Ispanııa Gran-Prıine sholý

Formýla-1 qaýymdastyǵy ishinde jıi aıtylyp júrgendeı, Katalýnıa jolynda qarsylastaryńnan basyp ozý asa qıyn. Jeksenbilik jarys ta sonyń bir dáleline aınaldy. Jarysty birinshi bolyp bastaǵan Mercedes-tiń pıloty Lıýıs Hemılton márege deıin aldyna jan salmaı, Ispanııa Gran-Prıiniń jeńimpazy ataǵyna tórtinshi máre ıe boldy. Bul jeńis – Formýla-1 qaýymdastyǵy úshin tarıhı mańyzy bar oqıǵa. Sebebi, L.Hemılton osy jeńisi arqyly podıýmǵa 156-ret kóterildi. Osylaısha, ol Shýmaherdiń myzǵymastaı kóringen rekordyn jańartty. Esterińizge sala keteıik, «qyzyl baron» F1 podıýmyna 155 ret kóterilgen bolatyn.

Hemıltonnyń komandalasy V.Bottas úshin búgingi jarys sátsiz bastaldy. Baǵdarshamnyń qyzyl jaryǵy óshken sátte azdap tejelip qalǵan Bottasty Maks Ferstappen bastaǵan birneshe pılot basyp ozdy. Degenmen de, Valtterı kóp uzamaı Makstan basqa qarsylastaryna ese qaıtara bildi.

Red Bull-dyń úkilegen úmiti Maks Ferstappen búgingi jeńisti óz qanjyǵasyna baılaýǵa barynsha tyrysyp, qolynan kelgenin jasady. Alaıda, alǵashqy pıt-stoptyń aldynda Hemılton jyldamdyqty adam sengisiz deńgeıge joǵarylatý arqyly Makstan qara úzip kete bardy. Sol ketkennen Lıýıs Maksty jarystyń sońyna deıin shabýylǵa shyǵatyndaı qashyqtyqqa jaqyndatpady. Red Bull pılotynyń qanjyǵasyndaǵy ekinshi oryndy qorǵap qalǵannan basqa eshteńege múmkindigi bolmady. Degenmen de, M.Ferstappen bıylǵy Mercedes-ke qarsylyq kórsetýge bolatynyn dáleldep berdi.

Sońǵy ýaqyttaǵy jarystar qazirgi Formýlada «úlken úshtiktiń» qalyptasqanyn anyq kórsetip júr. Joǵaryda atalǵan úsh pılot jarysty basqa bolıdterden 1 mınýttan asa ýaqytqa erte bitirgeni osyny taǵy bir ret kórsetse kerek. Podıýmnan tys qalǵandardyń ishinde úzdik nátıjege Racing Point-tyń qos pıloty qol jetkizdi. Renault komandasy jasaǵan shaǵymnyń sheshimin taýyp, bar nazaryn jarysqa aýdarǵan Racing Point bıylǵa alǵash ret óz bolıdteriniń bar potenıalyn qoldana aldy. Ispanııadaǵy joǵary nátıjeden soń, L.Strolldyń komandasy Konstrýktorlar kýbogynda 3-orynǵa shyqty.

Kishi Stroll men Serhıo Perestiń izin-ala óz Otanynda óner kórsetip jatqan K.Saıns jarysty aıaqtady. Al, Ferrari-dyń úmitin jalǵyz arqalaǵan S.Fettel 7-orynǵa taban tiredi. Degenmen de, tórt dúrkin álem chempıony úshin búgingi kún sátti aıaqtaldy dep aıtýǵa bolady. Jarysty peletonnyń artqy bóliginen bastap, rezınany saqtaı alýynyń arqasynda bir ret qana pıt-stopqa toqtaǵan S. Fettel «Gran-Prıdiń úzdik pıloty» ataǵyna ıe boldy.

Red Bull-dyń ekinshi pıloty A.Albon jaqyn arada komandadaǵy ornynan aıyrylatyn tárizdi. Oǵan sebepterdiń biri – búgingi jarys. О́z komandalasynan bir aınalymǵa qalyp qoıyp, jarysty 8-orynda aıaqtaý – Formýla-1-de sırek kezdesetin masqara kórsetkish. Upaıǵa ıe bolǵan pılottardyń kóshin P.Gaslı men L.Norrıs aıaqtady.

Jarysty ýaqytynan erte aıaqtaǵan jalǵyz pılot — Sh.Lekler. Jarystyń orta tusynan asqan sátte, joldyń qaq ortasynda qozǵaltqyshy isten shyqqan monegasktyń bolıdy qaıta ot alǵan sátte, jarysty jalǵastyrýdyń esh máni qalmady.

Formýla-1 qaýymdastyǵy Ispanııa Gran-Prıi aıaqtalǵan soń 2 aptalyq demalysqa ketti. Kelesi kezekte, jazdyń sońǵy kúnderi Belgııanyń Spa qalasyndaǵy Gran-Prıde kezdesetin bolamyz.

Ernur MOLDAShEV