قانات يسلامنىڭ جەكپە-جەگى تاعى كەيىنگە قالدى

كاسىپقوي بوكسشى قانات يسلام الماتىدا بولاتىن جەكپە-جەگىنىڭ كەيىنگە شەگەرىلگەنىن ايتتى.

ونىڭ ايتۋىنشا، 27 جەلتوقسانعا جوسپارلانعان بوكس كەشىنە قاتىسا المايدى.

– قۇرمەتتى جانكۇيەرلەرىم، مەن 27-جەلتوقساندا الماتىدا بولاتىن بوكس كەشىنە قاتىسپايمىن. بۇعان بىرنەشە سەبەپ بولىپ تۇر. سونىڭ ءبىرى قارسىلاستارعا بايلانىستى ماسەلە تۋىندادى. ەگەر ءبارى ويداعىداي بولسا، جەكپە-جەك شامامەن ءبىر جارىم ايعا كەيىنگە قالادى. ناقتى كۇنى بەلگىلى بولعاندا مىندەتتى تۇردە حابارلايمىز، – دەدى ول الەۋمەتتىك جەلىدەگى پاراقشاسىندا.

ونىڭ جاسى 41-دە. ول  2008 جىلعى بەيجىڭ وليمپياداسىنىڭ قولا جۇلدەگەرى.

قانات يسلام كاسىپقوي بوكستا بىرقاتار جەتىستىككە جەتكەن. ول ءبىرىنشى ورتا سالماقتا WBA Inter-Continental، WBO NABO، WBO Inter-Continental، WBA Fedelatin جانە WBA Fedecaribe تيتۋلدارىنىڭ يەگەرى.

داستان كەنجالين،

استانا