جانىبەك ءالىمحان ۇلى تاعى ءبىر الەم چەمپيونىمەن كەزدەسۋى مۇمكىن

كاسىپقوي بوكسشى جانىبەك ءالىمحان ۇلى WBO تيتۋلىن ءساتتى قورعاعاننان كەيىن تاعى ءبىر ورتا سالماقتاعى الەم چەمپيونى كارلوس ادامەستى جەكپە-جەككە شاقىرىپ، ونىڭ كەلىسىمىن الدى.

قازاق بوكسشىسى Twitter-دە بارلىق بىلعارى قولعاپ شەبەرلەرىن جەكپە-جەككە شاقىرعان ەدى. ونىڭ بۇل ۇسىنىسىن كوپ كۇتتىرمەي، دومينيكالىق سپورتشى كارلوس ادامەس قابىلدادى. ول جانىبەك ءالىمحان ۇلىنىڭ شاقىرۋىنا «مەن دايىنمىن!» دەپ جاۋاپ بەردى.

الايدا بۇل ايقاستىڭ قاشان بولاتىنى بەلگىسىز. وعان بىرنەشە فاكتور بوگەت بولىپ تۇر. بىرىنشىدەن، بوكسشىلار ءبىر-بىرىنە باسەكەلەس پروموۋتەرلەردىڭ قول استىندا جاتتىعادى. ەكىنشىدەن، ادامەس قازاق بوكسشىسىنان بۇرىن WBC چەمپيونى دجەرمالل چارلومەن جەكپە-جەككە شىعۋى مۇمكىن.

ال ازىرشە WBO چەمپيونى جانىبەك ءالىمحان ۇلى جەكپە-جەكتەردەن شەتتەتىلدى. اقش-تىڭ نەۆادا شتاتىنىڭ اتلەتيكالىق كوميسسياسى بوكسشىنىڭ 13 قاراشا كۇنى بريتانيالىق دەنزەل بەنتليمەن ايقاسىنان كەيىن وسىنداي شەشىم شىعاردى. قولدا بار مالىمەتكە قاراعاندا، مۇنداي شەتتەۋ – قالىپتى پروتسەدۋرا. بۇل بوسشىلاردىڭ جەكپە-جەكتەن كەيىن قالىپقا كەلۋى ءۇشىن جاسالادى. وسىلايشا، ءالىمحان ۇلى 13 جەلتوقسانعا دەيىن، ال بەنتلي 28 جەلتوقسانعا دەيىن رينگكە شىعا المايدى.

داستان كەنجالين،

استانا