Qanat «Jaman balamen» judyryqtasady

9 qyrkúıekte elordanyń dál tórinde halyqaralyq EHRO kórmesi aıasynda áıgili sportshymyz Qanat Islamnyń qatysýymen keremet kásipqoı boks keshi ótetini belgili. Sóz oraıy kelgende, bul shara Mádenıet jáne sport mınıstrligi, «Samuryq Qazyna» ulttyq ál-aýqat qory, ZHERSU óndiristik-ınvestıııalyq korporaııasy, Astana qalasy ákimshiliginiń muryndyq bolýymen uıymdastyrylyp otyrǵanyn aıta ketken abzal.

Osy keshte Qanattyń kimmen judy­ryq­­tasatyny keshe ǵana belgili boldy. Ol – «Jaman bala» degen laqap atpen tanymal Brendon Kýk. 1986 jyldyń
13 maýsymynda Kanadanyń Ontarıo shtatyna qarasty Eıdjaks qalasynda týyp-ósken aıtýly bylǵary qolǵap sheberi 2011 jyldan beri kásipqoı rıngte kúsh synasyp júr. Sol aralyqta 18 kezdesý ótkizip, sonyń birde-birinde jeńilistiń kermek dámin tatqan emes. Ol 11 básekeni nokaýtpen aıaqtady. Bir aıta keterligi, osyǵan deıingi jekpe-jekte­ri­niń barlyǵyn Kýk tek óz Otanynda ót­kiz­di. Mine, endi Úıeńki japyraqtar eli­niń ókili alǵash ret alys saparǵa shyǵyp, shet memlekette óner kórsetýge táýekel etip otyr.

Brendon Kýk sońǵy ret 2007 jyldyń 28 qańtarynda Monrealda jergilikti boksshy Stıven Batlermen judyryq­tasty. Bul báseke Ontarıo shtaty týma­sy­nyń basymdyǵymen ótti. 7-raýndta Kýk qarsylasyn nokdaýnǵa jiberdi. Tóreshi onǵa deıin sanaǵansha Batler esin jıdy. Alaıda aıaǵynan nyq tura almaı, teńsele berdi. Sony der kezinde anyq baıqaǵan qazy básekeni toqtatyp, Bren­don­nyń qolyn kóterdi. Tóreshiniń bul sheshimi kórermenderdiń narazy­ly­ǵyn týdyrdy. Olar rıngke túrli zattar laq­ty­ra bastady. Sonyń biri, ıaǵnı, muz­ǵa toly shelek jeńimpaz atanǵan boksshy­nyń basyna tıip, ol esinen tanyp qaldy. Osy shıelenistiń aqyry tóbeleske ula­syp, tórt adam túrli dene jaraqatyn aldy. Nátıjesinde, eki kórermen aýrý­ha­na­ǵa jóneltilse, taǵy ekeýi temir torǵa qamal­dy.

Qysqasha qaıyrsaq, 31 jastaǵy Bren­don Kýktiń júrip ótken joly osyn­daı. Desek te, onyń myqty boks­shy­sy ekeni esh kúmán týdyrmasa kerek. Sebebi, osy kúnge deıin ótkizgen 18 báse­keniń barlyǵyn ol óz paıdasyna shesh­ti. Mun­daı kórsetkishke qol jetkizý baqyty ekiniń birine buıyrmaıtyny anyq.

Qanattyń sporttyq tabysy jaıynda jankúıerler jaqsy biledi. Áýesqoılar arasynda olımpıada oıyndary (2008 jyl, Beıjiń), álem chempıonaty (2007 jyl, Chıkago), Azııa oıyndary (2006 jyl, Doha) jáne Azııa birinshiliginiń (2007 jyl, Ulanbatyr) qola júldegeri atanǵan qandasymyz 2012 jyldan beri kásipqoı rıngte kúsh synasýda. Sol aralyqta 24 ret jekpe-jekke shyǵyp, barlyǵynda jeńiske jetti. 19 qarsy­la­syn esinen tandyrdy. О́ziniń sońǵy kezdesýin ol 26 mamyrda meksıkalyq Norberto Gonsalespen shyǵyp, 12 raýnd­tyq kezdesýde jeńimpaz atandy.

Ǵalym SÚLEIMEN