SportPress.kz Қазақстан спорт жаңалықтары
Елімізде тұңғыш рет каратэ-додан Азия чемпионаты өтеді. Дода 10-17 шілде күндері Астанада жалауын желбіретпек, деп хабарлайды ҚазАқпарат ҚР каратэ-до федерациясының баспасөз қызметіне сілтеме жасап.
Елімізде тұңғыш рет өткелі тұрған біріншілікке байланысты кеше ұйымдастыру комитетінің отырысы өтті.
Жиын барысында беделді бәсекені жоғары деңгейде өткізуге қатысты бірнеше мәселе талқыланды. Жарысқа 30 елден 800-ден аса қонақ келеді. ЭКСПО халықаралық көрмесі аясында өтетін біріншілікке қатысушылар 9 шілдеден бастап келеді. 10-13 шілде аралығында жасөсіпірімдер арасында жүлделер сарапқа салынса, 14-17 шілдеде Астана татамиіне ересектер шығады. Сонымен қатар, осы күндері елордамызда төрешілер семинары өтеді. Халықаралық емтиханды 200-ден аса маман тапсырады.
Каратэ-додан Азия чемпионатының ашылу салатанатына дайындық қазірден басталып кетті. Салтанатты шарада еліміздің тарихы, мәдениеті таныстырылатыны және оған белгілі композитор Еркеш Шакеев атсалысатыны белгілі болды. Оған қоса жиында қонақтардың қауіпсіздгі, виза мәселесі талқыланып, Азия чемпионатының медаль үлгісі бекітілді.
Ұйымдастыру комитетінің отырысына қатысқан «Қазатомпром» ҰАК» АҚ төрағасы Асқар Жұмағалиев, ҚР Бас прокурорының орынбасары Марат Ахметжанов, Астана қаласы әкімінің орынбасары Ермек Аманшаев, ҚР мәдениет және спорт вице-министрі Сәкен Мұсайбеков, «Қазақстан» телеарадиокорпорациясының төрағасы Ерлан Қарин Азия чемпионатына жан-жақты қолдау көрсетіп, жарыстың жоғары деңгейде өтуіне ықпал ететіндерін жеткізді.
