يسپانيا گران-پريىنە شولۋ

فورمۋلا-1 قاۋىمداستىعى ىشىندە ءجيى ايتىلىپ جۇرگەندەي، كاتالۋنيا جولىندا قارسىلاستارىڭنان باسىپ وزۋ اسا قيىن. جەكسەنبىلىك جارىس تا سونىڭ ءبىر دالەلىنە اينالدى. جارىستى ءبىرىنشى بولىپ باستاعان Mercedes-ءتىڭ پيلوتى ليۋيس حەميلتون مارەگە دەيىن الدىنا جان سالماي، يسپانيا گران-ءپريىنىڭ جەڭىمپازى اتاعىنا ءتورتىنشى مارە يە بولدى. بۇل جەڭىس – فورمۋلا-1 قاۋىمداستىعى ءۇشىن تاريحي ماڭىزى بار وقيعا. سەبەبى، ل.حەميلتون وسى جەڭىسى ارقىلى پوديۋمعا 156-رەت كوتەرىلدى. وسىلايشا، ول شۋماحەردىڭ مىزعىماستاي كورىنگەن رەكوردىن جاڭارتتى. ەستەرىڭىزگە سالا كەتەيىك، «قىزىل بارون» ف1 پوديۋمىنا 155 رەت كوتەرىلگەن بولاتىن.

حەميلتوننىڭ كوماندالاسى ۆ.بوتتاس ءۇشىن بۇگىنگى جارىس ءساتسىز باستالدى. باعدارشامنىڭ قىزىل جارىعى وشكەن ساتتە ازداپ تەجەلىپ قالعان بوتتاستى ماكس فەرستاپپەن باستاعان بىرنەشە پيلوت باسىپ وزدى. دەگەنمەن دە، ۆالتتەري كوپ ۇزاماي ماكستان باسقا قارسىلاستارىنا ەسە قايتارا ءبىلدى.

Red Bull-دىڭ ۇكىلەگەن ءۇمىتى ماكس فەرستاپپەن بۇگىنگى جەڭىستى ءوز قانجىعاسىنا بايلاۋعا بارىنشا تىرىسىپ، قولىنان كەلگەنىن جاسادى. الايدا، العاشقى پيت-ستوپتىڭ الدىندا حەميلتون جىلدامدىقتى ادام سەنگىسىز دەڭگەيگە جوعارىلاتۋ ارقىلى ماكستان قارا ءۇزىپ كەتە باردى. سول كەتكەننەن ليۋيس ماكستى جارىستىڭ سوڭىنا دەيىن شابۋىلعا شىعاتىنداي قاشىقتىققا جاقىنداتپادى. Red Bull پيلوتىنىڭ قانجىعاسىنداعى ەكىنشى ورىندى قورعاپ قالعاننان باسقا ەشتەڭەگە مۇمكىندىگى بولمادى. دەگەنمەن دە، م.فەرستاپپەن بيىلعى Mercedes-كە قارسىلىق كورسەتۋگە بولاتىنىن دالەلدەپ بەردى.

سوڭعى ۋاقىتتاعى جارىستار قازىرگى فورمۋلادا «ۇلكەن ۇشتىكتىڭ» قالىپتاسقانىن انىق كورسەتىپ ءجۇر. جوعارىدا اتالعان ءۇش پيلوت جارىستى باسقا بوليدتەردەن 1 مينۋتتان اسا ۋاقىتقا ەرتە بىتىرگەنى وسىنى تاعى ءبىر رەت كورسەتسە كەرەك. پوديۋمنان تىس قالعانداردىڭ ىشىندە ۇزدىك ناتيجەگە Racing Point-تىڭ قوس پيلوتى قول جەتكىزدى. Renault كومانداسى جاساعان شاعىمنىڭ شەشىمىن تاۋىپ، بار نازارىن جارىسقا اۋدارعان Racing Point بيىلعا العاش رەت ءوز بوليدتەرىنىڭ بار پوتەنتسيالىن قولدانا الدى. يسپانياداعى جوعارى ناتيجەدەن سوڭ، ل.ستروللدىڭ كومانداسى كونسترۋكتورلار كۋبوگىندا 3-ورىنعا شىقتى.

كىشى سترولل مەن سەرحيو پەرەستىڭ ءىزىن-الا ءوز وتانىندا ونەر كورسەتىپ جاتقان ك.ساينس جارىستى اياقتادى. ال، Ferrari-دىڭ ءۇمىتىن جالعىز ارقالاعان س.فەتتەل 7-ورىنعا تابان تىرەدى. دەگەنمەن دە، ءتورت دۇركىن الەم چەمپيونى ءۇشىن بۇگىنگى كۇن ءساتتى اياقتالدى دەپ ايتۋعا بولادى. جارىستى پەلەتوننىڭ ارتقى بولىگىنەن باستاپ، رەزينانى ساقتاي الۋىنىڭ ارقاسىندا ءبىر رەت قانا پيت-ستوپقا توقتاعان س. فەتتەل «گران-ءپريدىڭ ۇزدىك پيلوتى» اتاعىنا يە بولدى.

Red Bull-دىڭ ەكىنشى پيلوتى ا.البون جاقىن ارادا كومانداداعى ورنىنان ايىرىلاتىن ءتارىزدى. وعان سەبەپتەردىڭ ءبىرى – بۇگىنگى جارىس. ءوز كوماندالاسىنان ءبىر اينالىمعا قالىپ قويىپ، جارىستى 8-ورىندا اياقتاۋ – فورمۋلا-1-دە سيرەك كەزدەسەتىن ماسقارا كورسەتكىش. ۇپايعا يە بولعان پيلوتتاردىڭ كوشىن پ.گاسلي مەن ل.نورريس اياقتادى.

جارىستى ۋاقىتىنان ەرتە اياقتاعان جالعىز پيلوت — ش.لەكلەر. جارىستىڭ ورتا تۇسىنان اسقان ساتتە، جولدىڭ قاق ورتاسىندا قوزعالتقىشى ىستەن شىققان مونەگاسكتىڭ بوليدى قايتا وت العان ساتتە، جارىستى جالعاستىرۋدىڭ ەش ءمانى قالمادى.

فورمۋلا-1 قاۋىمداستىعى يسپانيا گران-ءپريى اياقتالعان سوڭ 2 اپتالىق دەمالىسقا كەتتى. كەلەسى كەزەكتە، جازدىڭ سوڭعى كۇندەرى بەلگيانىڭ سپا قالاسىنداعى گران-پريدە كەزدەسەتىن بولامىز.

ەرنۇر مولداشەۆ