Aıbek Aıtbekov: Amerıkaǵa álem chempıony ataný úshin ǵana bardym

Búgin tańǵa salym Atlant muhıtynyń ar jaǵynan qazaq dalasyna qýanyshty habar kelip jetti.

Kúres túrlerinen AQSh-tyń Las-Vegas qalasynda jalaýy jelbiregen 23 jasqa deıingi álem chempıonatynda grek-rım kúresinen Qazaqstan quramasy eki altyn medal jeńip aldy. Onyń bireýin 72 keli  salmaqtaǵy Iýsýf Ashrapov, ekinshisin 60 kg-de kúresken Aıbek Aıtbekov ıelendi.

Iýsýf Jambyl oblysynyń, al Aıbek Abaı oblysy Aıagóz aýdanynyń týmasy. Qazir Aıbek Astanada turady. Osy oraıda 60 keli salmaqta top jarǵan balýanmen áleýmettik jelide az-kem áńgimelesýdiń sáti túsip edi.  Edel-jedel áńgimede ol birden álem chempıony atanǵan sáttegi qýanyshyn sózben jetkizý qıyn ekenin, qazir tolqyp, tebirenip turǵanyn, osy altyn medal úshin uzaq daıyndalǵanyn aıtty.

«Men úshin bul erekshe sát. Osy jarysqa uzaq ýaqyt daıyndaldyq. Kóp eńbek ettik. Áýeli Almaty oblysyndaǵy Taýsamalda oqý-jattyǵý jıynyn ótkizdik. Odan keıin Almaty qalasynda daıyndyqty jalǵastyrdyq. Al sońǵy oqý-jattyǵý jıyny Amerıka Qurama Shtattarynda boldy. Osy ýaqytta jarysqa barynsha daıyndalýǵa kúsh saldyq. Sol eńbegimizdiń nátıjesin kórgenime qýanyshtymyn», dedi ol.

Sonymen birge ol el namysyn qorǵap, álem chempıony ataný ózi úshin úlken mártebe ekenin, osy jetistikke jetýine úles qosqan jattyqtyrýshylaryna, jaqyndaryna, qoldaý bildirgen barsha azamatqa alǵys sezimin jetkizdi.

«Álem chempıonatyna jer-júziniń eń myqty balýandary keledi. Sondyqtan qarsylastarymnyń eshqaısysyn osal dep aıta almaımyn. Barlyǵy da jarysqa úlken daıyndyqpen kelgen. Ár balýannyń ózindik kúres máneri men ereksheligi bar. Sol sebepti ár beldesý ózinshe qıyn boldy. Barlyq qarsylasyma birdeı jaýapkershilikpen qarap, ár beldesýde jeńiske jetýge tyrystym», dedi balýan.

Bul jarysta Aıbek Aıtbekov bes ret kilemge shyqty. Alǵashqy aınalymda U23 sanatynda Eýropa chempıonatynyń fınalısi Gıorgı Kochalıdzeni (Grýzııa), 8/1 fınalda U23 sanatynda eki dúrkin Eýropa chempıony, 2025 jylǵy U23 álem chempıonatynyń fınalısi Álibek Ámirovty (Reseı), shırek fınalda Seıma Tokýharany (Japonııa), jartylaı fınalda U17 sanatynda álem jáne Eýropa chempıony Evgenıı Pokovbany (Ýkraına), al fınalda byltyrǵy U23 sanatyndaǵy álem chempıonatynda 55 kelide top jarǵan Elmır Alıevti (Ázerbaıjan) jeńdi.

Balýannyń aıtýynsha, bul dodaǵa ol álem chempıonyataný úshin ǵana barǵan. Sol maqsatyna jetý úshin tyńǵylyqty daıyndalǵan.

«Men ár beldesýge erekshe mán berdim. Sebebi, qaǵaz júzinde favorıt bolǵanyńmen, kilem ústinde myqty ekenińdi dáleldeýge tıissiń. Ár beldesýde kútpegen jaǵdaılar bolýy múmkin. Sondyqtan chempıonatqa jańa aıtqanymdaı, kóp jattyǵyp, daıyndaldym. Shynyn aıtqanda Amerıkaǵa tek álem chempıony ataný úshin ǵana bardym. Qazir bizdiń 60 keli salmaqta básekelestik óte kúshti. Osy salmaqta eresekter arasynda álem chempıony atanǵan Aıdos Sultanǵalı da kúresedi», dedi sportshy.

Osy týraly Aıbekten suraǵanymyzda, ol:

«Qazaqstan chempıonaty men Qazaqstan kýboginde únemi Aıdos Sultanǵalı aǵamyzben jáne basqa da myqty balýandarmen beldesip júremiz. Básekelestik deńgeıdi ósiredi. Sonyń arqasynda shyǵar, deńgeıimiz ósip keledi. Jattyqtyrýshylarymyz da árdaıym janymyzdan tabylyp, aqyl-keńesin aıtady. Janyńda janashyr adam bolsa aqylyń aıamaıdy ǵoı», dedi ol.

Jaqyn arada Astanada kúres túrlerinen álem chempıonatynyń jalaýy jelbireıdi. Bul dúbili dodaǵa álemniń kileń myqty balýandary jınalady. Aıbektiń aıtýynsha, bul synǵa ol qatyspaıdy. Jattyqtyrýshylar shtabynyń sheshimimen balýan U23 sanatyndaǵy álem chempıonatyna daıyndaldy. Sol senimdi, sol úmitti Aıbek balýan artyǵymen oryndap shyqty. Ol 23 jasqa deıingi sportshylar arasynda ótetin álem chemponatyn Sultan Ásetulynan keıin jeńip alyp, qurmet tuǵyrynyń eń bıik satysyna kóterildi. Al Sultan Ásetuly 2023 jyly tuńǵysh ret álemdik dodanyń tájin basyna ólshep kórgen edi.

Búgin 23 jasqa deıingi sportshylar arasyndaǵy álem chempıonatynda Qazaqstannyń grek-rım kúresi quramasynyń tarıhı nátıjege jetip, Aıbek Aıtbekov pen Iýsýf Ashrapovtyń altyn medaldi jeńip alǵanyn habarlaǵan edik.

Dastan KENJALIN,

ASTANA

Kilemge bara jatqan sát

«Altyn medaldiń salmaǵy qashanda aýyr». Fotoda álem chempıondary Aıbek Aıtbekov pen Iýsýf Ashrapov