«SARBAZ+» جوباسىنىڭ ساربازدارى حالىقارالىق دودادا باق سىنادى

الماتى قالاسىندا وتكەن دجيۋ-دجيتسۋدان حالىقارالىق «NAURYZ OPEN» اشىق ءتۋرنيرى وتاندىق سپورت پەن اسكەري سالانىڭ تۇيىسكەن تۇسىنداعى تاريحي وقيعاعا اينالدى. العاش رەت حالىقارالىق دەڭگەيدەگى كاسىبي جارىسقا «Sarbaz+» سەرپىندى جوباسى اياسىندا دايىندالعان مەرزىمدى قىزمەتتەگى 9 سارباز قاتىسىپ، جاقسى ناتيجە كورسەتتى.

مەموراندۋم – جەڭىستىڭ رەسمي ىرگەتاسى

بۇل جەتىستىك ساعادات نۇرماعامبەتوۆ اتىنداعى «Sagadat Batyr» سپورت كلۋبى مەن №78460 اسكەري ءبولىمى اراسىنداعى جاسالعان مەموراندۋم اياسىندا مۇمكىن بولدى. وسى قۇجات نەگىزىندە ساربازدار 5 اي بويى اپتاسىنا 3 رەت دجيۋ-دجيتسۋدان قارا بەلبەۋ يەگەرى نۇرسۇلتان ورىنباساروۆ پەن ونىڭ شاكىرتى، قوڭىر بەلبەۋ يەگەرى ناريمان داۋىلباەۆتىڭ جەتەكشىلىگىمەن كاسىبي جاتتىعۋدان وتكەن. مەموراندۋمنىڭ باستى ماقساتى — اسكەر قاتارىنداعى جاستاردىڭ ۋاقىتىن ءتيىمدى پايدالانىپ، ولاردى زاماناۋي سپورتتىق جانە ينتەللەكتۋالدىق داعدىلارعا باۋلۋ.

9 باتىر – 3 مەدال: حالىقارالىق دودانىڭ ناتيجەسى

تۋرنيرگە قازاقستان مەن قىرعىزستاننان 650-دەن استام سپورتشى قاتىستى. «Sarbaz+» جوباسىنىڭ اتىنان سىنعا تۇسكەن 9 ساربازدىڭ ۇشەۋى جۇلدەلى ورىنداردان كورىندى. اتاپ ايتقاندا، الماس ومىرزاقوۆ (94 كگ) التىن مەدالدى جەڭىپ السا، جاقسىلىق نۇربولات (62 كگ) پەن نۇرداۋلەت شاكىر (69 كگ) قولا جۇلدەگە يە بولدى.

سونداي-اق، ايدوس يساەۆ (62 كگ)، جاسۇلان فاحرۋدينوۆ (62 كگ)، باتىرحان شايمۇرات (69 كگ)، ەرنار قىزايبەك (69 كگ)، راحات مۇحامەتقالي (77 كگ) پەن نۇربەك اسقاتوۆ (77 كگ) حالىقارالىق تاتاميدە العاش رەت باق سىناپ، جاقسى  كۇرەستى.

باپكەر پىكىرى: «ناعىز زاماناۋي اسكەر — وسى!»

دجيۋ-دجيتسۋ باپكەرى نۇرسۇلتان ورىنباساروۆ ساربازداردىڭ كورسەتكىشىنە جاقسى باعا بەردى:

-بۇگىنگى ناتيجە — Sagadat Batyr كلۋبى مەن اسكەري ءبولىم اراسىنداعى مەموراندۋمنىڭ ناقتى جەمىسى. 9 ساربازىمىز دا ناعىز جاۋىنگەرلىك مىنەز كورسەتتى. 5 اي بۇرىن عانا دجيۋ-دجيتسۋمەن تانىسقان جىگىتتەردىڭ بۇگىن حالىقارالىق كاسىبي سپورتشىلارمەن يىق تىرەسىپ، 3 مەدال الۋى — ۇلكەن جەتىستىك. شاكىرتىم ناريمان داۋىلباەۆ ەكەۋمىز ساربازداردىڭ الەۋەتىنە سەندىك. بۇل جوبا — مەرزىمدى قىزمەتتەگى اسكەري قىزمەتشىلەردىڭ زاماناۋي مۇمكىندىكتەرىن پاش ەتەتىن ۇلكەن قادام. تەك العا!، — دەدى نۇرسۇلتان ورىنباساروۆ.

«Sarbaz+» — قورعانىس مينيسترلىگىنىڭ قولداۋىمەن جۇزەگە اسىپ جاتقان سەرپىندى جوبا.

باعدارلامانىڭ ماقساتى — مەرزىمدى قىزمەتتەگى ساربازداردى دجيۋ-دجيتسۋ، درون باسقارۋ، اعىلشىن ءتىلى مەن IT داعدىلارىنا باۋلۋ.

ايتا كەتەيىك، تۋرنيرگە قازاقستان مەن قىرعىزستاننان 5 پەن 50 جاس ارالىعىنداعى 650-دەن استام سپورتشى قاتىستى.

نايما نۇرالي،

استانا