مەن كورگەن مەككە

«ادامنىڭ ايتقانى ەمەس، اللانىڭ ايتقانى بولادى»، دەگەن ءسوز — راس ءسوز. بۇعان كۇن سايىن كوز جەتكىزىپ كەلەمىز. اللانىڭ قۇدىرەتىندە شەك جوق قوي. «وسى پەندەمدى مىنا ەلگە اپارامىن، شاقىرامىن»، دەسە ادامدى ءوزىنىڭ بۇيرىعىمەن كەز كەلگەن ەلگە، جەرگە اپارا الادى.

ساۋد ارابياسىنا ساپارىم جاراتۋشىنىڭ وسىنداي بۇيرىعىنان عانا مۇمكىن بولدى. قازىر جيددا قالاسىنىڭ قوناق ۇيىندە وسى جولداردى جازا وتىرىپ، قۇدايعا مەنى مەككەگە اپارعانىنا، كىشى قاجىلىق پارىزدى وتەۋگە جاعداي جاساعانىنا تاعى دا ماداق ايتامىن. وسى ماداقتى قاعبانى جەتى رەت اينالعاندا قايتالاپ ايتىپ شىققانمىن. سول جەردە «اللادان باسقا قۇداي جوق، مۇحاممەد ونىڭ ەلشىسى» دەپ جۇزدەگەن، مىڭداعان ادام دا ايتتى.

ەكىنشىدەن، ازيا سپورت ءباسپاسوزى قاۋىمداستىعىنا وسى ساپاردى ۇيىمداستىرعانى ءۇشىن العىس ايتامىن. ۇشىنشىدەن، قازاقستاننىڭ جيددا قالاسىنداعى باس كونسۋلدىعىنا دا العىسىم شەكسىز. كەشەدەن بەرى باس كونسۋل تالعات شالدانبايدىڭ كومەكشىسى ديار اسقاروۆ دەگەن جاپ-جاقسى ازامات اۋەجايدان كۇتىپ الىپ، اۋدارماشى مەن جول كورسەتۋشى قىزمەتىن كورسەتىپ كەلەدى. اللا ولارعا قىزمەتتەرى ءۇشىن رازى بولسىن!

ال مەككەدە كىشى قاجىلىقتان كەرەمەت اسەر الدىم. ادام نيەتتەنسە ءبارى بولادى ەكەن. مەن اراب تۇبەگىنە جاقسى نيەتپەن كەلدىم. قۇدايدان قاعبانىڭ جانىندا تۇرىپ، ەلىمىزگە، حالقىمىزعا، اعايىن-باۋىر، تۋعان-تۋىس، دوس-جارانعا ويىما كەلگەن ەڭ-ەڭ جاقسى تىلەكتەردى تىلەدىم! قايتقان ادامداردى اللا پاناسىنا السىن دەپ ارۋاقتارعا دۇعا جاسادىم!

ەندى مەككەگە ەكىنشى رەت قاشان كەلەتىنىمىزدى ءبىر قۇداي بىلەدى. باس امان بولسا ءبارى بولادى. ەڭ باستىسى ەلىمىز امان، جۇرت تىنىش بولسىن! تاۋەلسىزدىگىمىز ماڭگى بولىپ، قازاق ءوز وزىنە بي، ءوز وزىنە قوجا بولىپ جۇرە بەرسىن!

داستان كەنجالين، – مەككەدەن