«SARBAZ+» jobasynyń sarbazdary halyqaralyq dodada baq synady

Almaty qalasynda ótken djıý-djıtsýdan halyqaralyq «NAURYZ OPEN» ashyq týrnıri otandyq sport pen áskerı salanyń túıisken tusyndaǵy tarıhı oqıǵaǵa aınaldy. Alǵash ret halyqaralyq deńgeıdegi kásibı jarysqa «Sarbaz+» serpindi jobasy aıasynda daıyndalǵan merzimdi qyzmettegi 9 sarbaz qatysyp, jaqsy nátıje kórsetti.

Memorandým – jeńistiń resmı irgetasy

Bul jetistik Saǵadat Nurmaǵambetov atyndaǵy «Sagadat Batyr» sport klýby men №78460 áskerı bólimi arasyndaǵy jasalǵan memorandým aıasynda múmkin boldy. Osy qujat negizinde sarbazdar 5 aı boıy aptasyna 3 ret djıý-djıtsýdan qara belbeý ıegeri Nursultan Orynbasarov pen onyń shákirti, qońyr belbeý ıegeri Narıman Daýylbaevtyń jetekshiligimen kásibı jattyǵýdan ótken. Memorandýmnyń basty maqsaty — ásker qataryndaǵy jastardyń ýaqytyn tıimdi paıdalanyp, olardy zamanaýı sporttyq jáne ıntellektýaldyq daǵdylarǵa baýlý.

9 batyr – 3 medal: Halyqaralyq dodanyń nátıjesi

Týrnırge Qazaqstan men Qyrǵyzstannan 650-den astam sportshy qatysty. «Sarbaz+» jobasynyń atynan synǵa túsken 9 sarbazdyń úsheýi júldeli oryndardan kórindi. Atap aıtqanda, Almas О́mirzaqov (94 kg) altyn medaldi jeńip alsa, Jaqsylyq Nurbolat (62 kg) pen Nurdáýlet Shákir (69 kg) qola júldege ıe boldy.

Sondaı-aq, Aıdos Isaev (62 kg), Jasulan Fahrýdınov (62 kg), Batyrhan Shaımurat (69 kg), Ernar Qyzaıbek (69 kg), Rahat Muhametqalı (77 kg) pen Nurbek Asqatov (77 kg) halyqaralyq tatamıde alǵash ret baq synap, jaqsy  kúresti.

Bapker pikiri: «Naǵyz zamanaýı ásker — osy!»

Djıý-djıtsý bapkeri Nursultan Orynbasarov sarbazdardyń kórsetkishine jaqsy baǵa berdi:

-Búgingi nátıje — Sagadat Batyr klýby men áskerı bólim arasyndaǵy Memorandýmnyń naqty jemisi. 9 sarbazymyz da naǵyz jaýyngerlik minez kórsetti. 5 aı buryn ǵana djıý-djıtsýmen tanysqan jigitterdiń búgin halyqaralyq kásibı sportshylarmen ıyq tiresip, 3 medal alýy — úlken jetistik. Shákirtim Narıman Daýylbaev ekeýmiz sarbazdardyń áleýetine sendik. Bul joba — merzimdi qyzmettegi áskerı qyzmetshilerdiń zamanaýı múmkindikterin pash etetin úlken qadam. Tek alǵa!, — dedi Nursultan Orynbasarov.

«Sarbaz+» — Qorǵanys mınıstrliginiń qoldaýymen júzege asyp jatqan serpindi joba.

Baǵdarlamanyń maqsaty — merzimdi qyzmettegi sarbazdardy djıý-djıtsý, dron basqarý, aǵylshyn tili men IT daǵdylaryna baýlý.

Aıta keteıik, týrnırge Qazaqstan men Qyrǵyzstannan 5 pen 50 jas aralyǵyndaǵy 650-den astam sportshy qatysty.

Naıma NURALI,

ASTANA