ايبەك ايتبەكوۆ: امەريكاعا الەم چەمپيونى اتانۋ ءۇشىن عانا باردىم

بۇگىن تاڭعا سالىم اتلانت مۇحيتىنىڭ ار جاعىنان قازاق دالاسىنا قۋانىشتى حابار كەلىپ جەتتى.

كۇرەس تۇرلەرىنەن اقش-تىڭ لاس-ۆەگاس قالاسىندا جالاۋى جەلبىرەگەن 23 جاسقا دەيىنگى الەم چەمپيوناتىندا گرەك-ريم كۇرەسىنەن قازاقستان قۇراماسى ەكى التىن مەدال جەڭىپ الدى. ونىڭ بىرەۋىن 72 كەلى  سالماقتاعى يۋسۋف اشراپوۆ، ەكىنشىسىن 60 كگ-دە كۇرەسكەن ايبەك ايتبەكوۆ يەلەندى.

يۋسۋف جامبىل وبلىسىنىڭ، ال ايبەك اباي وبلىسى اياگوز اۋدانىنىڭ تۋماسى. قازىر ايبەك استانادا تۇرادى. وسى ورايدا 60 كەلى سالماقتا توپ جارعان بالۋانمەن الەۋمەتتىك جەلىدە از-كەم اڭگىمەلەسۋدىڭ ءساتى ءتۇسىپ ەدى.  ەدەل-جەدەل اڭگىمەدە ول بىردەن الەم چەمپيونى اتانعان ساتتەگى قۋانىشىن سوزبەن جەتكىزۋ قيىن ەكەنىن، قازىر تولقىپ، تەبىرەنىپ تۇرعانىن، وسى التىن مەدال ءۇشىن ۇزاق دايىندالعانىن ايتتى.

«مەن ءۇشىن بۇل ەرەكشە ءسات. وسى جارىسقا ۇزاق ۋاقىت دايىندالدىق. كوپ ەڭبەك ەتتىك. اۋەلى الماتى وبلىسىنداعى تاۋسامالدا وقۋ-جاتتىعۋ جيىنىن وتكىزدىك. ودان كەيىن الماتى قالاسىندا دايىندىقتى جالعاستىردىق. ال سوڭعى وقۋ-جاتتىعۋ جيىنى امەريكا قۇراما شتاتتارىندا بولدى. وسى ۋاقىتتا جارىسقا بارىنشا دايىندالۋعا كۇش سالدىق. سول ەڭبەگىمىزدىڭ ناتيجەسىن كورگەنىمە قۋانىشتىمىن»، دەدى ول.

سونىمەن بىرگە ول ەل نامىسىن قورعاپ، الەم چەمپيونى اتانۋ ءوزى ءۇشىن ۇلكەن مارتەبە ەكەنىن، وسى جەتىستىككە جەتۋىنە ۇلەس قوسقان جاتتىقتىرۋشىلارىنا، جاقىندارىنا، قولداۋ بىلدىرگەن بارشا ازاماتقا العىس سەزىمىن جەتكىزدى.

«الەم چەمپيوناتىنا جەر-ءجۇزىنىڭ ەڭ مىقتى بالۋاندارى كەلەدى. سوندىقتان قارسىلاستارىمنىڭ ەشقايسىسىن وسال دەپ ايتا المايمىن. بارلىعى دا جارىسقا ۇلكەن دايىندىقپەن كەلگەن. ءار بالۋاننىڭ وزىندىك كۇرەس مانەرى مەن ەرەكشەلىگى بار. سول سەبەپتى ءار بەلدەسۋ وزىنشە قيىن بولدى. بارلىق قارسىلاسىما بىردەي جاۋاپكەرشىلىكپەن قاراپ، ءار بەلدەسۋدە جەڭىسكە جەتۋگە تىرىستىم»، دەدى بالۋان.

بۇل جارىستا ايبەك ايتبەكوۆ بەس رەت كىلەمگە شىقتى. العاشقى اينالىمدا U23 ساناتىندا ەۋروپا چەمپيوناتىنىڭ ءفيناليسى گيورگي كوچاليدزەنى (گرۋزيا)، 8/1 فينالدا U23 ساناتىندا ەكى دۇركىن ەۋروپا چەمپيونى، 2025 جىلعى U23 الەم چەمپيوناتىنىڭ ءفيناليسى الىبەك ءامىروۆتى (رەسەي)، شيرەك فينالدا سەيما توكۋحارانى (جاپونيا)، جارتىلاي فينالدا U17 ساناتىندا الەم جانە ەۋروپا چەمپيونى ەۆگەني پوكوۆبانى (ۋكراينا)، ال فينالدا بىلتىرعى U23 ساناتىنداعى الەم چەمپيوناتىندا 55 كەلىدە توپ جارعان ەلمير اليەۆتى (ازەربايجان) جەڭدى.

بالۋاننىڭ ايتۋىنشا، بۇل دوداعا ول الەم چەمپيونىاتانۋ ءۇشىن عانا بارعان. سول ماقساتىنا جەتۋ ءۇشىن تىڭعىلىقتى دايىندالعان.

«مەن ءار بەلدەسۋگە ەرەكشە ءمان بەردىم. سەبەبى، قاعاز جۇزىندە فاۆوريت بولعانىڭمەن، كىلەم ۇستىندە مىقتى ەكەنىڭدى دالەلدەۋگە ءتيىسسىڭ. ءار بەلدەسۋدە كۇتپەگەن جاعدايلار بولۋى مۇمكىن. سوندىقتان چەمپيوناتقا جاڭا ايتقانىمداي، كوپ جاتتىعىپ، دايىندالدىم. شىنىن ايتقاندا امەريكاعا تەك الەم چەمپيونى اتانۋ ءۇشىن عانا باردىم. قازىر ءبىزدىڭ 60 كەلى سالماقتا باسەكەلەستىك وتە كۇشتى. وسى سالماقتا ەرەسەكتەر اراسىندا الەم چەمپيونى اتانعان ايدوس سۇلتانعالي دا كۇرەسەدى»، دەدى سپورتشى.

وسى تۋرالى ايبەكتەن سۇراعانىمىزدا، ول:

«قازاقستان چەمپيوناتى مەن قازاقستان كۋبوگىندە ۇنەمى ايدوس سۇلتانعالي اعامىزبەن جانە باسقا دا مىقتى بالۋاندارمەن بەلدەسىپ جۇرەمىز. باسەكەلەستىك دەڭگەيدى وسىرەدى. سونىڭ ارقاسىندا شىعار، دەڭگەيىمىز ءوسىپ كەلەدى. جاتتىقتىرۋشىلارىمىز دا ءاردايىم جانىمىزدان تابىلىپ، اقىل-كەڭەسىن ايتادى. جانىڭدا جاناشىر ادام بولسا اقىلىڭ ايامايدى عوي»، دەدى ول.

جاقىن ارادا استانادا كۇرەس تۇرلەرىنەن الەم چەمپيوناتىنىڭ جالاۋى جەلبىرەيدى. بۇل ءدۇبىلى دوداعا الەمنىڭ كىلەڭ مىقتى بالۋاندارى جينالادى. ايبەكتىڭ ايتۋىنشا، بۇل سىنعا ول قاتىسپايدى. جاتتىقتىرۋشىلار شتابىنىڭ شەشىمىمەن بالۋان U23 ساناتىنداعى الەم چەمپيوناتىنا دايىندالدى. سول سەنىمدى، سول ءۇمىتتى ايبەك بالۋان ارتىعىمەن ورىنداپ شىقتى. ول 23 جاسقا دەيىنگى سپورتشىلار اراسىندا وتەتىن الەم چەمپوناتىن سۇلتان اسەت ۇلىنان كەيىن جەڭىپ الىپ، قۇرمەت تۇعىرىنىڭ ەڭ بيىك ساتىسىنا كوتەرىلدى. ال سۇلتان اسەت ۇلى 2023 جىلى تۇڭعىش رەت الەمدىك دودانىڭ ءتاجىن باسىنا ولشەپ كورگەن ەدى.

بۇگىن 23 جاسقا دەيىنگى سپورتشىلار اراسىنداعى الەم چەمپيوناتىندا قازاقستاننىڭ گرەك-ريم كۇرەسى قۇراماسىنىڭ تاريحي ناتيجەگە جەتىپ، ايبەك ايتبەكوۆ پەن يۋسۋف اشراپوۆتىڭ التىن مەدالدى جەڭىپ العانىن حابارلاعان ەدىك.

داستان كەنجالين،

استانا

كىلەمگە بارا جاتقان ءسات

«التىن مەدالدىڭ سالماعى قاشاندا اۋىر». فوتودا الەم چەمپيوندارى ايبەك ايتبەكوۆ پەن يۋسۋف اشراپوۆ