ۆينوكۋروۆ: «بولاشاقتا «الماتى تۋرىنىڭ» كەزەڭدەرى كوبەيۋى مۇمكىن»

«الماتى تۋرى – 2017» ۆەلوجارىسىندا «Astana Pro Team» كومانداسىنىڭ ەكى كاپيتانى بولادى. ولار الەكسەي لۋتسەنكو مەن ياكوب فۋلسانگ. بۇل تۋرالى قازاقستاندىق كوماندانىڭ باس مەنەدجەرى الەكساندر ۆينوكۋروۆ ايتتى، دەپ حابارلادى vesti.kz. مۇنىمەن قاتار، وليمپيادا چەمپيونى ليدەرلەردىڭ دايىندىق كۇيىن جانە مارەسى مەدەۋدە ورنالاسقان كەزەڭنىڭ كىمگە ساي كەلەتىنىن ايتىپ بەردى.

– الەكساندر، بيىل «الماتى تۋرى» العاش رەت ەكى كۇن بويى وتەدى. بۇل جايلى تالاي ايتىلدى. وسى ەكى كەزەڭنىڭ باعىتىنا بەرەر باعاڭىز قانداي؟ ەكىنشى كەزەڭنىڭ مارەسى مەدەۋدە ورنالاسۋىن ەسەپكە الساق، بۇل جارىستا تاۋلىقتار عانا ەمەس، وزگە جولداردا جارىسۋعا ماشىقتانعان ۆەلوشاباندوزداردىڭ ءوزىن كورسەتۋىنە مۇمكىندىك بولا ما؟ 

– جارىس وسىمەن بەسىنشى رەت وتەدى. العاش رەت ەكى كۇن بويى وتەتىنى قۋانتادى. بۇرىننان وسىلاي بولسا دەپ ەدىك. ەندى «الماتى تۋرى» كوپكۇندىك جارىستاردىڭ قاتارىنا قوسىلدى. ەكى كۇننىڭ دە مارشرۋتى ءتۇرلى جولداردا جارىسۋعا ماماندانعان سپورتشىلاردىڭ بارلىعىنا دا مۇمكىندىك بەرەدى دەپ ەسەپتەيمىن. ءبىرىنشى كەزەڭدە جازىق جەردە جارىساتىن سپرينتەرلەرگە العا شىعۋعا مۇمكىندىگى بار، ال ەكىنشى كەزەڭنىڭ مەدەۋگە باراتىن جولى ءبىرىنشى كەزەكتە كورىكتى جەرلەرىمىزدى كورسەتەدى. تاۋلىقتار سۋىرىلىپ العا شىعا الادى. نەگىزىندە وتكەن جىلعى مارشرۋت تا وڭاي بولدى دەپ ايتا المايمىن.

 – «الماتى تۋرىندا» «استانا» كومانداسىنىڭ اتىنان ەكى بىردەي مىقتى تاۋلىق شىعادى. بولاشاعىنان ءۇمىت كۇتتىرەتىن الەكسەي لۋتسەنكو مەن ريو وليمپياداسىنىڭ كۇمىس جۇلدەگەرى ياكوب فۋلسانگ ەلوردالىق كوماندانىڭ نامىسىن قورعايدى. كاپيتان قالاي تاڭدالادى؟ لۋتسەنكو جارىستىڭ ءتورت دۇركىن چەمپيونى بولۋى مۇمكىن، سوندىقتان ءدال وسى سپورتشىعا ەرەكشە كوڭىل اۋدارىلا ما؟

– الەكسەي قازىرگى ۋاقىتتا جاقسى كۇيدە. مەنىڭشە، ياكوبقا وعان جەتۋ قيىنعا سوعادى. قانداي جاعداي بولسا دا، ولار ەكى كاپيتان رەتىندە قاتىسادى. ءوز باسىم الەكسەي جەڭەدى دەپ ويلايمىن. ول مەدەۋدى بىلەدى، ءاربىر بۇرىلىسىن جاتتاپ العان. جەڭىسكە جەتۋ وڭايىراق بولادى. وزگە كوماندادان سپورتشىلار دا ءبىرىنشى كەلىپ، جەڭىستى ج ۇلىپ اكەتۋى مۇمكىن. بولجاۋ قيىن. الەكسەيدىڭ باسىمدىعى – تاۋعا شىعۋ جولىن ءبىلۋى، قايدا دەمالىپ، قاي تۇستا العا ۇمتىلۋدى بىلەدى.

– لۋتسەنكونىڭ الەم چەمپيوناتىنداعى ناتيجەسىن قالاي باعالايسىز؟ «الماتى تۋرى» قارساڭىندا ول ءوز دەڭگەيىندە دەپ ويلايسىز با؟

– الەكسەيدىڭ دايىندىق كۇيى جاقسى. بۇل ونىڭ وسى ماۋسىمداعى سوڭعى ستارتى. جەڭىسكە جەتۋگە بەكىنىپ وتىر دەپ ويلايمىن. الەم چەمپيوناتىندا الەكسەي وزىنە بەرىلگەن تاپسىرمانى 100 پايىزعا ورىنداپ شىقتى، كومانداسى وعان كومەكتەستى. ول شابۋىلداپ، جەڭىس ءۇشىن سوڭىنا دەيىن كۇرەستى. جارىس كەزىندە الداعى پوزيتسيالارعا تالاسۋمەن بولدى. «ۆۋەلتا» كەزەڭىندەگى جەڭىسى وعان موتيۆاتسيا بەردى. وسىنداي سپورتشىنىڭ كۇن ساناپ دامىپ جاتقانى قۋانتادى. كەلەسى جىلى الەكسەي كوكتەمگى كلاسسيكالاردا سول پەتەر ساگانمەن (الەم چەمپيوناتىنىڭ جەڭىمپازى) جارىسا الادى. الەم بىرىنشىلىگىندەگى جارىسىنا جوعارى باعا بەرەمىن. ودان اتاقتى شاباندوزدار عانا وزدى. توعىزىنشى ورىن – ابىرويلى ناتيجە.

– ال فۋلسانگتىڭ قازىرگى دايىندىق كۇيى قانداي، تامىزدا قۇلاعاننان كەيىن قالپىنا قالاي كەلدى؟

– مەنىڭشە، فۋلسانگ ءالى ءوز فورماسىندا ەمەس، ونى كاناداداعى جارىستا كوردىك. جۇلدەلى ورىندارعا تالاسپايدى دەپ ايتا المايمىن. ياكوب ماۋسىمنىڭ سوڭىنا دايىندالىپ وتىر. سوسىن ول «لومبارديا تۋرىنا» قاتىسادى. الەكسەي ەكەۋى مىنبەرگە شىعۋعا تالاسادى دەگەن ويدامىن. ال ياكوبتىڭ قولىنان كەلمەسە، ول الەكسەيگە كومەكتەسەدى.

– «الماتى تۋرىنىڭ» كەزەڭدەرى بولاشاقتا كوبەيە ءتۇسۋى مۇمكىن بە؟

– نەگە كوبەيمەسكە؟ ءىرى جارىس ۇيىمداستىرۋعا تالپىنۋ قاجەت، ەكى كۇن ەمەس، ءتورت-بەس، «دۋباي تۋرى» جارىسىنداعىداي. مەنىڭشە، UCI كەستەسىنە كىرسە، مۇمكىندىك بار، بىراق بۇل وڭاي شارۋا ەمەس. دەسە دە بۇل – ءبىزدىڭ ارمانىمىز، وعان جەتۋ جولىندا ەڭبەك ەتۋ كەرەك. بۇعان قوسا تۋر اياسىندا بىركۇندىك ەكى جارىس ۇيىمداستىرۋ دا ويدا بار. وسى ۋاقىتقا UCI كەستەسىنە كىرسە، الەم چەمپيوناتى مەن «لومبارديا تۋرى» قارساڭىنداعى كەزەڭ، الەم ۆەلوسپورتىنىڭ بارلىق جۇلدىزىن كورەر ەدىك. الەم چەمپيوناتىنىڭ وتەتىن كۇندەرى وزگەرەدى، ماسەلەن، ۆەلوشاباندوزدار قازاقستاندىق جارىستارعا الەم بىرىنشىلىگىنە دايىندىق رەتىندە قاتىسا الادى. ءتىپتى «دجيرو د’يتاليا» دا استانادا نەمەسە الماتىدا باستالۋى مۇمكىن. كەلەسى جىلى بۇل جارىس يەرۋساليمدە وتەدى. الەم چەمپيوناتىندا «دجيرو» ۇيىماستىرۋشىلارىمەن كەزدەسكەنىم بار. «بۇل قازاقستاندا دا وتكىزۋگە بولادى دەگەن ءسوز» دەدىم. ولار بۇعان ەشقانداي دا كەدەرگى كورىپ تۇرماعانىن ايتتى. كۇلدىك. بۇل تالقىلانىپ جاتقان ماسەلە. «دجيرو د’يتاليا» مامىردا اماتىدا باستالسا، جامان ەمەس.

ايتا كەتەيىك، بيىل «الماتى تۋرى – 2017» تۇڭعىش رەت ەكى كۇن، ياعني 30 قىركۇيەك پەن 1 قازاندا وتەدى.