قازاقستان ورتالىق ازيادا تازا سپورتتى ىلگەرىلەتۋدە نەگىزگى ءرول اتقارادى

تۋريزم جانە سپورت مينءيسترلىگى دۇنيەجۇزىلىك دوپينگكە قارسى اگەنتتىكپەن (ۆادا) ءوزارا تۇسىنىستىك تۋرالى مەموراندۋمعا قول قويدى، دەپ حابارلادى تۋريزم جانە سپورت مينيسترلىگى.

ءراسىم پولشانىڭ تورۋن قالاسىندا وتكەن جابىق عيماراتتاعى جەڭىل اتلەتيكادان الەم چەمپيوناتى اياسىندا بولدى. قۇجاتقا مينيستر ەربول مىرزابوسىنوۆ پەن  ۆادا پرەزيدەنتى ۆيتولد بانكا اراسىنداعى كەزدەسۋدە قول قويىلدى.

مەموراندۋم ەلىمىزدىڭ تازا سپورت قاعيداتتارىنا بەرىك ەكەنىن راستايدى. سونداي-اق تاپسىرمالارىن ىسكە اسىرۋعا باعىتتالعان ماڭىزدى قادامداردىڭ ءبىرى سانالادى.

-ءبىزدىڭ بەلسەندى ىنتىماقتاستىعىمىز وتكەن جىلى استانادا مەملەكەت باسشىسىنىڭ جىلى قابىلداۋىنان باستاۋ الدى دەپ ەسەپتەيمىن. دوپينگكە قارسى زەرتتەۋلەردىڭ دامۋىنا كورسەتكەن قولداۋى ءۇشىن پرەزيدەنت قاسىم-جومارت توقاەۆقا، قازاقستانعا العىسىمدى بىلدىرەمىن. بۇل كەلىسىم قازاقستاننىڭ وڭىردە تازا سپورتتى دامىتۋداعى جەتەكشى ءرولىنىڭ نىعايىپ كەلە جاتقانىن كورسەتەدى، — دەدى ۆيتولد بانكا.

سونىمەن قاتار تاراپتار 2027 جىلى استانادا ۆادا-نىڭ اتقارۋشى كوميتەتى مەن قۇرىلتاي كەڭەسىنىڭ وتىرىستارىن وتكىزۋ مۇمكىندىگىن تالقىلادى.

ەربول مىرزابوسىنوۆ قازاقستاننىڭ ادال باسەكەلەستىك قاعيداتتارىن ۇدايى ۇستاناتىنىن جانە دوپينگكە قارسى ءبىلىم بەرۋ جۇيەسىن بەلسەندى تۇردە دامىتىپ جاتقانىن اتاپ ءوتتى.

-ۆادا-مەن ىنتىماقتاستىق ءبىز ءۇشىن ستراتەگيالىق ماڭىزعا يە. قازاقستاندا تازا سپورت مادەنيەتىن قالىپتاستىرۋعا، حالىقارالىق ستاندارتتاردى نىعايتۋعا جانە الەمدىك وزىق تاجيريبەلەردى ەنگىزۋگە باسىمدىق بەرىلەدى. ەلىمىز دوپينگتىڭ الدىن الۋ جانە ءبىلىم بەرۋ باعىتىنداعى باعدارلامالاردى قولداپ، ولاردى جۇيەلى تۇردە جۇزەگە اسىرىپ كەلەدى، — دەدى مينيستر.

كەزدەسۋ اياسىندا سالالىق ءبىلىم بەرۋ جانە عىلىمي ينفراقۇرىلىمدى دامىتۋ ماسەلەسى دە ەرەكشە نازارعا الىندى. قازاق ۇلتتىق سپورت ۋنيۆەرسيتەتى ماماندار دايارلاۋ مەن تاجىريبە الماسۋدىڭ ءتيىمدى الاڭى رەتىندە قاراستىرىلىپ، قازاقستاننىڭ ورتالىق ازياداعى دوپينگكە قارسى ساياساتتاعى كوشباسشىلىعىن نىعايتاتىن بىلىم بەرۋ حابى رەتىندەگى ءرولىن كۇشەيتۋگە ىقپال ەتەدى.

ەسكە سالا كەتەيىك، وتكەن جىلى مەملەكەت باسشىسى پرەزيدەنت ۆادا ۆيتولد بانكامەن كەزدەسكەن بولاتىن. ول قازاقستانعا العاش كەلگەندەردىڭ ءبىرى ەدى.

كەزدەسۋدە مەملەكەت باسشىسى ۆيتولد بانكانى II دەرەجەلى «دوستىق» وردەنىمەن ماراپاتتادى. بيىلعى مەموراندۋم ەكىجاقتى ىنتىماقتاستىقتىڭ جۇيەلى تۇردە دامىپ كەلە جاتقانىن كورسەتەدى.