استانادا جۇزۋدەن الەم كۋبوگىنىڭ كەزەڭى باستالدى

بۇگىن استانادا العاش رەت جۇزۋدەن وتەتىن World Aquatics – Astana 2026 الەم كۋبوگىنىڭ كەزەڭى باستالادى، دەپ حابارلايدى Egemen.kz.

بۇل جارىسقا الەمنىڭ تۇكپىر-تۇكپىرىنەن 40-جۋىق ەلدەن 300-دەن استام سپورتشى قاتىسادى. ولاردىڭ قاتارىندا وليمپيادا چەمپيوندارى مەن قازىرگى رەكورد يەلەرى دە بار.

جارىس باكۋ، تاشكەنت پەن استانا قالالارىن بىرىكتىرەتىن Silk Road حالىقارالىق سەرياسىنىڭ قورىتىندى كەزەڭى بولادى.

الەم كۋبوگى World Aquatics ۇيىمىنىڭ رەسمي كۇنتىزبەسىنە ەنگىزىلگەن. ول «بارىس ارەناداعى» 25 مەترلىك باسسەيندە وتكىزىلەدى.

قولدا بار مالىمەتكە قاراعاندا، دوداعا شەتەلدەن 226 قاتىسۋشى تىركەلگەن. ولاردىڭ اراسىندا اقش، قىتاي، كانادا، اۋستراليا، جاپونيا، يتاليا، ۇلىبريتانيا، نيدەرلاند جانە وزگە دە مەملەكەتتەردىڭ وكىلدەرى بار. جارىس باعدارلاماسىنا ەركىن ستيل، براسس، باتتەرفلياي جانرە شالقالاپ جۇزۋدەن 50، 100 جانە 200 مەترلىك قاشىقتىقتار ەنگىزىلگەن. سونىمەن قاتار سپورتشىلار 100 جانە 200 مەترگە كەشەندى ءجۇزۋ مەن ەستافەتالىق سايىستاردا باق سىنايدى.

قازاقستان قۇراماسىنىڭ نامىسىن 22 ساڭلاق قورعايدى. ەرلەر مەن ايەلدەر 17 سايىس ءتۇرى بويىنشا جۇلدەگە تالاسادى.

الەم كۋبوگىنىڭ سالتاناتتى اشىلۋ ءراسىمى بۇگىن ساعات 17:30-دا «بارىس ارەنادا» وتەدى.

ەرتەڭ سپورتشىلار تاڭعى جانە كەشكى سەسسيالاردا سىنعا تۇسسە، 17 قازاندا شەشۋشى باسەكەلەر بولىپ، جەڭىمپازدار مەن جۇلدەگەرلەر ماراپاتتالادى. وليمپيادا چەمپيونى دميتري ءبالانديننىڭ ايتۋىنشا، الەم كۋبوگى كەزەڭىنىڭ ەلىمىزدە ءوتۋى ءجۇزۋ سپورتىنىڭ دامۋىنا تىڭ سەرپىن بەرەدى.

داستان كەنجالين،

استانا