SportPress.kz Qazaqstan sport jańalyqtary
Serik Adambolsynuly Túkeev! Qazaq sportynyń tarıhynda qazaq kúresin alǵash ret Eýropa men Azııany aıtpaǵanda, Afrıka elderine, Brazılııa men Úndistanǵa jetkizgen, 7 márte eresekter arasyndaǵy álem chempıonatyn, 11 Azııa birinshiligin, 3 álem kýbogyn ózi bas bolyp uıymdastyrǵan naǵyz ultjandy azamat! Bul kisi osy eńbegimen ultymyzdyń sporttyq tarıhynda qaldy.
Kezinde Serik Túkeev qazaq kúresinen alǵashqy álem chempıonatyn uıymdastyrýǵa kiriskende onyń bul tirligine kúle qaraǵandar boldy. Ol kezde ulttyq kúresimizden Afrıka chempıonaty ótedi dese, biz de senbegen bolar edik. Al Serik aǵa eshnársege qaramaı, qysyr sózdi elemeı, tek alǵa umtylýmen boldy. Sondaı jankeshti eńbektiń arqasynda qazaq kúresiniń dúmpýi tórt qurylyqqa erkin jetti.
2017 jyly kúzde Ashhabadta bolǵan jabyq Azııa oıyndarynyń baǵdarlamasynda qazaq kúresinen beldesýler ótti. Shynyn aıtý kerek, ulttyq kúresimizdiń Azııa oıyndaryna enýine Serik Túkeevtiń sińirgen eńbegi erekshe boldy. Bizdiń kúrestiń Eýropa men Amerıka oıyndarynyń baǵdarlamasyna kirýiniń ózi Túkeev bastaǵan jigitter men qyzdardyń talaı jylǵy mańdaı teriniń jemisi ekeni anyq. Eger alashtyń myqty azamattary Serik Adambolsynuly tárizdi bir-bir ulttyq murany qaıyspaı osyndaı dárejege kóterýge jarasa, bizdiń ulttyq mádenıetimizdiń órisi qazirgiden áldeqaıda keń bolar edi.
Búgin aǵamyz 62 jasqa tolyp otyr. Serik aǵa, mártebeli belesińiz qutty ári baıandy bolsyn! Basyńyzǵa túsken synaqtardan aman-esen ótip, alty alashtyń abyroıly aqsaqaly bolýyńyzǵa shyn júrekten tilektespiz!
Qydyrbek RYSBEK
