Aıdos Erbosynulynyń jaǵdaıy alańdatyp otyr

Kásipqoı boksshy Aıdos Erbosynuly áli komadan shyqqan joq. Ol áli esine kelmeı jatyr. Osyǵan baılanysty bylǵary qolǵap ıesiniń AQSh-ta jekpe-jegin uıymdastyrǵan «Suleimen Promotions» kompanııasy málimdeme jasady.

Kompanııa kásipqoı boksshynyń jaǵdaıy týraly áleýmettik jelide habarlap, Aıdos Erbosynulynyń densaýlyǵy úshin qolda bar jaǵdaıdyń bárin jasaıtynyn atap ótti.

«Suleimen Promotions» kompanııasynyń barlyq ujymy Aıdos Erbosynulynyń jaǵdaıyna alańdaýly. Onyń densaýlyǵyna kúndelikti baqylaý jasaýda. Bizdiń qaıtpas qaısar batyrymyz biz úshin kásipqoı bokstaǵy «eń úzdik» bolyp qala bermek.
Qazir Aıdos Mıneapolıs qalasyndaǵy úzdik klınıkalardyń birine jatqyzyldy. Dárigerlerdiń aıtýynsha, jaǵdaıy birqalypty. Biz onyń densaýlyǵy jaqsaratynyna senimdimiz.
Sportshymyzdyń emdelýine jumsalatyn barlyq shyǵyndardy uıymdastyrýshy kompanııa óz moınyna aldy. Sondaı-aq, Aıdosqa jaýyngerlik rýhyn kóterip, ózin jaqsy sezinýi úshin Qazaqstandaǵy jaqyndaryn AQSh-qa aparatyn bolamyz. Árıne, sporttyń qaı túrinde de, sonyń ishinde kásipqoı boksta jaraqat alý qaýipi kóp. Alaıda biz kez kelgen jaǵdaıda Aıdos Erbosynulynyń densaýlyǵy qalpyna kelýi úshin barlyq kómekti kórsetetetin bolamyz, — delingen habarlamada.

Buǵan deıin habarlanǵandaı, Aıdos Erbosynuly kýbalyq Davıd Morrelmen jekpe-jekte áýeli nokdaýnalyp, odan keıin nokaýtqa túsken bolatyn. Kezdesýde tóreshi Tonı Ýıks osy jaǵdaıdy eskerip, aıqasty merziminen buryn toqtatyp, jeńisti Morrelge berdi.

Dastan KENJALIN,

ASTANA