Jánibek Álimhanuly «Kanelony» jekpe-jekke shaqyrdy

Boksshy  Jánibek Álimhanuly sýperorta salmaqqa aýysqannan keıin osy salmaqtaǵy álem chempıony (2021—2024, 2024—2025) meksıkalyq bylǵary qolǵap sheberi  Saýl«Kanelo» Alvaresti jekpe-jekke shaqyrdy.

Qazaq boksshysy sýperorta salmaqqa (76,2 keli) aýysqan soń birden dárejesi de ósip, Búkilálemdik boks uıymynyń (WBO) jańartylǵan reıtınginde (17-0, 12 KO) ekinshi orynǵa shyqty.

Bul salmaqta onyń aldynda tek ańyzǵa aınalǵan meksıkalyq  Saýl «Kanelo» Alvares tur.

Buǵan deıin kásipqoı bokstyń mańaıynda júrgen tis qaqqan mamandar Jánibek Álimhanulynyń jańa salmaqqa aýysýynan bir jańalyqtyń bolatynyn aıtqan edi.  Bir aýyz sózben aıtsaq, 31 qazanda Saýl «Kanelo» Alvares pen WBC chempıony Krıstıan Mbılı arasynda jekpe-jeke bolady. Osy jekpe-jekte jeńgen boksshy aldaǵy ýaqytta Jánibek Álimhanulymen qolǵap túıistirýi ábden múmkin. Sondyqtan qazaq boksshysy meksıkalyq álem chempıonyn jekpe-jekke shaqyryp otyrǵany beker emes sekildi. Bul týraly ol áleýmettik jelidegi paraqshasynda da aıtty.

«Keı jankúıerlerdiń kókeıinde «Jánibek «Kanelony» jeńe ala ma eken?», degen suraq bar sııaqty. Eger «Kanelo» menimen shyǵýǵa batyly jetse, jalpaq tilmen aıtqanda ony shaınamaı jutamyn! Qudaı tákapparlyqtan saqtasyn, senimdi túrde aıtaıyn, men óz deńgeıim men onyń deńgeıin jaqsy bilemin!

Qazaqtar osal emes! Kásipqoı boksta óz orny bar ultpyz! Tileýles jankúıerdiń bárine myń alǵys! Biz endi basqasha bolyp oralamyz! Sýperorta salmaqtyń aǵysyn ózgertý úshin keldik!», — dedi ol instagram-daǵy paraqshasynda.

Sonymen birge ol «Kanelo» ma, Shıraz ba? Qaısysy batyl eken, kóreıik!, dep te oıyn aıtypty.

Buǵan deıin de ol «Kanelo» bolsyn, basqasy bolsyn, sýperorta salmaqta álem chempmıony atanǵysy keletinin jasyrmaı kelgen edi. Ol osy týraly instagram-daǵy paraqshasynda da jazdy.

«Orta salmaqty biraz shýlatyp, eki birdeı álem chempıony tıtýlyn ıelendik! Qazaq style-dy osy salmaqta álemdik arenaǵa alyp shyqtyq. Orta salmaq boksshylarynyń túngi qorqynyshy atandyq. Talaı qyzyqtar men qıyndyqtardy, qýanyshtar men sátsizdikterdi de osy salmaqta bastan ótkerdik! Osy salmaqta ánuran shyrqatyp, kók tý jelbirettik! Jankúıerlerge esten ketpes óner kórsetip, jarqyn nokaýttar syıladyq!

Endi osy isimizdi sýperorta salmaqta jalǵastyramyz! Osy salmaqta biraz ataqty boksshylar bar. Meniń salmaǵymda bolǵandar qazir osy sýperorta salmaqta óner kórsetip, chempıon atanýda. Solardy biraz qınaıyq. Bul sheshimdi amerıkadaǵy komandamyzben, promoýter jáne menedjermen aqyldasa otyryp, maqsat qoıa qabyldadyq!

Burynnan aıtyp júretinimizdeı, biz 3-4 salmaqtyń chempıony bolamyz, buıyrtsa!

Al, jankúıerler! Sýperorta salmaqqa qosh keldik!», dedi ol.

Jánibek Álimhanuly kásipqoı boksta orta salmaqta (72,574 kg) óner kórsetken boksshy. Qazaqstannyń eńbek sińirgen sport sheberi, áýesqoı boksta 2016 jyly Olımpıada qatysqan. 2013 jyly álem chempıony, 2013-2014 jyldary Azııa chempıony atanǵan. Hhalyqaralyq dárejedegi sport sheberi. Kásipqoı boksta orta salmaqtaǵy WBO Global (2012-2020 jj.), WBC Continental Americas (2019) chempıony, WBO (2022) jáne IBF (2023) tujyrymdary boıynsha álem chempıony.

Dastan KENJALIN