بەكزات بولمىس

قازاق جۋرناليستيكاسى اۋىر قازاعا ۇشىرادى. جاقىندا ارىپتەس اعامىز، بەلگىلى جۋرناليست ءدۇرالى دۇيسەباي ءفاني دۇنيەدەن باقيعا اتتانىپ كەتتى.

بۇل قازانى قولىنا قالام مەن ميكروفون ۇستاعان بارلىق جۋرناليستەر اۋىر قابىلدادى. ويتكەنى، ءدۇرالى اعا جانى جايساڭ، ادامگەرشىلىگى مول، كوركەم مىنەزدى، اقجارقىن، اقكوڭىل، كەڭپەيىلدى ادام ەدى. مەن دە باسقا ارىپتەستەرىم سياقتى اۋەلى قايعىعا ءبىراز ۋاقىت سەنبەي ءجۇردىم.

22 ناۋرىزدا ماعان جايسىز حاباردى اكەم مەن ءدۇرالى اعانىڭ ستۋدەنت كەزىنەن بەرگى دوسى بولعان بولاتبەك ورمانوۆ اعانىڭ ۇلى ەرنار ەستىرتتى. ول «اعامىزدان ايىرىلىپ قالدىق»، دەگەندە توبەمە جاي تۇسكەندەي بولدى. ونىڭ دا قازاعا قايعىرىپ جاتقانىن سەزدىم. ويتكەنى، ءبىزدىڭ اكەلەرىمىز جاس كەزدەرىنەن بەرى ومىردەن وتكەنگە دەيىن جاقسى ارالاسىپ، سىيلاسىپ ءجۇردى. ءبىز ەرنار ەكەۋمىز ءدۇرالى اعانىڭ اكەلەرىمىزدىڭ قازالارىندا قايعىرىپ قوشتاسقانىن كورگەنبىز. بولاتبەك اعا 2010 جىلى قايتسا، اكەم جۇمابەك ومار ۇلى 2017 جىلى ماڭگىلىك ساپارعا اتتانعان بولاتىن.

ەرنارمەن سويلەسىپ بولعان سوڭ، فەيسبۋك الەۋمەتتىك جەلىسىنە كىرىپ، كىمنىڭ نەنى جازىپ جاتقانىن قاراسام، قازا تۋرالى ەشكىم ەشتەڭە جازباپتى.

جالپى، ءوز باسىم جاقىن ادامنىڭ دۇنيەدەن كوشكەنىن ينتەرنەتتەن ءبىلۋ دەگەننىڭ نە ەكەنىن بۇرىننان بىلەمىن. مۇنداي حابار ءجۇرىپ كەتكەن ادامنىڭ تۋعان-تۋىستارىنا، جاقىندارىنا وتە اۋىر تيەدى. سوندىقتان فەيسبۋككە ەشتەڭە جازباي، اعامىزبەن سىيلاس بولعان ارىپتەستەرىمە حابارلاسىپ، قايعىنى ەستىرتتىم.

سول كۇنى ءدۇرالى اعانىڭ كوپ ۋاقىت اۋىرعانىن بىلدىك.

–اعالارىڭ كوپ اۋىردى عوي. بىراق قينالىپ جۇرگەنىن ەشكىمگە بىلدىرتپەدى، – دەدى سايورا جەڭگەمىز.

ءيا، ءدۇرالى اعا ءوزىنىڭ اۋىرىپ جۇرگەنىن ەشكىمگە ەشقاشان ايتپايتىن. ەكەۋمىز كەزدەسكەندە: «اياعىم ءالى اۋىرىپ ءجۇر. وپەراتسيا جاساتامىن. بۇل بۇرىن كازگۋ-ءدىڭ قالاشىعىندا فۋتبول ويناپ جاتقاندا العان جاراقاتىم عوي. سول جاراقات ارا-تۇرا توبە كورسەتسە ەمدەيمىن»، دەپ ايتاتىن. باسقا سىرقاتى تۋرالى ءتىس جارمايتىن. ەشتەڭە ايتپايتىن. ءبارىن ىشىندە ساقتايتىن، جانى جايساڭ اعام.

ءومىر دەگەن كۇرەس ەكەن. وسى جاراقاتپەن دە مىنە، ءدۇرالى اعا كۇرەسىپ ءوتتى. ءوتتى دەۋگە دە اۋىز بارمايدى. جاقسى ادامدى كىم قيادى؟ ەشكىم قيمايدى.

ءدۇرالى اعا ءاسيا جەڭگە ومىردەن وتكەندە نازەركە، بالاۋسا، ىڭكار دەگەن قىزدارىن تاربيەلەپ، ايالاپ ءوسىردى.  «جالعىزدىق جاراتقانعا عانا جاراسادى» دەگەندەي تاعدىر ءاسيا تاتە قايتقاندا 20 جىلدان كەيىن سايورا جەڭگەنى كەزدەستىردى. قازىر ەكەۋىنەن ديار دەگەن بالا بار. ول بالا دەگەندە پەرزەنتتەرىنە اكەلىك ماحابباتىن ءۇيىپ-توگىپ بەرەتىن، جۇمىس دەگەندە جانىن سالىپ، بىلەك سىبانا ەڭبەك ەتەتىن كىسى ەدى. سول سەبەپتى، بالالارىنا جاقسى اكە، ال شاكىرتتەرىنە ۇلاعاتتى ۇستاز، ارىپتەستەرىنە سىيلى جولداس، قۇرداستارىنا، كۋرستاستارىنا سەنىمدى دوس، ەلگە قوعامنىڭ پروبلەمالارىنا كوز جۇما قارامايتىن، ۇنەمى ءۇن قوسىپ وتىراتىن ازامات بولا ءبىلدى.

جاتقان جەرىڭىز جايلى، جانىڭىز ءجانناتتا بولسىن، جانى جايساڭ اعا!

داستان كەنجالين