Бозкілемде мешіт жамағаты мен қызметкерлері күш сынасты

Ұрпақтан-ұрпаққа ұмытылмай жеткен дәстүрлі өнеріміз қазақ күресінен кезекті турнир мәресіне жетті.

Бұл жолы ұлттық күресімізді дәріптеу мақсатында ұйымдастырылған турнирде мешіт қызметкерлері мен жамағаты қатысты. Ол биыл Алматы қаласы Дін істері жөніндегі басқармасы мен «Ұлттық мұра» бағдарламасының мұрындық болуымен төртінші рет өтті. Осыған дейінгі жарыстарда мешітке келуші жамағат қана өзара белдессе, бұл жолы мешіт қызметкерлері арасындағы балуандар да өзара сайысқа түсті.

Биылғы ерекшелігіміз – мешіт жамағатымен қатар мешіт өкілдері де жарысқа қатысты. Жарыс қарсаңында екі ай бойы мешіт қызметкерлері жарақат алып қалмас үшін арнайы дайындықтан өткіздік. Тағы бір айта кетер жай бұл жарысымызға кәсіби балуандардың қатысуына тыйым салынған. Қазақ күресі федерациясынан келген мамандар кешегі салмақ өлшеу рәсімінен бастап, тіпті бүгінгі жарыс барысында да қатысушылар арасында спорттық дәрежесі бар кәсіби спортшылардың қатыспауын қадағалап отыр, — деді «Ұлттық мұра» бағдарламасының менеджері Әлия Шайхан.

Жүлде қоры қомақты болғандықтан да кәсіпқой спортшылардың да қатысуға қызығушылығы болғаны рас. Алайда, қырағы қазылар кәсіби деңгейі жоғары балуандардың біразын турнир барысында жарыстан шеттетті.

Турнир қазақ күресі бекіткен ережеге сәйкес өткізіліп, қатысушылар 75 келіге дейін және +75 келіден жоғары салмақ бойынша бақ сынады. Мешіт жамағаты арасындағы жарысқа 45 балуан тіркеліп, бәрі де бозкілемде аянып қалмады. 75 келіге дейінгі салмақта іріктеу белдесулерінен іркілмей өткен Азамат Жарасов пен Аманкелді Асыл финалға шықты. Бас жүлде үшін өткен басты белдесуде бағы басым болған Азамат Жарасов жеңімпаз атанды. 75 келіден жоғары салмақтың жүлдесін Кенжехан Төлепов пен Саят Ысқақ өзара сарапқа салды. Қос мықты бір-біріне әдіс жасай алмай біразға дейін алысты. Тек үш бірдей ескерту Саят Ысқақ алып қалғандықтан Кенжехан Төлепов жеңімпаз деп танылды.

Екі ай бойы осы турнирге қатысу үшін арнайы дайындықтан өткен мешіт кызметкерлері арасындағы белдесулер де тартысты өтті. 75 келіге дейінгі салмақта «күш атасын танымас» деген қағиданы тағы бір рет дәлелдей білген Елдос Жортымов жеңімпаз атанды. Ол өзінен 15 келі ауыр әрі еңселі қарсыласы Бақтияр Нұрмахановты тізе бүктірді. Ал алыптар белдесуінде Руслан Қайыргелдіні жеңген Абзал Тұрарбеков бас жүлдені жеңіп алды.

Алдымен жарысты ұйымдастырушыларға алғысымды айтамын. Екі ай бойы біздің тыңғылықты дайындалуымызға жағдай жасады. Сондықтан да балуандардың бәрі де мықты болды. Менің салмағым 58 келі болса, финалдағы қарсыласымның салмағы менен 15 келідей артық болды. Әрі ол кезінде еркін күреспен айналысқан. Ал мен болсам мектепте жүргенде күреспен шұғылданған едім. Бұл жолы менің бағым жанды, — деді турнирдің жеңімпазы Елдос Жортымов.

Турнирді арнайы келіп тамашалаған Алматы қаласының бас имамы Төле би Оспан жарыс соңынан жеңімпаздарды марапаттады. Жеңіімпаз балуандарға 150 мың теңге мен арнайы белбеу табыс етілді. Екінші орын иегерлері 100 мың теңге алса, қола жүлдеге ие болғандар 50 мың теңгені қанағат тұтты.

Жарыстың мақсаты – ұлттық спортымызды дамыту, оның ішінде қазақ күресі арқылы салауатты өмір салтын насихаттау, мешіт қызметкерлері мен жамағатын спортпен айналысуға шақыру болатын. Осылайша ұлттық спортымыз тағы бір рет дәріптеліп, күрестің осы түрі дәстүрімізбен ғана емес, дінімізбен де астасып жатқандығының куәсі болдық.

Ақын ОРДАБАЙҰЛЫ,

Әзиз ТАСТАЕВ

АЛМАТЫ