ايدوس ەربوسىن ۇلىنىڭ جاعدايى الاڭداتىپ وتىر

كاسىپقوي بوكسشى ايدوس ەربوسىن ۇلى ءالى كومادان شىققان جوق. ول ءالى ەسىنە كەلمەي جاتىر. وسىعان بايلانىستى بىلعارى قولعاپ يەسىنىڭ اقش-تا جەكپە-جەگىن ۇيىمداستىرعان «Suleimen Promotions» كومپانياسى مالىمدەمە جاسادى.

كومپانيا كاسىپقوي بوكسشىنىڭ جاعدايى تۋرالى الەۋمەتتىك جەلىدە حابارلاپ، ايدوس ەربوسىن ۇلىنىڭ دەنساۋلىعى ءۇشىن قولدا بار جاعدايدىڭ ءبارىن جاسايتىنىن اتاپ ءوتتى.

«Suleimen Promotions» كومپانياسىنىڭ بارلىق ۇجىمى ايدوس ەربوسىن ۇلىنىڭ جاعدايىنا الاڭداۋلى. ونىڭ دەنساۋلىعىنا كۇندەلىكتى باقىلاۋ جاساۋدا. ءبىزدىڭ قايتپاس قايسار باتىرىمىز ءبىز ءۇشىن كاسىپقوي بوكستاعى «ەڭ ۇزدىك» بولىپ قالا بەرمەك.
قازىر ايدوس مينەاپوليس قالاسىنداعى ۇزدىك كلينيكالاردىڭ بىرىنە جاتقىزىلدى. دارىگەرلەردىڭ ايتۋىنشا، جاعدايى بىرقالىپتى. ءبىز ونىڭ دەنساۋلىعى جاقساراتىنىنا سەنىمدىمىز.
سپورتشىمىزدىڭ ەمدەلۋىنە جۇمسالاتىن بارلىق شىعىنداردى ۇيىمداستىرۋشى كومپانيا ءوز موينىنا الدى. سونداي-اق، ايدوسقا جاۋىنگەرلىك رۋحىن كوتەرىپ، ءوزىن جاقسى سەزىنۋى ءۇشىن قازاقستانداعى جاقىندارىن اقش-قا اپاراتىن بولامىز. ارينە، سپورتتىڭ قاي تۇرىندە دە، سونىڭ ىشىندە كاسىپقوي بوكستا جاراقات الۋ قاۋىپى كوپ. الايدا ءبىز كەز كەلگەن جاعدايدا ايدوس ەربوسىن ۇلىنىڭ دەنساۋلىعى قالپىنا كەلۋى ءۇشىن بارلىق كومەكتى كورسەتەتەتىن بولامىز، — دەلىنگەن حابارلامادا.

بۇعان دەيىن حابارلانعانداي، ايدوس ەربوسىن ۇلى كۋبالىق داۆيد موررەلمەن جەكپە-جەكتە اۋەلى نوكداۋنالىپ، ودان كەيىن نوكاۋتقا تۇسكەن بولاتىن. كەزدەسۋدە تورەشى توني ۋيكس وسى جاعدايدى ەسكەرىپ، ايقاستى مەرزىمىنەن بۇرىن توقتاتىپ، جەڭىستى موررەلگە بەردى.

داستان كەنجالين،

استانا