SportPress.kz قازاقستان سپورت جاڭالىقتارى
فۋتبولدان قازاقستان ۇلتتىق قۇراماسىنىڭ باس جاتتىقتىرۋشىسى الەكساندر بوروديۋك 2018 جىلى رەسەيدە وتەتىن الەم چەمپيوناتىنا ىرىكتەۋ كەزەڭىندە رۋمىنيا مەن ارمەنيا قۇرامالارىنا قارسى وتەتىن ويىن الدىندا سۇحبات بەردى.
– قازاقستان قۇراماسى الەم چەمپيوناتىنىڭ ىرىكتەۋ كەزەڭىندە مىقتى توپقا ءتۇستى. قارسىلاستارىمىز الەم جانە ەۋروپا چەمپيوناتتارىندا ونەر كورسەتىپ جۇرگەن تاجىريبەلى قۇرامالار. ءبىر جاعىنان ءبىزدىڭ فۋتبولشىلارىمىزعا ۇلكەن تاجريبە بولماق. ەۋروپا فۋتبولىنىڭ دەڭگەيى جوعارى ەكەنىن بۇكىل الەم جاقسى بىلەدى. مەن قازاقستاندىق فۋتبولشىلاردىڭ كاسىبي تۇرعىدا دامۋىنا مۇمكىندىگى بار ەكەنىن ىلعي دا ايتىپ كەلەمىن. ەگەر ۇجىمداعى جىگىتتەر كارى قۇرلىقتىڭ بىرىنشىلىكتەرىندە دوپ تەبەتىن بولسا، جەرگىلىكتى فۋتبولعا بوي ۇيرەتىپ، حالىقارالىق تۋرنيرلەردە جەڭىسكە جەتۋىنە وڭاي بولاتىن ەدى.
رۋمىنيانىڭ وسال كوماندا ەمەس ەكەنىن ءبارى بىلەدى. وتكەن جىلى فرانتسيادا وتكەن ەۋروپا چەمپيوناتىنا قاتىسقانىن ايتا كەتكەن ءجون. ءوز باسىم قۇرامامىزدىڭ رۋمىنداردان جەڭىلمەيتىنىنە سەنىمدىمىن. جانكۇيەرلەر تارتىستى كەزدەسۋگە كۋا بولادى. ءبىز ەندى الداعى ەكى ماتچى ءساتتى وتكىزىپ، كەز كەلگەن قارسىلاسقا لايىقتى قارسىلىق كورسەتە الاتىنىمىزدى دالەلدەۋىمىز كەرەك.
– وتكەن جىلى استانادا رۋمىنياعا قارسى ويىندا ۇلتتىق قۇرامامىز تەڭ ويناپ، ءبىر ۇپاي العان ەدى. سىرت الاڭدا دا ۇپاي الۋ ءۇشىن نە ىستەۋ كەرەك؟
– ءبىر نارسەنى ەسكەرە كەتۋ كەرەك، فۋتبولدا قارسىلاستار ءبىر بولعانمەن، ءار ويىن ءبىر-بىرىنە ەشقاشان ۇقسامايدى. سايكەسىنشە ءار ماتچ وزىندىك ەرەكشەلىگىمەن ەستە قالادى. ماسەلەن، پولشاعا قارسى ويىندا رومان مۇرتازاەۆ گول سالىپ، 1:0 ەسەبىمەن العا شىققان ەدىك. الايدا، تورەشى بۇل گولدى ەسەپكە الماي قويدى. بۇل دوپ سانالعاندا ويىن ناتيجەسىن وزگەرتۋى ابدەن مۇمكىن ەدى. قازىرگى ۋاقىتتا ءبىز قاتەلىكتەرىمىزبەن جۇمىس ىستەپ، جاتتىعۋلارىمىزدى پىسىقتاپ جاتىرمىز. ءبىزدىڭ ءدال قازىرگى باستى كەمشىلىگىمىز – ستاندارتتى جاعداي.
– قۇرامامىز ارمەنياعا قارسى ويىندى قانداي كوڭىل-كۇيمەن باستايدى؟
– مەن ءوز كومانداما تولىق سەنەمىن. الداعى رۋمىنياداعى ويىندا جەڭىسكە جەتىپ، ارمەنياعا قارسى جاقسى كوڭىل-كۇيمەن وينايمىز دەپ ۇمىتتەنەمىن.
– رۋمىنيادا بىردەن ءۇش ويىنشى (باۋىرجان يسلامحان يۋري لوگۆينەنكو جانە گەورگي جۋكوۆ) الاڭعا شىعا المايتىنى بەلگىلى. بۇل الداعى ويىنعا قانشالىقتى اسەر ەتۋى مۇمكىن؟
– ويىنشىلاردىڭ جاراقات الۋى بەلگىلى ءبىر دەڭگەيدە ماتچقا دا اسەر ەتەدى. بۇل كەزدەسۋدە ۇلتتىق قۇرامانىڭ وزگە ويىنشىلارىنا مۇمكىندىك بەرىپ كورەمىز.
ەگەر 2018 جىلعى الەم چەمپيوناتىنىڭ ىرىكتەۋ كەزەڭىندەگى ويىندارىنا تالداۋ جاسار بولساق، ەكى ماتچتا ويىنشىلارىمىزدىڭ ءبىرى الاڭنان قۋىلىپ، ون اداممەن وينادىق. بۇل كەزدەسۋدىڭ ناتيجەسىنە تىكەلەي اسەر ەتتى دەپ ايتا الامىن. سول ءبىر ءتارتىپ بۇزۋشىلىق بولعان ءسات ويىنشىنىڭ قىزىل قاعاز الۋىنا تۇرارلىق پا؟ مىنە، وسى جونىندە كوبىرەك ايتۋعا بولار. بىراق، بۇل ولقىلىقتارىمىزدى دا باستى نازاردا ۇستاپ، الداعى ۋاقىتتا قايتالاماۋعا تىرىسۋىمىز كەرەك. مۇنداي جوعارى دەڭگەيلى ماتچتاردا ون ويىنشىمەن ويناۋ وڭاي ەمەس. ال چەرنوگوريا مەن پولشاعا قارسى ستاندارتتى جاعدايلاردا كوپ قاتەلىكتەرگە بوي الدىردىق. مۇنىڭ ءبارى ىشكى بىرىنشىلىكتىڭ دەڭگەيىنە، ياعني باسەكەگە قانشالىقتى قابىلەتتى ەكەنىنە، ويىنشىلاردىڭ قانشالىقتى جىلدام وينايتىنىنا دا بايلانىستى. ەگەر چەمپيوناتتا ەكى كوماندانىڭ دارەجەسى جوعارى بولسا، كەي قاتەلىكتەردى كەشىرۋگە بولار. ال حالىقارالىق دەڭگەيدەگى ويىنداردا بولماشى ساتتەر ءوزىڭدى بىردەن قاپى قالدىرىپ جاتاتىنىن ەستە ساقتاعان ابزال.
– ەرەۆانداعى ماتچتا ۇلتتىق قۇرامامىز لايىقتى ونەر كورسەتتى. ەگەر ويىنشىمىز قىزىل قاعاز الماعاندا ارمەنيادان ءبىر ۇپاي الاتىن مۇمكىندىگىمىز بولار ەدى. ال ماتچتا گەنريح محيتارياننىڭ جوعارى دەڭگەيدە ويناعانىن دا اتاپ وتپەي كەتۋگە بولماس…
– بۇل كەزدەسۋدە ءبىز ناشار وينادىق دەپ ايتا المايمىن. ماتچتى ءوز قولىمىزعا الىپ، بىرنەشە قاۋىپتى ساتتەر ۇيىمداستىرعان كەزدەرىمىز بولدى. بەلگىلى ءبىر تۇستا باسىمدىعىمىز دا ءبىلىنىپ جاتتى. دەگەنمەن ويىنشىلاردىڭ جەكەلەگەن شەبەرلىگى ۇلكەن ءرول اتقارادى. محيتاريان ناعىز شەبەر ويىنشىنىڭ ءوزى. ءوزىنىڭ دەڭگەيىن بىزگە قارسى ويىندا تاعى ءبىر مارتە دالەلدەي ءبىلدى. ورايى كەلگەن تۇستاردا قاقپامىزدى بىرنەشە رەت قاپى قالدىردى. ەگەر پولشاعا قارسى ويىندى ەسكە تۇسىرەر بولساق، روبەرت لەۆاندوۆسكيدىڭ ەرەكشە ويىنىن ايتا كەتكەن ءجون. ول تەك شابۋىل شەبىندە عانا باسىمدىعىن كورسەتپەي، قورعانىسقا دا ءجيى كومەكتەسىپ ءجۇردى. شابۋىلدى الاڭنىڭ ورتا تۇسىنان باستاعان كەزدەرى دە بولدى. ال ءبىز نەعۇرلىم كوبىرەك تاجىريبە جيناۋىمىز كەرەك. قاتەلىكتەرىمىزدەن ءتيىستى ناتيجە شىعارۋىمىز قاجەت. كوماندادا جوعارى دەڭگەيلى جىگىتتەر جينالعان. ولار كەز كەلگەن قۇراماعا قارسى لايىقتى دەڭگەيدە ونەر كورسەتە الادى. سوندىقتان كومانداما سوڭىنا دەيىن سەنىم ارتاتىن بولامىن.
– ارمەنيا قۇراماسىنىڭ كوشباسشى ويىنشىسى گەنريح محيتاريان دەپ سەنىممەن ايتا الامىز. ونىڭ مۇنداي دەڭگەيگە كوتەرىلۋىنە نە سەبەپ بولدى؟
– بۇل جەردە ەكى نارسەنى اتاپ وتكەن ءجون. ول – تالانت پەن ەڭبەكقورلىق. ەكەۋىنىڭ ءبىرى بولماسا توپ ويىنشى بولۋ مۇمكىن ەمەس.
– ارمەنيانىڭ كوشباسشىسىن توقتاتۋ ءۇشىن قانداي امالدار قولدانۋدى جوسپارلاپ وتىرسىز؟
– فۋتبول – كوماندالىق سپورت ءتۇرى. سوندىقتان مۇندا ۇجىمنىڭ قالاي ارەكەت ەتەتىنى ماڭىزدى. جىگىتتەردىڭ ءجوندى نۇسقاۋلار الۋى، الاڭدا دۇرىس ورنالاسۋى، جىلدام ويلاي ءبىلۋى قاجەت. قارسىلاسىڭدى جەڭگىڭ كەلسە، فيزيكالىق دەڭگەيىڭ، شەبەرلىگىڭ جاقسى بولۋى كەرەك. سونداي-اق، باسىمدىعىڭدى كورسەتۋ ءۇشىن پسيحولوگيالىق تۇرعىدا دايىن بولعانىڭ دا ابزال.
— ءسىز گەنريح محيتارياندى ارمەنيا قۇراماسىنىڭ ساپىنداعى ەڭ قاۋىپتى ويىنشى دەپ ەسەپتەيسىز بە؟
— نەگىزى ارمەنيادا مىقتى ويىنشىلار از ەمەس. وزدەرىن جاقسى قىرىنان كورسەتە الاتىن فۋتبولشىلار جەتەرلىك دەپ سەنىممەن ايتا الامىن. بىراق محيتارياننىڭ ورنى بولەك. كوماندانىڭ ويىنى نەگىزىنەن وسى فۋتبولشىنىڭ توڭىرەگىنەن ءوربيدى دەسەم ارتىق ايتپاعان بولار ەدىم. وسىنداي بىلىكتىلىگىنىڭ ارقاسىندا ارىپتەستەرىنىڭ دە سەنىمدىلىگى ارتا تۇسەدى.
— جانكۇيەرلەرىڭىزدىڭ قولداۋىنا قانشالىقتى سەنىم ارتاتىن بولاسىز؟
— ارينە، جانكۇيەرلەرىمىزدىڭ قولداۋى بىزگە وتە ماڭىزدى. ولارعا تەك سەنىم ارتىڭىزدار، قولداۋ بىلدىرىڭىزدەر دەگىم كەلەدى. جاسىل الاڭعا ءبىزدىڭ قۇرامامىز شىعادى. وكىنىشكە قاراي، سوڭعى ويىنداردا جەڭىسكە جەتىپ، جانكۇيەرىمىزدى قۋانتا الماي ءجۇرمىز. دەگەنمەن، قانداي قيىن جاعداي بولماسىن، ەل نامىسىن قورعايتىن كومانداعا جانكۇيەرلەرىنىڭ قولداۋى ماڭىزدى. كوماندامىزدىڭ قيىن كەزەڭىنە قاراماي سەنىم ارتىپ، قولداۋ كورسەتكەن ءاربىر جانعا العىسىم شەكسىز. ۇجىمداعى جىگىتتەردىڭ ءبارى ەل نامىسىن قورعايتىنىن، ارتىندا جاعدايىن ويلاپ، الاڭداپ وتىرعان قالىڭ حالىقتىڭ بارىن بىلەدى. ءبىز الاڭعا جەڭىس ءۇشىن شىعاتىنىمىزدى دالەلدەيتىن بولامىز. سوڭىنا دەيىن كۇرەسەمىز. جەڭىسكە جەتۋ ءۇشىن قولىمىزدان كەلگەننىڭ ءبارىن جاسايمىز.
