گەننادي گولوۆكين World Boxing پرەزيدەنتى بولىپ سايلاندى

گەننادي گولوۆكين يتاليانىڭ ريم قالاسىندا وتكەن كونگرەستە حالىقارالىق World Boxing فەدەراتسياسىنىڭ پرەزيدەنتى بولىپ سايلاندى. بۇل تۋرالى ۇلتتىق وليمپيالىق كوميتەت حابارلادى.

ول حالىقارالىق سپورت فەدەراتسياسىن باسقارىپ وتىرعان العاشقى قازاقستان ازاماتى رەتىندە تاريحقا ەندى. وكىلەتتىك مەرزىمى — ءۇش جىل.

-مەن بوكسقا قاتىستى جولدىڭ بارلىق كەزەڭىنەن ءوتتىم. سپورتشى بولىپ، وليمپيالىق ويىنداردا ەل نامىسىن قورعادىم. كەيىن الەم چەمپيونى اتاندىم. ەندى مىنە، سپورت سالاسىندا كوشباسشى رەتىندە قىزمەت ەتىپ كەلەمىن.

مەن مۇندا بوكستىڭ بولاشاعى ءۇشىن جۇمىس ىستەۋگە كەلدىم.

حالىقارالىق وليمپيالىق كوميتەت Olympism365 كوميسسياسىنىڭ مۇشەسى ءارى World Boxing وليمپيادالىق كوميسسياسىنىڭ توراعاسى رەتىندە جاقسى بىلەتىنىم: ءادىل باسقارۋ — سپورتشىلاردى جانە ءبىزدىڭ سپورتتى قورعايتىن باستى تەتىك.

بۇگىن ءبىز العا قاراي ماڭىزدى قادام جاساپ وتىرمىز. ءبىز سپورتشىلار سەنەتىن، وليمپيالىق قاۋىمداستىق قۇرمەتتەيتىن فەدەراتسياعا اينالۋىمىز كەرەك.

ءاربىر بوكسشى ءادىل ءارى قاۋىپسىز سپورتتا ءوسىپ، دامىسا دەيمىن. ءبىز تاۋەلسىز بولامىز. بىراق وليمپيالىق قۇندىلىقتاردى قۇرمەتتەپ، ادىلدىك، تەڭدىك جانە سپورتشىنى قورعاۋ قاعيدالارىنا ساي جۇمىس ىستەيمىز.

قولداۋ كورسەتىپ، سەنىم بىلدىرگەندەرىڭىز ءۇشىن بارىڭىزگە العىس ايتامىن، — دەدى گەننادي گولوۆكين.

كونگرەسستە World Boxing ۇيىمىنىڭ باسقارۋ ورگاندارىنا سايلاۋ بولدى. سونىمەن قاتار فەدەراتسيا رەگلامەنتىنە قاتىستى ماسەلەلەر، حالىقارالىق كۇنتىزبە جانە ۇيىم قۇرىلىمىن دامىتۋ تاقىرىپتارى قارالدى.

قابىلدانعان بارلىق شەشىم ۇيىم جارعىسىنا تولىق سايكەس ءوتتى. ءار ماسەلە جەكە داۋىسقا سالىنىپ، دەلەگاتتاردىڭ باسىم بولىگى قولداعاننان كەيىن عانا بەكىتىلدى. داۋىس بەرۋگە بارلىعى 58 ۇلتتىق فەدەراتسيا وكىلى قاتىستى.

World Boxing — 2023 جىلدىڭ ءساۋىر ايىندا قۇرىلعان حالىقارالىق بوكس فەدەراتسياسى. 2024 جىلدىڭ قىركۇيەگىندە گەننادي گولوۆكين ۇيىمنىڭ جاڭا وليمپيالىق كوميسسياسىنىڭ توراعاسى بولدى.

2025 جىلدىڭ اقپانىندا حالىقارالىق وليمپيالىق كوميتەت World Boxing ۇيىمىن ۋاقىتشا مويىنداپ، وعان بوكستى الەمدىك دەڭگەيدە باسقارۋ قۇقىعىن بەردى. ال ناۋرىز ايىندا حوك بوكستى لوس-اندجەلەستە وتەتىن 2028 جىلعى وليمپيادا باعدارلاماسىنا رەسمي تۇردە ەنگىزۋ تۋرالى شەشىم قابىلدادى.

قازىرگى تاڭدا World Boxing قۇرامىنا 136 ەل كىرەدى.

قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ گەننادي گولوۆكيندى World Boxing حالىقارالىق بوكس فەدەراتسياسىنىڭ پرەزيدەنتى بولىپ سايلانۋىمەن قۇتتىقتادى.

-بۇل — گەننادي گولوۆكيننىڭ ەرەن ەڭبەگىنە بەرىلگەن لايىقتى باعا. داڭقتى وتانداسىمىز وليمپيادالىق سپورت ءتۇرى بويىنشا حالىقارالىق فەدەراتسيانى باسقاراتىن قازاقستاننىڭ العاشقى وكىلى اتاندى، — دەدى ول.

گەننادي گولوۆكين حالىقارالىق سپورت فەدەراتسياسىن باسقاراتىن العاشقى قازاقستان ازاماتى بولىپ وتىر. وكىلەتتىك مەرزىمى — ءۇش جىل.