«بەلگراد ارەنادا» قازاقستاننىڭ تۋريستىك الەۋەتى ناسيحاتتالدى

سەربيانىڭ استاناسى بەلگراد قالاسىندا ەۋروپاداعى ەڭ اۋقىمدى سپورتتىق وقيعالاردىڭ ءبىرى بولدى.

بۇل جەردە باسكەتبولدان بەلگرادتىڭ «پارتيزان» مەن افينانىڭ «پاناتينايكوس» كلۋبتارى اراسىنداعى ەۋروليگاسىنىڭ ماتچى اياسىندا ەلىمىزدىڭ تۋريستىك الەۋەتى، سونداي-اق، استانا – بەلگراد تىكەلەي اۋە رەيسىنىڭ جۋىرداعى اشىلۋى تانىستىرىلدى.

قازاقستان ەلشىلىگىنىڭ باستاماسىمەن «بەلگراد ارەنادا» وتكەن ماتچتا جينالعان 18 مىڭ كورەرمەننىڭ اراسىندا ينتەراكتيۆتى اكتسيا ۇيىمداستىرىلىپ، كەزدەيسوق تاڭدالعان جانكۇيەرلەر «پارتيزان» كلۋبى ۇسىنعان ايىپ دوبىن لاقتىرۋ كونكۋرسىنا قاتىسۋ مۇمكىندىگىنە يە بولدى.

ويىن جەڭىمپازىنا ارنالعان جۇلدە – قتۋريزم، ازاقستانعا ەكى ادامعا ارنالعان تۋريستىك ساپار سەرتيفيكاتىن قازاقستان رەسپۋبليكاسىنىڭ سەربياداعى ەلشىسى ءمادي اتامقۇلوۆ تابىس ەتتى. ديپلومات جەڭىمپازدى قۇتتىقتاي وتىرىپ، كوپمىڭدىق اۋديتوريانى قازاقستانعا ساياحاتتاۋعا شاقىردى.

كونكۋرس اتموسفەراسىن ارەنانىڭ ەكراندارىندا كورسەتىلگەن «Born Bold Kazakhstan» تۋريستىك روليكتەرى، قازاقستاندىق SCAT Airlines اۋە كومپانياسى اشقان استانا – بەلگراد تىكەلەي رەيسىنىڭ پروموبەينەجازباسى، سونداي-اق باسكەتبول جانكۇيەرلەرىنە «Born Bold Kazakhstan» جازۋى بار فۋتبولكالار مەن بەيسبولكالاردى تاراتقان قازاقتىڭ ۇلتتىق كيىمىندەگى قىزدار كوزگە ايشىقتاي ءتۇستى.

باسكەتبول ەۋروليگاسى تانىمالدىلىعى مەن مەديا قامتۋى بويىنشا قۇرلىقتاعى سپورتتىق جارىستار اراسىندا ەكىنشى ورىندا تۇر. ەۋروليگانىڭ تۇراقتى ماۋسىمى الەمنىڭ 199 ەلىندە كورسەتىلەدى. تەلەديداردى 1 ميللياردتان استام كورەرمەن قارايدى.

كونكۋرس جەڭىمپازدارىنىڭ اۋە بيلەتتەرىن ساتىپ الۋعا بايلانىستى بارلىق شىعىندار سەربيالىق تۋريستىك ۇيىمداستىرۋشىلار مەن كاسىپكەر دراگيشا مارتينوۆيچ تاراپىنان تولىقتاي وتەلەدى.

سەيىلحان اۋباكىروۆ