. وشانوۆا ۇلتتىق اقپاراتتىق دامۋ كونتەكستىندەگى جي ساۋاتتىلىعى تۋرالى ءوز ويلارىن ورتاعا سالدى.
سونداي-اق كونفەرەنتسيا اياسىندا جينالعاندار مەديامادەنيەتتىڭ ترانسفورماتسياسى، تسيفرلىق جۋرناليستيكا جانە جاساندى ينتەللەكتىنىڭ ەتيكالىق قىرلارىنا توقتالىپ، اقپاراتتىڭ شىنايىلىعى مەن مەدياساۋاتتىلىقتىڭ ماڭىزدىلىعى، جاھاندىق اقپاراتتىق كەڭىستىكتەگى ۇلتتىق بىرەگەيلىكتى قالىپتاستىرۋداعى ۋاقىت العا تارتىپ وتىرعان ماسەلەلەردى جان-جاقتى تالقىلادى.
الماتى
