«SportPرەss» كلۋبى «دينامو» كۋبوگىندا كۇش سىناستى

قازاقستان تاۋەلسىزدىك العان جىلدارى ەكونوميكامىز داعدارىسقا ۇشىراپ، كوپتەگەن كاسىپورىندار مەن زاۋىتتار جابىلىپ، كولحوز سوۆحوزدار تاراپ تاريح بەتتەرىن كەتە باستاعان اۋىر ءبىر كەزەڭ بولعانى بارشامىزعا بەلگىلى. سول جىلدارى «قايرات»، «سپارتاك»، «بۋرەۆەستنيك» سەكىلدى بەلدى سپورت قوعامدارى وتپەلى كەزەڭنىڭ قيىندىعىنا شىداماي تاراپ كەتكەندە، ءوز شاڭىراعىن بەرىك ۇستاپ قالعان «دينامو» دەنەشىنىقتىرۋ جانە سپورت قوعامى ەدى. «دينامو» ساپىندا كەزىندە الەم، ەۋروپا، ءتىپتى وليمپيادا ويىندارىندا توپجارعان سپورت جۇلدىزدارىنىڭ سانى جەتىپ ارتىلادى. «دينامو» قوعامىنىڭ قاتارىندا ساپ تۇزەپ ەل ءۇشىن تەر توككەن سپورتشىلارمىزدىڭ لوندون وليمپياداسىنداعى تاريحي تابىسى ەسىمىزدە. بۇل كەشەگى كۇننىڭ تاريحى. ال، بۇگىنگى كۇندە سول «دينامو» دشسق يگىلىكتى شارالاردى ۇيىمداستىرىپ سپورت سۇيەر قاۋىمنىڭ كوڭىلىنەن شىعىپ كەلە جاتقان ۇيىم دەپ بىلەمىز.

كەشە الماتىداعى «دينامو» ستاديونىندا باق وكىلدەرى مەن قۇقىق قورعاۋ ورگاندارىنىڭ قىزمەتكەرلەرى اراسىندا شاعىن فۋتبولدان وتكەن ءدۇبىرلى جارىس ءسوزىمىزدىڭ دالەلى. جارىستىڭ باستالار الدىندا اقپارات قۇرالدارىمەن باسقوسۋ جيىنى بولىپ ءوتتى. بۇل وتىرىسقا «دينامو» رەسپۋبليكالىق دەنەشىنىقتىرۋ سپورت قوعامى توراعاسىنىڭ ءبىرىنشى ورىنباسارى، قازاقستان رەسپۋبليكاسىنا ەڭبەگى سىڭگەن جاتتىقتىرۋشى، ىشكى ىستەر مينيسترلىگىنە ەڭبەگى سىڭگەن قىزمەتكەر اسقار ومارقۇلوۆ كەلىپ قاتىسىپ، «دينامو» دشسق قوعامىنىڭ جىلدار بويى ءجۇرىپ وتكەن تاريحى مەن بۇگىنگى كۇنگى اتقارىپ كەلە جاتقان جۇمىستارىنان تولىقتاي ماعلۇمات بەرىپ ءوتتى. سودان كەيىن، جۋرناليستەر كوكەيكەستى سۇراقتارىن قويىپ، قاجەتتى جاۋاپتارىن الدى.

ءباسپاسوز ءماسليحاتى اياقتالعاننان كەيىن، جاسىل الاڭدا شاعىن فۋتبولدان وتەتىن جارىستىڭ سالتاناتتى تۇردە اشىلۋى بولىپ ءوتتى. الاڭ شەتىندە ەلىمىزدىڭ ءانۇرانىن «دينامو» ورتالىق مۋزىكالىق وركەستىردىڭ سۇيەمەلدەۋىمەن جوعارى دەڭگەيدە ورىنداۋى جارىسقا اسەر بەرگەندەي بولدى. بۇل دا ءبىر شاراعا ايتۋلى قوعامنىڭ تياناقتى دايىندالعانىنىڭ ءبىر بەلگىسى رەتىندە كورىندى. جارىستىڭ اشىلۋ سالتاناتىنا شاقىرىلعان قۇرمەتتى قوناقتاردىڭ اراسىندا قازاق فۋتبولىنىڭ اتى ايگىلى ارداگەر ويىنشىلارى سەيىلدا بايشاقوۆ، ميحايل گۋرمان سەكىلدى بەلگىلى ازاماتتار قاتىسىپ، «دينامو» باسشىلىعىنا وسىنداي سپورت كۇنىنە وراي وتكىزگەن جارىسقا زور العىستارىن ايتىپ، قاتىسۋشى كوماندالارعا جەڭىس تىلەدى. سوسىن وسى جارىستىڭ باس تورەشىسى، بەلگىلى قالامگەر ءالىم اناپيانوۆتىڭ ايتۋىمەن ەكى الاڭدا كەسكىلەسكەن ويىندار باستالىپ كەتتى.

فينالدا الماتى قالاسى قۇقىق قورعاۋ ورگاندارىنىڭ قۇراما كومانداسى مەن «SportPرەss» اقپاراتتىق-ساراپتامالىق سپورت سايتىنىڭ جۋرناليستەر كلۋبى كەزدەسكەن ەدى. پوليتسيا قىزمەتكەلەرىنەن قۇرالعان قالا قۇراماسى جۋرناليستەردەن ءسال باسىم ءتۇسىپ باس جۇلدەنى جەڭىپ الدى. دەگەنمەندە جۋرناليستەر قالام عانا ۇستاپ ەمەس، دوپتى دا تاماشا ويناي بىلەتىنىنىن شيەلەنىسكەن تارتىمدى تاماشا ويىندارىمەن كورسەتىپ، كورەرمەندەردىڭ ەرەكشە قوشەمەتىنە يە بولدى. وسىلايشا جارىس سوڭىندا جەڭىمپاز كوماندالارمەن قاتار، ۇزدىك قورعاۋشى، ۇزدىك شابۋىلشى، ۇزدىك قاقپاشى دەگەن نوميناتسيالار بويىنشا ويىنشىلار ۇيىمداستىرۋشىلاردىڭ ازىرلەگەن باعالى سىيلىقتارىمەن ماراپاتتالدى. جۋرناليستەردىڭ كومانداسىنان ۇزدىك شابۋىلشى اتاعى ماعان بۇيىرىپتى. وعان اللاعا تاۋبە دەدىم.

بۇل جارىستىڭ باس كۋبوگى اۋىسپالى بولادى. قاي كوماندا ءۇش رەت ءتۋرنيردىڭ جەڭىمپازى بولسا، كۋبوك سول كوماندادا تۇپكىلىكتى قالادى ەكەن. ول تۋرالى جارىستىڭ باس ۇيىمداستىرۋشىسى «دينامو» دشسق ءبىرىنشى ورىنباسارى اسقار ومارقۇلوۆ جارىستىڭ جابىلار ساتىندە جاريا ەتتى. ۇيىمداستىرۋشىلاردىڭ ايتۋىنشا، بۇل تۋرنير الداعى جىلى داستۇرگە اينالىپ، كوماندالار سانى كوبەيە تۇسپەك. الامان وتكەن جارىس سوڭىندا قاتىسۋشىلار ەستەلىككە سۋرەتكە ءتۇسىپ، تۋرنيردەن العان تاماشا اسەرلەرىمەن ءبولىسىپ تارقادى.

اقىن ورداباي ۇلى،

الماتى