SportPress.kz Qazaqstan sport jańalyqtary
Búgin “Saıypqyran” aıdaryn odan ári jalǵastyramyz. Oqyrman nazaryna Taraz qalasynyń týmasy, jas sportshy Baqdáýlet Erboluly Tursynbek týraly materıaldy usynýdy jón kórip otyrmyz.
Baqdáýlet Tursynbek — grek-rım kúresinen jastar arasynda úlken jetistikke jetip júrgen balýan.
Ol 2026 jyldyń 24 aqpanynda Astana qalasynda ótken U-20 Qazaqstan chempıonatynda 77 keli salmaqta altyn medal jeńip alyp, el chempıony atandy.
Balýan 2006 jyly 23 sáýirde dúnıege kelgen. Otbasynda áke-sheshesi, ápkesi jáne eki inisi bar. Jas talant sportqa 10 jasynda qadam basyp, kúreske aǵasynyń jeteleýimen kelgen. Alǵashqy bapkeri – tájirıbeli jattyqtyrýshy Saǵı Isaev. Ol jas sportshynyń tek tehnıkalyq sheberligin ǵana emes, tártibi men minezin de qalyptastyrýǵa úlken úles qosqan.
Sportshy 2019 jyly respýblıkalyq sport kolledjine túsip, 2023 jyly 11 synypty aıaqtaǵan. Qazirgi tańda osy oqý ornynda kolledjdiń 3-kýrs stýdenti.
Astana qalasynda ótken el chempıonatynda Baqdáýlet jaqsy óner kórsetti. Ol týrnırde bes ret kúresip, qarsylastarynyń barlyǵyn senimdi túrde jeńdi. Atap aıtqanda, Qostanaı men Astana qalasynyń balýandaryn 8:0 esebimen jeńse, Petropavl sportshysymen bolǵan beldesýde 3:1 esebimen basym tústi. Jartylaı fınalda Aqtóbe oblysynyń balýanyn 10:1 esebimen jeńip, fınalǵa joldama aldy. Al sheshýshi beldesýde Qaraǵandy oblysynyń sportshysyn 7:4 esebimen jeńip, chempıon atandy.
Bul jeńis – jas balýannyń tabandylyǵy men bapkeriniń júıeli eńbeginiń nátıjesi.
Aldaǵy ýaqytta Baqdáýlet Tursynbek Azııa jáne álem chempıonattaryna qatysyp, el namysyn qorǵaýdy maqsat etip otyr. Ol halyqaralyq arenalarda Qazaqstan týyn kókke kóterýge bar kúsh-jigerin jumsaýǵa daıyn.
«Maqsatym – álem chempıony bolý»
– Baqdáýlet, áýeli ózińiz týraly aıtyp beresiz be?
– Men Taraz qalasynda 2006 jyly 23 sáýirde dúnıege keldim. Otbasymda ákem, anam, ápkem jáne eki inim bar. Qazir respýblıkalyq sport kolledjiniń 3-kýrs stýdentimin.
– Kúreske qalaı keldińiz?
– Kúreske 10 jasymda aǵamnyń arqasynda keldim. Alǵashqy bapkerim – Saǵı Isaev. Ol kisi maǵan kúrestiń barlyq qyr-syryn úıretip, tártibimdi qalyptastyrýǵa kóp kómektesti.
– Sońǵy jetistigińiz týraly aıtyp berseńiz.
– 2026 jyly Astana qalasynda ótken U-20 Qazaqstan chempıonatynda 77 keli salmaqta chempıon atandym. Bul jarysqa bapkerimmen uzaq daıyndaldyq.
– Jarys qalaı boldy?
– Jalpy 5 beldesý ótkizdim. Qarsylastarym myqty boldy. Qostanaı jáne Astana balýandaryn 8:0 esebimen jeńdim. Petropavl sportshysymen qıyn beldesý bolyp, 3:1 esebimen jeńiske jettim. Jartylaı fınalda Aqtóbe balýanyn 10:1 esebimen tize búktirdim.. Fınalda Qaraǵandy balýanyn 7:4 esebimen jeńip, chempıon atandym.
– Aldaǵy josparlaryńyz qandaı?
– Aldaǵy ýaqytta bapkerimmen birge tyńǵylyqty daıyndalyp, Azııa jáne álem chempıonattarynda jeńiske jetip, Qazaqstannyń týyn álemdik arenalarda kótergim keledi.
Meńiń maqsatym — álem chempıony bolý.
– Áńgimeńizge rahmet!
Áńgimelesken Nurjan ASAN,
TARAZ
