قاشىقتىقتان وقىتۋ جۇيەسىنە دايىنبىز با؟

سوڭعى كەزدە الەۋمەتتىك جەلىدە عانا ەمەس، قوعامدا قىزۋ تالقىعا تۇسكەن قاشىقتىقتان وقىتۋ جۇيەسى بۇگىندە باستى پروبلەماعا اينالىپ وتىر.  مەكتەپ وقۋشىلارى مەن ستۋدەنتتەر بىلىمدەرىن ۇيدە، وقىتۋشىلار ءبىر ءسات تەلەجۇرگىزۋشى قىزمەتىنە اۋىسىپ ارنالاردان بەينەساباق بەرە باستادى.

ءيا، ءبىر جاعىنان دامىعان 30 ەلدىڭ قاتارىنا قوسىلۋعا تالپىنىپ كەلە جاتقان ءبىزدىڭ مەملەكەت ءۇشىن كەرەك-اق دۇنيە، الايدا وقۋشىلار دا، وقىتۋشىلار دا بۇل جۇيەگە دايىن ەمەستىگىن كورسەتتى. ولاي دەيتىنىمىز ينتەرنەتى ناشار ۇستايتىن نەمەسە ينتەرنەتى جوق شالعايدا تۇراتىن مەكتەپ وقۋشىلارى قالاي وقيدى، ينتەرنەت جۇيەسى بار قالانىڭ وزىندە كومپيۋتەر نەمەسە نوۋتبۋگى، ودان قالدى سمارتفونى كەز-كەلگەننىڭ ۇيىنەن تابىلا بەرمەيدى. بۇل پروتسەستەن وقۋشىلارعا دۇرىس ءبىلىم بەرىلە مە؟ – دەگەن ساۋالدار كوپتىڭ كوكەيىن مازالايدى.

الايدا ءبىلىم جانە عىلىم ءمينيسترى اسحات ايماعامبەتوۆتىڭ ءوزى قاشىقتىقتان ءبىلىم بەرۋ وڭاي شارۋا ەمەس ەكەندىگىن اتاپ ءوتتى. دەگەنمەن ءدال قازىرگى جاعدايدا تەحنولوگيالىق مۇمكىندىكتەردى پايدالانا وتىرىپ، ءبىلىم بەرۋدىڭ وسى ۇلگىسىنە كوشۋ كەرەكتىگىن باسا ايتتى. سونىمەن قاتار بۇل جۇيە – بىزگە بەرىلگەن ۇلكەن سىناق ەكەنىن، سوندىقتان قول قۋسىرىپ قاراپ وتىرماي ارنايى تسيفرلىق ساۋاتتىلىقتى ارتتىرۋ ماقساتىندا كۋرستار وتكىزىلىپ، نۇسقاۋلىقتار دايىنداۋ قولعا الىنعانى تۋرالى اقپارات بەردى. سوندىقتان وقيمىن، ىزدەنەمىن، بولامىن دەگەن ءار ادامعا ەشتەڭە كەدەرگى بولماۋى كەرەك دەپ سانايمىن.

ايتا كەتەيىك، ەل اۋماعىنا ەنگىزىلگەن توتەنشە جاعدايعا بايلانىستى 6 ساۋىردەن باستاپ قازاقستاننىڭ ءبىلىم بەرۋ جۇيەسىنە وزگەرىس ەنگىزىلگەن بولاتىن. ءتىپتى بيىلعى مەكتەپ ءبىتىرۋشى تۇلەكتەردىڭ سوڭعى مەكتەپ ەمتيحاندارى بولمايدى، سوڭعى قوڭىراۋى سوعىلمايدى. ويلاناتىن دا ويلاندىراتىن دا نارسە. «جۇمىلا كوتەرگەن جۇك جەڭىل» — دەگەندەي ءبارىمىز ءبىر جاعادان باس، ءبىر جەڭنەن قول شىعارىپ، ەل باسىنا كەلگەن ناۋبەتتەن امان شىعۋىمىز ءۇشىن بارىنشا كۇرەسەيىك.

ءمادينا ىسقاقوۆا،

قازاقستان رەسپۋبليكاسى ۇلتتىق كىتاپحاناسى

عىلىمي-ادىستەمەلىك قىزمەتىنىڭ قىزمەتكەرى

الماتى