Qazaqstan Ortalyq Azııada taza sportty ilgeriletýde negizgi ról atqarady

Týrızm jáne sport mınıstrligi Dúnıejúzilik dopıngke qarsy agenttikpen (VADA) ózara túsinistik týraly memorandýmǵa qol qoıdy, dep habarlady Týrızm jáne sport mınıstrligi.

Rásim Polshanyń Torýn qalasynda ótken jabyq ǵımarattaǵy jeńil atletıkadan álem chempıonaty aıasynda boldy. Qujatqa mınıstr Erbol Myrzabosynov pen  VADA prezıdenti Vıtold Banka arasyndaǵy kezdesýde qol qoıyldy.

Memorandým elimizdiń taza sport qaǵıdattaryna berik ekenin rastaıdy. Sondaı-aq tapsyrmalaryn iske asyrýǵa baǵyttalǵan mańyzdy qadamdardyń biri sanalady.

-Bizdiń belsendi yntymaqtastyǵymyz ótken jyly Astanada memleket basshysynyń jyly qabyldaýynan bastaý aldy dep esepteımin. Dopıngke qarsy zertteýlerdiń damýyna kórsetken qoldaýy úshin prezıdent Qasym-Jomart Toqaevqa, Qazaqstanǵa alǵysymdy bildiremin. Bul kelisim Qazaqstannyń óńirde taza sportty damytýdaǵy jetekshi róliniń nyǵaıyp kele jatqanyn kórsetedi, — dedi Vıtold Banka.

Sonymen qatar taraptar 2027 jyly Astanada VADA-nyń Atqarýshy komıteti men Quryltaı keńesiniń otyrystaryn ótkizý múmkindigin talqylady.

Erbol Myrzabosynov Qazaqstannyń adal básekelestik qaǵıdattaryn udaıy ustanatynyn jáne dopıngke qarsy bilim berý júıesin belsendi túrde damytyp jatqanyn atap ótti.

-VADA-men yntymaqtastyq biz úshin strategııalyq mańyzǵa ıe. Qazaqstanda taza sport mádenıetin qalyptastyrýǵa, halyqaralyq standarttardy nyǵaıtýǵa jáne álemdik ozyq tájırıbelerdi engizýge basymdyq beriledi. Elimiz dopıngtiń aldyn alý jáne bilim berý baǵytyndaǵy baǵdarlamalardy qoldap, olardy júıeli túrde júzege asyryp keledi, — dedi mınıstr.

Kezdesý aıasynda salalyq bilim berý jáne ǵylymı ınfraqurylymdy damytý máselesi de erekshe nazarǵa alyndy. Qazaq ulttyq sport ýnıversıteti mamandar daıarlaý men tájirıbe almasýdyń tıimdi alańy retinde qarastyrylyp, Qazaqstannyń Ortalyq Azııadaǵy dopıngke qarsy saıasattaǵy kóshbasshylyǵyn nyǵaıtatyn bilim berý haby retindegi rólin kúsheıtýge yqpal etedi.

Eske sala keteıik, ótken jyly memleket basshysy prezıdent VADA Vıtold Bankamen kezdesken bolatyn. Ol Qazaqstanǵa alǵash kelgenderdiń biri edi.

Kezdesýde memleket basshysy Vıtold Bankany II derejeli «Dostyq» ordenimen marapattady. Bıylǵy memorandým ekijaqty yntymaqtastyqtyń júıeli túrde damyp kele jatqanyn kórsetedi.