مەملەكەت باسشىسى بوكسشى ايدوس ەربوسىن ۇلىنا قولداۋ جەدەلحاتىن جولدادى

6 قاراشادا بوكسشى ايدوس ەربوسىن ۇلى كۋبالىق دەۆيد موررەلگە قارسى جەكپە-جەكتە نوكاۋتپەن جەڭىلدى. مەرزىمىنەن بۇرىن توقتاتىلعان كەزدەسۋدەن كەيىن بىلعارى قولعاپ شەبەرىن زەمبىلمەن الىپ كەتتى. كەيىن ونىڭ كوماعا تۇسكەنى ايتىلدى. ول سۋپەر ورتا سالماقتاعى WBA تۇجىرىمى بويىنشا الەم چەمپيونى اتاعى ءۇشىن جۇدىرىقتاسقان بولاتىن.

بۇگىن مەملەكەت باسشىسى قاسىم-جومارت توقاەۆ ايدوس ەربوسىن ۇلىنا قولداۋ ءبىلدىردى.

«كۋبالىق بوكسشىمەن جەكپە-جەگىڭىزدە بۇكىل قازاقستاندىق جانكۇيەر سىزگە تىلەكشى بولدى. باسەكە بولعان جەردە جەڭىس پەن بىرگە ساتسىزدىكتىڭ دە بولاتىنى زاڭدىلىق. ەڭ باستىسى – دەننىڭ ساۋلىعى. تەزىرەك ساۋىعىپ، ورتامىزعا ورالىپ، وتاندىق بوكستىڭ دامۋىنا ۇلەسىڭىزدى قوسا بەرەتىنىڭىزگە سەنىم بىلدىرەمىن»، – دەلىنگەن جەدەلحاتتا.

كەشە بۇكىلالەمدىك بوكس قاۋىمداستىعى (WBA) قازاقستاندىق بوكسشى ايدوس ەربوسىن ۇلىنا قاتىستى رەسمي مالىمدەمە جاساپ، سپورتشىنىڭ ومىرىنە تونگەن قاۋىپ جوعىن ايتتى.

«ايدوس ەكى اپتاداي دارىگەرلەردىڭ باقىلاۋىندا بولادى. قازىرگى كەزدە كومانداسى ونىڭ وتباسىنا جانە جەكە ومىرىنە قۇرمەتپەن قاراۋدى سۇرايدى. WBA جاعدايدى ارى قاراي باقىلايدى جانە ەربوسىن ۇلى تەز ساۋىعادى دەپ سەنەدى. بۇدان بولەك، بۇكىل بوكس الەمىنەن ول ءۇشىن دۇعا ەتۋدى سۇرايمىز»، — دەيدى قاۋىمداستىق وكىلدەرى.

داستان كەنجالين،

استانا