كوڭىل كوڭىلدەن سۋ ىشەدى

بۇگىن قازاقستان فۋتبول فەدەراتسياسىنىڭ ۇيىمداستىرۋىمەن اۋىر دەرتكە شالدىعىپ، ەمدەلىپ جاتقان بەلگىلى ارىپتەسىمىز گالينا پولەۆايانى قولداۋ ءۇشىن سپورت ارداگەرلەرى مەن جۋرناليستەردىڭ اراسىندا قايىرىمدىلىق ماتچ بولدى.

كەزدەسۋ اتالعان ۇيىمنىڭ جاڭادان سالىنعان عاجاپ عيماراتىنىڭ الاڭىندا ءوتتى.

ارىپتەسىمىز گالينا پولەۆايا ۇزاق جىلدار «قازاقستان» جانە «حابار» تەلەارناسىندا جۇمىس ىستەگەن. ول الدىمەن ۇلكەن جۇرەكتى ادام. كەزىندە كوركەم گيمناستيكامەن اينالىسىپ، سپورت شەبەرى اتانعان. تەلەۆيدەنيەدە جۇرگەندە ونىڭ كوپ ادامعا شاراپاتى تيگەنىن دە بىلەمىز. ال قازىر ول ءوزى كومەككە ءزارۋ بولىپ وتىرعاندا قول ۇشىمىزدى سوزساق ازاماتتىق تانىتقانىمىز دەپ بىلەمىن.

وسى رەتتە قازاقستان فۋتبول فەدەراتسياسىنا العىسىمىزدى بىلدىرەمىز. گالينانىڭ قىزى اناستاسيا دا اناسىنىڭ اياققا تۇرۋىنا قولدا بار مۇمكىندىكتىڭ ءبارىن جاساپ جاتىر.

بۇگىن ويىن باستالار الدىندا ارىپتەسىمىز: «يا حوچۋ جيت. يا ليۋبليۋ جيزن»، دەدى. جۇرەك شىمىرلاپ كەتتى. ولاي دەيتىنىم، بۇگىن اكەمنىڭ قازاسىنا ەكى جىل بولدى. سوعان قاراپ بارلىق ادامعا دەنساۋلىق، ۇزاق ءومىر عانا تىلەيدى ەكەنسىڭ. دەنىڭىز ساۋ بولسىن، عۇمىرلى بولىڭىز گالينا پاۆلوۆنا.

داستان كەنجالين