جانىبەك ءالىمحان ۇلى «كانەلونى» جەكپە-جەككە شاقىردى

بوكسشى  جانىبەك ءالىمحان ۇلى سۋپەرورتا سالماققا اۋىسقاننان كەيىن وسى سالماقتاعى الەم چەمپيونى (2021—2024، 2024—2025) مەكسيكالىق بىلعارى قولعاپ شەبەرى  ساۋل«كانەلو» الۆارەستى جەكپە-جەككە شاقىردى.

قازاق بوكسشىسى سۋپەرورتا سالماققا (76،2 كەلى) اۋىسقان سوڭ بىردەن دارەجەسى دە ءوسىپ، بۇكىلالەمدىك بوكس ۇيىمىنىڭ (WBO) جاڭارتىلعان رەيتينگىندە (17-0، 12 كو) ەكىنشى ورىنعا شىقتى.

بۇل سالماقتا ونىڭ الدىندا تەك اڭىزعا اينالعان مەكسيكالىق  ساۋل «كانەلو» الۆارەس تۇر.

بۇعان دەيىن كاسىپقوي بوكستىڭ ماڭايىندا جۇرگەن ءتىس قاققان ماماندار جانىبەك الىمحان ۇلىنىڭ جاڭا سالماققا اۋىسۋىنان ءبىر جاڭالىقتىڭ بولاتىنىن ايتقان ەدى.  بىر اۋىز سوزبەن ايتساق، 31 قازاندا ساۋل «كانەلو» الۆارەس پەن WBC چەمپيونى كريستيان مبيلي اراسىندا جەكپە-جەكە بولادى. وسى جەكپە-جەكتە جەڭگەن بوكسشى الداعى ۋاقىتتا جانىبەك الىمحان ۇلىمەن قولعاپ ءتۇيىستىرۋى ابدەن مۇمكىن. سوندىقتان قازاق بوكسشىسى مەكسيكالىق الەم چەمپيونىن جەكپە-جەككە شاقىرىپ وتىرعانى بەكەر ەمەس سەكىلدى. بۇل تۋرالى ول الەۋمەتتىك جەلىدەگى پاراقشاسىندا دا ايتتى.

«كەي جانكۇيەرلەردىڭ كوكەيىندە «جانىبەك «كانەلونى» جەڭە الا ما ەكەن؟»، دەگەن سۇراق بار سياقتى. ەگەر «كانەلو» مەنىمەن شىعۋعا باتىلى جەتسە، جالپاق تىلمەن ايتقاندا ونى شايناماي جۇتامىن! قۇداي تاكاپپارلىقتان ساقتاسىن، سەنىمدى تۇردە ايتايىن، مەن ءوز دەڭگەيىم مەن ونىڭ دەڭگەيىن جاقسى بىلەمىن!

قازاقتار وسال ەمەس! كاسىپقوي بوكستا ءوز ورنى بار ۇلتپىز! تىلەۋلەس جانكۇيەردىڭ بارىنە مىڭ العىس! ءبىز ەندى باسقاشا بولىپ ورالامىز! سۋپەرورتا سالماقتىڭ اعىسىن وزگەرتۋ ءۇشىن كەلدىك!»، — دەدى ول instagram-داعى پاراقشاسىندا.

سونىمەن بىرگە ول «كانەلو» ما، شيراز با؟ قايسىسى باتىل ەكەن، كورەيىك!، دەپ تە ويىن ايتىپتى.

بۇعان دەيىن دە ول «كانەلو» بولسىن، باسقاسى بولسىن، سۋپەرورتا سالماقتا الەم چەمپميونى اتانعىسى كەلەتىنىن جاسىرماي كەلگەن ەدى. ول وسى تۋرالى instagram-داعى پاراقشاسىندا دا جازدى.

«ورتا سالماقتى ءبىراز شۋلاتىپ، ەكى بىردەي الەم چەمپيونى تيتۋلىن يەلەندىك! Qazaq style-دى وسى سالماقتا الەمدىك ارەناعا الىپ شىقتىق. ورتا سالماق بوكسشىلارىنىڭ تۇنگى قورقىنىشى اتاندىق. تالاي قىزىقتار مەن قيىندىقتاردى، قۋانىشتار مەن ساتسىزدىكتەردى دە وسى سالماقتا باستان وتكەردىك! وسى سالماقتا ءانۇران شىرقاتىپ، كوك تۋ جەلبىرەتتىك! جانكۇيەرلەرگە ەستەن كەتپەس ونەر كورسەتىپ، جارقىن نوكاۋتتار سىيلادىق!

ەندى وسى ءىسىمىزدى سۋپەرورتا سالماقتا جالعاستىرامىز! وسى سالماقتا ءبىراز اتاقتى بوكسشىلار بار. مەنىڭ سالماعىمدا بولعاندار قازىر وسى سۋپەرورتا سالماقتا ونەر كورسەتىپ، چەمپيون اتانۋدا. سولاردى ءبىراز قينايىق. بۇل شەشىمدى امەريكاداعى كوماندامىزبەن، پروموۋتەر جانە مەنەدجەرمەن اقىلداسا وتىرىپ، ماقسات قويا قابىلدادىق!

بۇرىننان ايتىپ جۇرەتىنىمىزدەي، ءبىز 3-4 سالماقتىڭ چەمپيونى بولامىز، بۇيىرتسا!

ال، جانكۇيەرلەر! سۋپەرورتا سالماققا قوش كەلدىك!»، دەدى ول.

جانىبەك ءالىمحان ۇلى كاسىپقوي بوكستا ورتا سالماقتا (72،574 كگ) ونەر كورسەتكەن بوكسشى. قازاقستاننىڭ ەڭبەك سىڭىرگەن سپورت شەبەرى، اۋەسقوي بوكستا 2016 جىلى وليمپيادا قاتىسقان. 2013 جىلى الەم چەمپيونى، 2013-2014 جىلدارى ازيا چەمپيونى اتانعان. ححالىقارالىق دارەجەدەگى سپورت شەبەرى. كاسىپقوي بوكستا ورتا سالماقتاعى WBO Global (2012-2020 جج.)، WBC Continental Americas (2019) چەمپيونى، WBO (2022) جانە IBF (2023) تۇجىرىمدارى بويىنشا الەم چەمپيونى.

داستان كەنجالين