سايىپقىران. تارازدىق جاس بالۋان – قازاقستان چەمپيونى

بۇگىن “سايىپقىران” ايدارىن ودان ءارى جالعاستىرامىز. وقىرمان نازارىنا تاراز قالاسىنىڭ تۋماسى، جاس سپورتشى باقداۋلەت ەربول ۇلى تۇرسىنبەك تۋرالى ماتەريالدى ۇسىنۋدى ءجون كورىپ وتىرمىز.

باقداۋلەت تۇرسىنبەك  — گرەك-ريم كۇرەسىنەن جاستار اراسىندا ۇلكەن جەتىستىككە جەتىپ جۇرگەن بالۋان. 

ول 2026 جىلدىڭ 24 اقپانىندا استانا قالاسىندا وتكەن U-20 قازاقستان چەمپيوناتىندا 77 كەلى سالماقتا التىن مەدال جەڭىپ الىپ، ەل چەمپيونى اتاندى.

بالۋان 2006 جىلى 23 ساۋىردە دۇنيەگە كەلگەن. وتباسىندا اكە-شەشەسى، اپكەسى جانە ەكى ءىنىسى بار. جاس تالانت سپورتقا 10 جاسىندا قادام باسىپ، كۇرەسكە اعاسىنىڭ جەتەلەۋىمەن كەلگەن. العاشقى باپكەرى – تاجىريبەلى جاتتىقتىرۋشى ساعي يساەۆ. ول جاس سپورتشىنىڭ تەك تەحنيكالىق شەبەرلىگىن عانا ەمەس، ءتارتىبى مەن مىنەزىن دە قالىپتاستىرۋعا ۇلكەن ۇلەس قوسقان.

سپورتشى 2019 جىلى رەسپۋبليكالىق سپورت كوللەدجىنە ءتۇسىپ، 2023 جىلى 11 سىنىپتى اياقتاعان. قازىرگى تاڭدا وسى وقۋ ورنىندا كوللەدجدىڭ 3-كۋرس ستۋدەنتى.

استانا قالاسىندا وتكەن ەل چەمپيوناتىندا باقداۋلەت جاقسى ونەر كورسەتتى. ول تۋرنيردە بەس رەت كۇرەسىپ، قارسىلاستارىنىڭ بارلىعىن سەنىمدى تۇردە جەڭدى. اتاپ ايتقاندا، قوستاناي مەن استانا قالاسىنىڭ بالۋاندارىن 8:0 ەسەبىمەن جەڭسە، پەتروپاۆل سپورتشىسىمەن بولعان بەلدەسۋدە 3:1 ەسەبىمەن باسىم ءتۇستى. جارتىلاي فينالدا اقتوبە وبلىسىنىڭ بالۋانىن 10:1 ەسەبىمەن جەڭىپ، فينالعا جولداما الدى. ال شەشۋشى بەلدەسۋدە قاراعاندى وبلىسىنىڭ سپورتشىسىن 7:4 ەسەبىمەن جەڭىپ، چەمپيون اتاندى.

بۇل جەڭىس – جاس بالۋاننىڭ تاباندىلىعى مەن باپكەرىنىڭ جۇيەلى ەڭبەگىنىڭ ناتيجەسى.

الداعى ۋاقىتتا باقداۋلەت تۇرسىنبەك ازيا جانە الەم چەمپيوناتتارىنا قاتىسىپ، ەل نامىسىن قورعاۋدى ماقسات ەتىپ وتىر. ول حالىقارالىق ارەنالاردا قازاقستان تۋىن كوككە كوتەرۋگە بار كۇش-جىگەرىن جۇمساۋعا دايىن.

 «ماقساتىم – الەم چەمپيونى بولۋ»

– باقداۋلەت، اۋەلى ءوزىڭىز تۋرالى ايتىپ بەرەسىز بە؟

– مەن تاراز قالاسىندا 2006 جىلى 23 ساۋىردە دۇنيەگە كەلدىم. وتباسىمدا اكەم، انام، اپكەم جانە ەكى ءىنىم بار. قازىر رەسپۋبليكالىق سپورت كوللەدجىنىڭ 3-كۋرس ستۋدەنتىمىن.

– كۇرەسكە قالاي كەلدىڭىز؟

– كۇرەسكە 10 جاسىمدا اعامنىڭ ارقاسىندا كەلدىم. العاشقى باپكەرىم – ساعي يساەۆ. ول كىسى ماعان كۇرەستىڭ بارلىق قىر-سىرىن ۇيرەتىپ، ءتارتىبىمدى قالىپتاستىرۋعا كوپ كومەكتەستى.

– سوڭعى جەتىستىگىڭىز تۋرالى ايتىپ بەرسەڭىز.

– 2026 جىلى استانا قالاسىندا وتكەن U-20 قازاقستان چەمپيوناتىندا 77 كەلى سالماقتا چەمپيون اتاندىم. بۇل جارىسقا باپكەرىممەن ۇزاق دايىندالدىق.

– جارىس قالاي بولدى؟

– جالپى 5 بەلدەسۋ وتكىزدىم. قارسىلاستارىم مىقتى بولدى. قوستاناي جانە استانا بالۋاندارىن 8:0 ەسەبىمەن جەڭدىم. پەتروپاۆل سپورتشىسىمەن قيىن بەلدەسۋ بولىپ، 3:1 ەسەبىمەن جەڭىسكە جەتتىم. جارتىلاي فينالدا اقتوبە بالۋانىن 10:1 ەسەبىمەن تىزە بۇكتىردىم.. فينالدا قاراعاندى بالۋانىن 7:4 ەسەبىمەن جەڭىپ، چەمپيون اتاندىم.

– الداعى جوسپارلارىڭىز قانداي؟

– الداعى ۋاقىتتا باپكەرىممەن بىرگە تىڭعىلىقتى دايىندالىپ، ازيا جانە الەم چەمپيوناتتارىندا جەڭىسكە جەتىپ، قازاقستاننىڭ تۋىن الەمدىك ارەنالاردا كوتەرگىم كەلەدى.

مەڭىڭ ماقساتىم — الەم چەمپيونى بولۋ.

– اڭگىمەڭىزگە راحمەت!

اڭگىمەلەسكەن نۇرجان اسان،

تاراز