بۇگىن ءى الەم چەمپيوناتى باستالادى

«التىن جەبە» الەم چەمپيوناتىنا قاتىساتىن سپورتشىلار  «Nur-Sultan ethno fest»  مەرەكەسى وتەتىن ەتنو-قالاشىقتا سوڭعى دايارلىق-جاتتىعۋلارىن جاسادى، دەپ حابارلادى ۇلتتىق سپورت قاۋىمداستىعى.

كەشە دۇنيەجۇزى مەرگەندەرى ەرتەڭگى باسەكەدە جارىس جولىنا شىعۋ رەتى بويىنشا ەتنو-قالاشىقتىڭ ۇلكەن ساحناسىنا جەرەبە تارتۋعا جينالدى.  جارىس جەرەبەسىن تارتۋدىڭ سالتاناتتى  راسىمىنە مادەنيەت جانە سپورت مينيسترلىگى دەنەشىنىقتىرۋ جانە سپورت كوميتەتىنىڭ توراعاسى سەرىك ساپيەۆ پەن ۇلتتىق سپورت قاۋىمداستىعىنىڭ اتقارۋشى ديرەكتورى راحات جاقسىباي قاتىسىپ، سپورتشىلارعا ساتتىلىك تىلەپ، ات ۇستىنەن ساداق اتۋدان ءى الەم چەمپيوناتىن اشىق دەپ جاريالادى.

سونداي-اق، دەنەشىنىقتىرۋ جانە سپورت كوميتەتىنىڭ توراعاسى سەرىك ساپيەۆ «Nur-Sultan ethno fest»  مەرەكەسى اياسىندا ءوتىپ جاتقان ءداستۇرلى ساداق اتۋدان رەسپۋبليكالىق تۋرنيرگە قاتىسۋشى سپورتشىلاردىڭ جاتتىعۋ-دايىندىق شاراسىنا بارىپ، ۇلتتىق ساداقپەن نىسانا اتىپ كوردى.

«التىن جەبە» ءى الەم چەمپيوناتىندا 12 مەملەكەتتىڭ 24 مەرگەنى باق سىنايدى.