Astanada júzýden álem kýbogynyń kezeńi bastaldy

Búgin Astanada alǵash ret júzýden ótetin World Aquatics – Astana 2026 álem kýbogynyń kezeńi bastalady, dep habarlaıdy Egemen.kz.

Bul jarysqa álemniń túkpir-túkpirinen 40-jýyq elden 300-den astam sportshy qatysady. Olardyń qatarynda Olımpıada chempıondary men qazirgi rekord ıeleri de bar.

Jarys Baký, Tashkent pen Astana qalalaryn biriktiretin Silk Road halyqaralyq serııasynyń qorytyndy kezeńi bolady.

Álem kýbogy World Aquatics uıymynyń resmı kúntizbesine engizilgen. Ol «Barys Arenadaǵy» 25 metrlik basseınde ótkiziledi.

Qolda bar málimetke qaraǵanda, dodaǵa shetelden 226 qatysýshy tirkelgen. Olardyń arasynda AQSh, Qytaı, Kanada, Aýstralııa, Japonııa, Italııa, Ulybrıtanııa, Nıderland jáne ózge de memleketterdiń ókilderi bar. Jarys baǵdarlamasyna erkin stıl, brass, batterflıaı jánre shalqalap júzýden 50, 100 jáne 200 metrlik qashyqtyqtar engizilgen. Sonymen qatar sportshylar 100 jáne 200 metrge keshendi júzý men estafetalyq saıystarda baq synaıdy.

Qazaqstan quramasynyń namysyn 22 sańlaq qorǵaıdy. Erler men áıelder 17 saıys túri boıynsha júldege talasady.

Álem kýbogynyń saltanatty ashylý rásimi búgin saǵat 17:30-da «Barys Arenada» ótedi.

Erteń sportshylar tańǵy jáne keshki sessııalarda synǵa tússe, 17 qazanda sheshýshi básekeler bolyp, jeńimpazdar men júldegerler marapattalady. Olımpıada chempıony Dmıtrıı Balandınniń aıtýynsha, álem kýbogy kezeńiniń elimizde ótýi júzý sportynyń damýyna tyń serpin beredi.

Dastan KENJALIN,

ASTANA