قازاق ۆولەيبولىنىڭ اتاسى

قازاقستان ۆولەيبولىنىڭ اتاسى وكتيابر جارلىعاپوۆ تۋرالى ءبىر ۇزىك سىر

«تارتىسپەن تۇسكەن بەينەتپەن كەلگەن جاقسىلىق قانا شىن مانىندە قىمبات تابىس»

م.اۋەزوۆ

قازاقستانداعى ۆولەيبولدىڭ قالىپتاسۋ وشاعى نەدەن باستالعانى تۋرالى ءسوز ەتكەندە  وسى ءبىر تەڭدەسىز تەكتى سپورت ونەرىن ەلىمىزدە نەگىزىن قالاعان، اتى ايگىلى ۆولەيبول شەبەرى، سوناۋ  الماتىنىنىڭ «بۋرەۆەستنيك» كومانداسىن ادام ايتسا نانعىسىز دەڭگەيگە كوتەرگەن دارىندى جاتتىقتىرۋشى، ۆولەيبولدان ەلىمىزدەگى تۇڭعىش كسرو سپورت شەبەرى، 1960 جىلى كسرو-نىڭ ەڭ ۇزدىك 24 سپورتشىسىنىڭ قاتارىنا ەنگەن دارا تۇلعا وكتيابر جارلىعاپوۆتى مىندەتتى تۇردە ەسكە الامىز. ەسكە الا وتىرىپ، دارىندى جاننىڭ سالىپ كەتكەن سارا جولى مەن تاكتيكالىق ويىن مودەلىن بۇگىنگى كۇنى كاسىبي دەڭگەيدە ونەر كورسەتىپ جۇرگەن جاستارىمىزعا ساباق رەتىندە ۇيرەتىپ جاتسا ارتىق بولماس  پا ەدى دەگەن ويدىڭ قاماۋىندا قالامىز.

قازاق سپورت تاريحىندا ءاربىر سپورتتى جەكەلەي الىپ قاراساق، ساڭلاق اعالارىمىزدىڭ سالىپ كەتكەن سارا جولدارىن كورەمىز. مىسالى، جەڭىل اتلەتيكادا – عۇسمان قوسانوۆ پەن ءامين تۇياقوۆ، كۇرەستە – قابدەن بايدوسوۆ، ابىلسەيىت ايقانوۆ، امانگەلدى گاپساتتاروۆ، امانجول بۇعىباەۆ، اسقانتاي يمانقۇلوۆ، بوكستا – شوقىر بولتەك ۇلى، ءابدىسالان نۇرماحانوۆ پەن سەرىك قوناقباەۆتار، گوگالداعى حوككەيدە – قازبەك بايبولوۆ، فۋتبولدا – تيمۋر سەگىزباەۆ، قۇرالبەك ورداباەۆ پەن سەيىلدا بايشاقوۆ، سۋعا جۇزۋدە – باقي ەلعونديەۆ، باسكەتبولدا – ءالجان جارمۇحامەدوۆ، ۆولەيبولدا – وكتيابر جارلىعاپوۆ، زاڭعار جاركەشەۆ پەن جانىبەك ساۋرانباەۆتاردىڭ ەسىمدەرىنە ايىرىقشا توقتالىپ، ماقتانىشپەن ايتامىز. ءاربىر سپورتتى جان تانىمەن جاقسى كورىپ، بارىڭدى بەرە بىلسەڭ، قايتارىما دا يگىلىكتى بولارى ءسوزسىز. اتتارى اتالعان ارداگەرلەرىمىز وزدەرى ءومىرىنىڭ ءمانى دەپ تاڭداپ العان سپورتتارىنا بار عۇمىرلارىن ارناپ، جەمىسىن كورە بىلگەن ايشىقتى تۇلعالار. سوندىقتاندا جاس بۋىنعا الدىڭعى تولقىن اعالارىنىڭ ايبىندى جولدارىنان ۇلگى السا دەپ تىلەيمىز..

بۇگىنگى اڭگىمە وزەگىن ۆولەيبولدان قازاقستان سپورت تاريحىندا اتى التىن ارىپپەن جازىلىپ قالعان، الماتىنىنىڭ «بۋرەۆەستنيك» كومانداسىن جاتتىقتىرا وتىرىپ، ادام ايتقىسىز جەتىستىككە جەتكىزە بىلگەن، ۇلى جاتتىقتىرۋشى وكتيابر جارلىعاپوۆ تۋرالى بولماق.

وكتيابر قىدىرباي ۇلى جاساقتاعان الماتىنىڭ  «بۋرەۆەستنيك»  كومانداسى ءوزى دۇنيەدەن وزعان 1969 جىلى كسرو بىرىنشىلىگىنىڭ التىن جۇلدەسىن جەڭىپ السا، سودان كەيىن ەكى دۇركىن ەۋروپا چەمپيوندار كۋبوگىنىڭ يەگەرى اتاندى. دارىندى سپورتشى، بىلىكتى باپكەر وكتيابر جارلىعاپوۆ ۆولەيبولدان ەلىمىزدە تۇڭعىش رەت كسرو سپورت شەبەرى اتانعان سپورتشى. سونىمەن قاتار، 1960 جىلى كسرو-نىڭ ەڭ ۇزدىك 24 سپورتشىسىنىڭ قاتارىنا ەنگەن دارا تۇلعا بولدى. سول ءبىر 1960 – 1970 جىلدارى قازاقستان سپورتى ءۇشىن التىن عاسىردىڭ  ورلەگەن كەزەڭى ەدى. ايتالىق، قازاقستاندىق بىلعارى قولعاپ شەبەرلەرى الەم، وليمپيادا تۇعىرىنا كوتەرىلىپ جاتسا، فۋتبولدان الماتىنىڭ «قايراتى»، دوپتى حوككەي مەن كوگالداعى حوككەيدەن «دينامو» كوماندالارى كەڭەس وداعىنا اتتارى دۇركىرىپ تۇرعان شاق بولاتىن. ال، ويىن تۇرلەرى بويىنشا حالىقارالىق ارەنالاردا ەڭ ۇلكەن تابىسقا جەتكەن «بۋرەۆەستنيك» كومانداسىن بولە-جارا ايتار ەدىك.

ەلىمىزدىڭ اتىن الەمگە تانىتقان اسا دارىن يەسىن ايتپاس بۇرىن جالپى ۆولەيبول سپورتىنىڭ تاريحىن پاراقتاي كەتكەن ورىندى دەپ ويلايمىن.

بۇل ويىندى اعىلشىندار قول دوبى دەپ ويلاپ شىعارعاندا وسىنشالىقتى الەمگە تارالىپ كەتەتىن سپورت ءتۇرى بولاتىنىن ويلاعان جوق شىعار.

بۇگىنگى تاڭدا ۆولەيبولدان وليمپيادا، ەۋروپا، ازيا  چەمپيوناتتارى، حالىقارالىق جارىستارمەن قاتار ءار ەلدە ىشكى چەمپيوناتتار ءداستۇرلى ءتۇردى وتكىزىلىپ كەلەدى. بۇل سپورت ءتۇرىن جاس تا كارى دە وينايتىن بولعاندىقتان الەمگە كەڭ تارالعان سپورت ءتۇرى ەكەنىنە داۋ تۋماس.

قازاقستاندا ۆولەيبول سوناۋ حح عاسىردىڭ 60-70 جىلدارى اسقان قارقىنمەن دامىپ، قول دوبى ويىنىنىڭ التىن كەزەڭنىڭ ءبىرى بولعانىن تاريحتان بىلەمىز.

سوناۋ 1929 جىلى قازاقستاندا تۇڭعىش رەت الماتى مەن فرۋنزە (قىرعىز كسر) قالالارىنىڭ  كوماندالارى اراسىندا ۆولەيبولدان كەزدەسۋ ءوتتى.

سول جىلى الماتى زووۆەتەرينارلىق ينستيتۋتى قۇرىلادى. وعان ءدال سول جىلى اتى ايگىلى ۆولەيبول تارلانى، قازاقستانداعى كاسىبي ۆولەيبولدىڭ نەگىزىن قالاۋشى وكتيابر جارلىعاپوۆ وقۋعا تۇسەدى.

وكتيابر جارلىعاپوۆتى ءسوز ەتكەندە  قازاقستان ۆولەيبولىنىڭ قالىپتاسۋ كەزەڭى  مەن  «بۋرەۆەستنيك» كومانداسىنىڭ تاريحي جەڭىستەرىن ەرىكسىز ەسكە الامىز. وكتيابر جارلىعاپوۆتىڭ تالانتتى ويىنشى عانا ەمەس، باپكەرلىك بىلىكتى قىرلارىن دا كورە بىلگەن رەسەيلىك ماماندار، وداقتىڭ جاستار قۇراماسىنىڭ باس باپكەرى بولىڭىز، دەپ شاقىرعاندا;

–راحمەت كوڭىلدەرىڭىزگە، مەن ءوز ەلىمدە، ءوز باۋىرلارىمنىڭ قاسىندا بولامىن. بار قابىلەتىم مەن كۇش-جىگەرىمدى قازاقتىڭ نامىسى ءۇشىن جۇمساۋىم كەرەك، – دەپ جاۋاپ بەرىپ، الماتىدا قالادى.

مىنە، ايگىلى سپورتشىنىڭ تۋعان ەلىنە، جەرىنە دەگەن سۇيىسپەنشىلىگىن تۇيىندەپ ايتقان ەكى اۋىز سوزىنەن كورەمىز. وكتيابر جارلىعاپوۆتىڭ تاربيەلەگەن ءتول شاكىرتى، قازاقتىڭ تاعى ءبىر  اردا تۋعان اسىل ۇلدارىنىڭ ءبىرى جانىبەك ساۋرانباەۆ 1965 جىلى كسرو قۇراماسىنىڭ ساپىندا الەم كۋبوگىنىڭ يەگەرى اتانسا، 1966 جىلى الەم چەمپيوناتىنىڭ قولا جۇلدەسىن جەڭىپ الادى. سونىمەن قاتار، تالانتتى جان 1967 جىلى ەۋروپا چەمپيونى بولىپ تانىلادى. جانىبەك ساۋرانباەۆ الەمنىڭ اقيىق ۆولەيبولشىلارىمەن يىق تىرەستىرىپ، كەڭەس وداعى قۇراماسىنىڭ ەڭ ۇزدىك ويىنشىلارىنىڭ قاتارىنان ورىن العان قازاق جىگىتى. دەگەنمەندە  سول كەزدەگى كەڭەس وكىمەتىنىڭ سولاقاي ساياساتىنىڭ سالدارى دارابوز سپورت ساڭلاعىن اينالىپ وتپەي كەتپەدى. جانىبەك ساۋرانباەۆ كەڭەس وداعى  قۇراماسىنىڭ ساپىندا سۋرىلىپ الدى تۇرسا دا، قازاق بولعانى ءۇشىن وليمپيادا ويىندارىنان شوۆينيست باسشىلاردىڭ ادىلەتسىز شەشىمدەرىمەن  شەتتەتىلىپ وتىرادى. ال، وكتيابردەي تۇلعالى ادامنىڭ تاعى ءبىر شاكىرتتەرى زاڭعار جاركەشەۆ پەن مارات مادەنوۆ «بۋرەۆەستنيك» كومانداسىن كسرو حالىقتارى سپارتاكيداسىنىڭ قولا جۇلدەسىنە جەتكىزىپ، 1968 جىلى وداق چەمپيوناتىنىڭ كۇمىس مەدالىنە يە بولادى. وسىلايشا، وكتيابر نەگىزىن قالاعان قازاق كومانداسى 1969 جىلى كسرو چەمپيوناتىندا توپجارىپ، تۇڭعىش رەت التىن تۇعىرعا كوتەرىلەدى. كوماندا قۇرامىنىڭ باسىم بولىگىن قازاقتاندىرىپ قانا قويماي، وسىنداي اۋىز تولتىرىپ ايتارلىقتاي تاريحي بيىككە جەتكىزە بىلگەن وكتيابر قادىرباي ۇلىنىڭ باستى ارمانى دا وسى ەدى. وكتيابر 1969 جىلى بار –جوعى 37 جاسىندا قايتىس بولادى. اتاقتى جاندى جەرلەۋگە كەلگەن حالىقتىڭ اراسىندا ءتول شاكىرتتەرى دە قايعىرىپ تۇرعان ەدى.  سوندا شاكىرتتەرىنىڭ اراسىندا جانىبەك ساۋرانباەۆ قازالى جيىندا تۇرىپ، «وكتيابر قىدىرباي ۇلىنىڭ ارمانى «بۋرەۆەستنيك» كومانداسىن كسرو چەمپونى اتاعىنا جەتكىزۋ بولاتىن. ءبىز ەندى ۇستازىمىزدىڭ سول ارمانىن ورىنداۋعا ءتيىسپىز»، – دەپ ۋادە بەرەدى. دەگەندەي-اق، سول 1969 جىلى «بۋرەۆەستنيك»  كومانداسى كسرو چەمپيونى اتانادى. سونىمەن قويماي، ەۋروپا چەمپيوندارىنىڭ كۋبوگىن ەكى مارتە جەڭىپ الادى. مىنە، وسىلاي دارىندى سپورتشىلاردىڭ ايگىلى باپكەرىنىڭ ارۋاعىن ريزا ەتىپ قانا قويماي،  قازاقستان ۆولەيبولىنىڭ دەڭگەيىن جەر-جۇزىنە اتويلاتىپ پاش ەتەدى.

ەلىمىزدىڭ ۆولەيبولداعى جارقىن جەتىستىگىن ءسوز ەتكەندە وكتياربدەي تۇلعالى جاننىڭ جاتتىقتىرۋشىلىق مەكتەبىنەن  شىققانداردىڭ ءبىرى ۆياچەسلاۆ شاپرانعا توقتالا كەتۋگە بولادى. كەزىندە اتى اڭىزعا اينالعان جۇلدىزدى «بۋرەۆەستنيك» كومانداسىنىڭ بەلدى ويىنشىسى اتانعان ۆياچەسلاۆ شاپران، كسرو بويىنشا حالىقارالىق سپورت شەبەرى، قازاقستانعا ەڭبەگى سىڭگەن سپورت قايراتكەرى، قر ەڭبەگى سىڭگەن جاتتىقتىرۋشى، كسرو  چەمپيونى، ەكى دۇركىن ەۋروپال كۋبوگىنىڭ يەگەرى اتانىپ، ءبىرتالاي تالانتتى تاربيەلەگەن بىلىكتى باپكەر.

وكتيابردىڭ تاعى ءبىر تالانتتى شاكىرتى نەللي ششەرباكوۆا ادك كومانداسىن كسرو چەمپيونى اتاعىنا جەتكىزسە، ماحمۇتوۆ پەن ششەرباكوۆانىڭ شاكىرتتەرى ادك ويىنشىلارى ەلەنا چەبۋكينا مەن ولگا كريۆوشەەۆالار 1988 جىلى كسرو قۇرامىندا سەۋل وليمپياداسىنىڭ چەمپيونى اتانعان.

بىرنەشە جىلدار بويى كسرو بويىنشا جوعارى دەڭگەيدە ونەر كورسەتكەن، قازاقستاندا ۆولەيبول سپورتىنىڭ نەگىزىن قالاعان وكتيابر جارىلعاپوۆ  پەن جانىبەك ساۋرانباەۆ سول ءبىر جىلدارى ەڭ ۇزدىك جاتتىقتىرۋشىلار بولىپ ەل سپورتىنىڭ تاريحىندا التىن ارىپتەرمەن  ەسىمدەرى جازىلىپ قالدى.

سونىمەن قاتار، قازاقستانداعى  ۆولەيبول تاريحىن پاراقتاي وتىرىپ، 1965 – 1966 جىلدارى وكتيابر جارىلعاپوۆتىڭ ءتول شاكىرتتەرى ۆالەري كراۆچەنكو مەن ولەگ انتروپوۆتار كسرو قۇرامىندا الەم چەمپيوناتىندا كۇمىس مەدالدىڭ يەگەرى اتانسا، 1967 جىلى ەۋروپا چەمپيونى اتاعىنا يە بولعانىن كورەمىز. سونىمەن بىرگە، جانىبەك ساۋرانباەۆ، نيكولاي روگوزين، گەننادي گونچاروۆ، الەكساندر پورتنوي سەكىلدى تالانتتى شاكىرتتەرىنىڭ دە جەتكەن جەتىستىكتەرى ءوز الدىنا ءبىر توبە. ايتالىق، 1970 – 1971 جىلدارى الماتىنىڭ «بۋرەۆەستنيگى» ەكى رەت قاتارىنان ەۋروپا چەمپيوناتىنىڭ  كۋبوگىن جەڭىپ الادى. ءبىز وكتيابر جارلىعاپوۆتىڭ جەمىستى جولى مەن جۇلدىزدى شاكىرتتەرىنىڭ ەسىمدەرىن ايتا وتىرىپ، سول جىلدارى قازاق ۆولەيبولىنىڭ كسرو ايماعىندا كوشباسشى بولعىنىنا كوز جەتكىزەمىز. اللا تاعالانىڭ بۇيرىعىمەن وكتيابر قادىرباي ۇلى بار جوعى 17 – 18 جىلدىڭ اينالاسىندا قازاق ۆولەيبولىن ادام ايتسا سەنگىسىز شىرقاۋ بيىككە شىعارعان. ۇشپا دوپتىڭ ۇشقىرى وكتيابردەي قازاقتىڭ باعىنا تۋعان جاننىڭ قازاق ۆولەيبولىنىڭ دامۋىنا قوسقان ۇلەسى شەكسىز بولدى. ول كىسى باپكەر بولىپ جۇرگەندە ءتىپتى ەل ارالاپ، سۇڭعاق بويلى تالانتتى جاستاردى كومانداسىنا تارتقان ەكەن. سونىمەن قاتار، جاتتىعۋ تاكتيكاسىنا كوپ جاڭالىق ەنگىزگەن جاننىڭ ءبىرى بولعان. شاكىرتتەرىنە دەگەن كوزقاراسى دا ەرەكشە بولىپتى. جاعدايى تومەن شاكىرتتەرىنىڭ وتباسىلىق جاعدايىنا بارىنشا قارايلاسىپ، قولىنان كەلگەنشە كومەك جاساپ تۇرعان ەكەن. «توپىراعىنا تۇسپەگەن ءدان ونبەيدى»، دەيدى بابامىز. ال، وكتيابر قادىرباي ۇلى بولسا، ۆولەيبول سپورتىندا قازاقتىڭ بولاشاعى ءۇشىن سەپكەن ءدانىن توپىراعىنا جەتكىزە بىلگەن دارا تۇلعا دەسەك بولعانداي.  دانا اباي: «وتكىردىڭ ءجۇزى كەستەنىڭ ءبىزى، ورنەگەن سەندەي سالا الماس»، دەگەن بولسا، وكتيابر اتامىزدىڭ ويىن الاڭىنداعى كورسەتكەن تالانتتى ونەرى مەن باپكەرلىك قابىلەتىن ۇلى اباي تەڭەگەن تەڭەۋلەرگە تۇگەلدەي ساي كەلەتىنىن ايتسا ارتىق بولماس. تۋما تالانتتىڭ بويىندا تۇنىپ تۇرعان دارىن، سىن ساعاتتارىندا ارناسىنان اسىپ اققان تاۋ سۋىنداي تاسىپ اعاتىنداي ەدى. دارابوز سپورتشىنىڭ كەزىندە ويىن الاڭىنا ارىستانداي اتىلىپ شىعىپ، جولبارىستاي ءابجىل قيمىلعا سالىپ، تۇلكى بۇلاڭمەن كورسەتكەن الامان ونەرىنە تاڭداي قاعىپ تامسانباعان جان بولماپتى. سول ءبىر ءدۇبىرلى كەزدەسۋلەردى كوزىمەن كورگەن كونەكوز قاريالار كۇنى بۇگىنگە دەيىن ساعىنىشپەن سول كەزدەردى  ەسكە الادى. ول كىسىنىڭ ىقپالىمەن ىرگەسىن قالاپ كەتكەن ۆولەيبول مەكتەبىنەن قانشاما شاكىرتتەردىڭ قاناتتارى قاتايىپ، ولاردان ءوز الدىنا تالانتتار توبىن تاربيەلەپ شىعارىپ وتىردى. ۇرپاقتار جالعاسى دەگەن وسى بولار.

قازاق جەرىندە 1955 – 1972 جىلدارداعىداي ۆولەيبول ويىنى سەكىلدى بىردە-ءبىر سپورت ءتۇرى بۇقارالىق سيپات الىپ، بيىك دەڭگەيگە كوتەرىلمەگەن ەكەن.

ءتىپتى، ەلگە تانىمال قوعام، ونەر، مادەنيەت، ادەبيەت سالالارىنىڭ مارقاسقالارى دا وسى سپورت تۇرىمەن اينالىسىپ، وسى كۇنگە دەيىن ۆولەيبولدى سالاۋاتتى ءومىر سالتىنا اينالدىرىپ كەلەدى.

ولاردىڭ اراسىندا ايگىلى اقىن، جازۋشى ولجاس سۇلەيمەنوۆ، نۇرتاي ابىقاەۆ پەن امانگەلدى شابدارباەۆ سەكىلدى ەل اعالارىنىڭ قاتارى قالىڭ. اتتارى اتالعان اعالارىمىزدىڭ  بوزبالا شاقتارىندا وكتيابر جارلىعاپوۆتىڭ ىقپالىمەن ۆولەيبول ويناعانىن بىرەۋ بىلسە، بىرەۋ بىلمەس. سول ەلىمىزگە بەلگىلى ءۇش ازامات ايگىلى ۆولەيبول مامانى  جارىلعاپوۆتىڭ ءتول شاكىرتتەرى  بولىپ سانالادى. الەمنىڭ ازاماتى دەڭگەيىنە كوتەرىلىپ، ارعىماق شابىستى جىرلارىمەن ميلليونداعان وقىرمانداردىڭ جۇرەگىن جاۋلاپ، قايراتكەرلىگىمەن ەرەكشەلەنگەن زامانىمىزدىڭ زاڭعار تۇلعاسى ولجاس ومار ۇلى سۇلەيمەنوۆ سپورتتان دا قۇر الاقان ەمەس. اسىرەسە، ۆولەيبول دەسە ىشكەن اسىن جەرگە قويادى. قازىردىڭ وزىندە ۋاقىت تاۋىپ سپورت زالعا باس سۇعىپ قانا قويماي، حالىقارالىق ارداگەرلەر اراسىندا وتەتىن تارتىستى جارىستاردا اجەپتەۋىر ويىن كورسەتىپ جۇرگەنىن كوزىمىز كوردى.

ۇلى وتان سوعىسىنا دەيىنگى، كەيىنگى جىلدارى ۆولەيبول اۋلالىق سپورت ءتۇرى بولىپ كەلگەنى راس. سودان كەيىن ءار جىل سايىن بۇل سپورت ءتۇرى قارقىن الىپ كەڭىنەن دامي باستادى. الماتى سول كەزدەرى ۆولەيبولعا قۇمار حالىقتىڭ ورتالىعى بولدى. ستاديوندارعا مىڭداعان ادامنىڭ قاراسى تولىپ، سپورت زالداردا ناعىز شەبەرلەردىڭ ويىندارىن تاماشالاۋعا كوز تىككەن حالىقتا ەسەپ بولماعان. تارتىسقا تولا ويىنداردى كورە وتىرىپ، ۆولەيبولعا دەگەن  حالىقتىڭ سۇيىسپەنشىلىگى ودان ارمەن ارتا ءتۇستى. بۇگىندە ەلىمىز ەگەمەندىك العالى بەرى ۆولەيبول سول باياعى قىرلى دا قىزىقتى ويىن ءتۇرى بولىپ دامىپ كەلەدى. دەنساۋلىق پەن سالاۋاتتى ءومىر سالتىنىڭ جارشىسىنىڭ ءبىرى رەتىندە ۆولەيبولعا دەگەن قىزعۋشىلىق ءوز قىزىعىن جوعالتقان ەمەس. ۆولەيبول – سپورتتىڭ تەكتى ءبىر ءتۇرى دەۋگە كەلەتىن سياقتى. بۇگىندە  ەلىمىزدە ەرلەر مەن ايەلدەر اراسىنداعى ەل چەمپيوناتتارىمەن بىرگە ارداگەرلەر ۆولەيبولى قۇرىلىپ، جاسى 60-70-ءتى القىمداعىن اعالارىمىز الا دوپتى اۋەدە ۇرشىقشا ءيىرىپ، دەنساۋلىقتارىن جاقسارتۋدا. دەگەنمەندە، ەلىمىزدە ۆولەيبولدىڭ اۋەسقوي تۇرىنەن بولەك  كاسىبي دەڭگەيدەگى قال-احۋالى ونشا كوڭىل قۋانتارلىق جاعدايدا بولماي تۇر. مىسالى، ۇلتتىق قۇراما كوماندانىڭ جاسارا تۇسكەنىنىڭ سەبەبىنەن بە الدە بىلىكتى ۆولەيبول ماماندارىنىڭ  جەتىسپەۋشىلىگىنەن بە ايتەۋىر ەلىمىزدىڭ باس كومانداسى سوڭعى كەزدەرى سۇرەڭسىز ويىندار كورسەتىپ ءجۇر. ەلىمىزدەگى ۆولەيبول كلۋبتارى  جايلى اڭگىمە ءوز الدىنا ءبىر ماسەلە.

وسىنداي ساتتەردى وكتيابر، ءالجان، جانىبەك، زاڭعار سىندى اسقار تاۋداي الىپ اعالارىمىزدىڭ داڭعىل جولدارىن ەرىكسىز ەسكە الۋعا تۋرا كەلەدى. ءبىزدىڭ ۆولەيبولدا قازىر كوش باستايتىن اتتارى اتالعان اعالارىمىز سەكىلدى نامىسى بيىك، شەبەر، سەركە ويىنشىلار جوقتىڭ قاسى. تۇلعالار ارقىلى تاربيە جۇمىسى دا جەمىسىن بەرمەي تۇرعان سەكىلدى. ەندەشە، ۇلتتىق قۇرامانىڭ تىزگىنىن ۇستاعان جانداردىڭ وسى ولقىلىقتاردىڭ ورنىن تولتىرۋ ءۇشىن  بەلسەنە ىسكە كوشپەسە وسى ءبىر تەكتى سپورت ءتۇرى تىعىرىققا تىرەلۋى ابدەن مۇمكىن.

نازىم حيكمەتتىڭ «ەگەردە سەن جانباساڭ لاپىلداپ، ول جانباسا لاپىلداپ» دەگەن قاناتتى سوزدەردى ەسكە الا وتىرىپ، ءبىر جاعادان باس، ءبىر جەڭنەن قول شىعارىپ، جۇمىلا جۇمىس ىستەۋ كەرەك. ويىن الاڭىندا  وت بولىپ لاپىلداعان پاتريوت، شەبەر ويىنشىلاردىڭ ويىنىن كورۋگە ىنتىق جانكۇيەر ازىرگە تارتىستى كەزدەسۋلەردىڭ تاماشاسىن كورە الماي كەلەدى. سوندىقتان بولار دودالى ويىنداردى تاماشالاۋعا باراتىن حالىقتىڭ قاراسى سيرەپ بارا جاتقان سياقتى. كوپشىلىكتى ۆولەيبول الاڭدارىنا تارتۋ ءۇشىن الدا تۇرعان  قاداۋ-قاداۋ ماسەلەلەردى قالاي شەشەۋدىڭ جولىن  قاراستىراتىن كەز جەتتى.

ول ءۇشىن مامانداردىڭ وكتيارب اعامىز سالىپ كەتكەن  سارا جولدان ساباق الىپ، بۇگىنگى كۇنى ەسكىنىڭ كوزى، جىبەكتىڭ ءبوزى بولىپ ارامىزدا جۇرگەن الدىڭعى تولقىن اعالارىمىزدىڭ تاجىربيەسىنە جۇگىنسە نۇر ۇستىنە نۇر بولماق ەدى.

 

اقىن ورداباي ۇلى،

الماتى