جانى ساۋدىڭ ءتانى ساۋ سپارتاكياداسى

حالىق اراسىندا «سپورت دەنساۋلىقتىڭ كەپىلى»، دەگەن ءتالسىم بار. سپورتپەن اينالىسىپ، دەنساۋلىعىن جاقسارتۋ جولىندا ارەكەت جاساپ جۇرگەن جانداردى كورىپ ريزا بولاتىنىمىز راس. ويتكەنى ولار ءوز دەنساۋلىعىن ساۋىقتىرۋ ارقىلى اينالاعا ۇلگى-ونەگە بولادى. نەگىزى ءومىرىن سپورتپەن ورنەكتەگەن جاندار ءۇشىن كۇن سايىنعى جاتتىعۋدان العان شەبەرلىكتەرىن جارىستاردا ءبىر سىناپ تۇرۋدىڭ دا ماڭىزى زور.

وتكەن اپتانىڭ اياعىندا الماتىداعى ك. احمەتوۆ اتىنداعى وليمپيادالىق رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات كوللەدجدىڭ شاڭىراعىندا وسى سپورت مەكەمەسىندەگى قىزمەتكەرلەر مەن ۇستازدار اراسىندا تارتىستى وتكەن سپارتاكيادا ويىندارى بولىپ ءوتتى.

بۇل سپارتاكيادادا ۇجىم قىزمەتكەرلەرى سپورتتىڭ دارتس، سۋعا ءجۇزۋ، ارقان تارتۋ، ۆولەيبول جانە شاعىن فۋتبول تۇرلەرىنەن سىنعا ءتۇسىپ، جەڭىس ءۇشىن ايانباي بار شەبەرلىكتەرىن كورسەتتى. جاسوسپىرمدەرگە ءتالىم-تاربيە بەرىپ جۇرگەن ۇجىم قىزمەتكەرلەرى سپورتتا قارا جاياۋ ەمەس ەكەندىكتەرىن تارتىستى ونەرلەرى ارقىلى پاش ەتتى. كۇن ۇزاق كەسكىلەسكەن، سۇراپىل، جويقىن ويىنداردىڭ ناتيجەسىندە توپجارىپ شىققاندار قاس-قارايا انىقتالدى.

ايتۋلى مەكتەپ-ينتەرنات كوللەدجدىڭ ديرەكتورى جايدار سايلاۋباەۆ باستاپ شىققان اكىمشىلىك ءبولىمى ۆولەيبول، فۋتبول، سۋعا ءجۇزۋ سايىستارىندا جوعارى دەڭگەيدە ويىن ورنەگىن كورسەتىپ، جالپى كوماندالىق باس كۋبوكتى جەڭىپ الدى. ال ەكىنشى كۇمىس جۇلدە «سپورت ءبولىمىنىڭ» قىزمەتكەرلەرىنە تابىس ەتىلسە، قولا جۇلدە «وقۋ ءبولىمىنىڭ» كومانداسىنا بۇيىردى. مەكەمە قىزمەتكەرلەرى ءۇشىن بۇل سپارتاكيادا ءبىر ءسات ءبىر-بىرىمەن ارالاسىپ، سىرلاسىپ، دوستىق ءجىبىن جالعاي تۇسۋگە زور مۇمكىندىك بەرگەن دەمالىس بولدى دەسە بولادى.

حاديستە: «جەمىت قارىن، ارتىق ەت ارام ەت»، دەگەن ءسوز بار بولسا، دەنساۋلىققا كوڭىل ءبولىپ، سپورتتى ءومىرىنىڭ سەرىگى ەتىپ، قوعامدا بەلسەندى بولۋدىڭ ادامزات ءۇشىن ماڭىزى ايىرىقشا دەپ بىلەمىز. سىمباتتى، سۇلۋ كورىنۋ ءۇشىن دە سپورتتىڭ بەرەرى مول. «جانى ساۋدىڭ ءتانى ساۋ» بولاتىنى انىق.

بۇل جارىستى ۇيىمداستىرۋداعى دا باستى ماقسات — سالاۋاتتى ءومىر سالتىن جاڭعىرتۋ. ەندەشە، دوستىق قاتىناستا نىعايتىپ، دەنساۋلىعىن جاقسارتىپ جاستارعا ۇلگى بولاتىن وسىنداي الامان جارىستار ءار مەكەمەلەردە ءوتىپ تۇرسا ابزال بولماق.

اقىن ورداباي ۇلى،

الماتى