بوزكىلەمدە مەشىت جاماعاتى مەن قىزمەتكەرلەرى كۇش سىناستى

ۇرپاقتان-ۇرپاققا ۇمىتىلماي جەتكەن ءداستۇرلى ونەرىمىز قازاق كۇرەسىنەن كەزەكتى تۋرنير مارەسىنە جەتتى.

بۇل جولى ۇلتتىق كۇرەسىمىزدى دارىپتەۋ ماقساتىندا ۇيىمداستىرىلعان تۋرنيردە مەشىت قىزمەتكەرلەرى مەن جاماعاتى قاتىستى. ول بيىل الماتى قالاسى ءدىن ىستەرى جونىندەگى باسقارماسى مەن «ۇلتتىق مۇرا» باعدارلاماسىنىڭ مۇرىندىق بولۋىمەن ءتورتىنشى رەت ءوتتى. وسىعان دەيىنگى جارىستاردا مەشىتكە كەلۋشى جاماعات قانا ءوزارا بەلدەسسە، بۇل جولى مەشىت قىزمەتكەرلەرى اراسىنداعى بالۋاندار دا ءوزارا سايىسقا ءتۇستى.

بيىلعى ەرەكشەلىگىمىز – مەشىت جاماعاتىمەن قاتار مەشىت وكىلدەرى دە جارىسقا قاتىستى. جارىس قارساڭىندا ەكى اي بويى مەشىت قىزمەتكەرلەرى جاراقات الىپ قالماس ءۇشىن ارنايى دايىندىقتان وتكىزدىك. تاعى ءبىر ايتا كەتەر جاي بۇل جارىسىمىزعا كاسىبي بالۋانداردىڭ قاتىسۋىنا تىيىم سالىنعان. قازاق كۇرەسى فەدەراتسياسىنان كەلگەن ماماندار كەشەگى سالماق ولشەۋ راسىمىنەن باستاپ، ءتىپتى بۇگىنگى جارىس بارىسىندا دا قاتىسۋشىلار اراسىندا سپورتتىق دارەجەسى بار كاسىبي سپورتشىلاردىڭ قاتىسپاۋىن قاداعالاپ وتىر، — دەدى «ۇلتتىق مۇرا» باعدارلاماسىنىڭ مەنەدجەرى ءاليا شايحان.

جۇلدە قورى قوماقتى بولعاندىقتان دا كاسىپقوي سپورتشىلاردىڭ دا قاتىسۋعا قىزىعۋشىلىعى بولعانى راس. الايدا، قىراعى قازىلار كاسىبي دەڭگەيى جوعارى بالۋانداردىڭ ءبىرازىن تۋرنير بارىسىندا جارىستان شەتتەتتى.

تۋرنير قازاق كۇرەسى بەكىتكەن ەرەجەگە سايكەس وتكىزىلىپ، قاتىسۋشىلار 75 كەلىگە دەيىن جانە +75 كەلىدەن جوعارى سالماق بويىنشا باق سىنادى. مەشىت جاماعاتى اراسىنداعى جارىسقا 45 بالۋان تىركەلىپ، ءبارى دە بوزكىلەمدە ايانىپ قالمادى. 75 كەلىگە دەيىنگى سالماقتا ىرىكتەۋ بەلدەسۋلەرىنەن ىركىلمەي وتكەن ازامات جاراسوۆ پەن امانكەلدى اسىل فينالعا شىقتى. باس جۇلدە ءۇشىن وتكەن باستى بەلدەسۋدە باعى باسىم بولعان ازامات جاراسوۆ جەڭىمپاز اتاندى. 75 كەلىدەن جوعارى سالماقتىڭ جۇلدەسىن كەنجەحان تولەپوۆ پەن سايات ىسقاق ءوزارا ساراپقا سالدى. قوس مىقتى ءبىر-بىرىنە ءادىس جاساي الماي بىرازعا دەيىن الىستى. تەك ءۇش بىردەي ەسكەرتۋ سايات ىسقاق الىپ قالعاندىقتان كەنجەحان تولەپوۆ جەڭىمپاز دەپ تانىلدى.

ەكى اي بويى وسى تۋرنيرگە قاتىسۋ ءۇشىن ارنايى دايىندىقتان وتكەن مەشىت كىزمەتكەرلەرى اراسىنداعى بەلدەسۋلەر دە تارتىستى ءوتتى. 75 كەلىگە دەيىنگى سالماقتا «كۇش اتاسىن تانىماس» دەگەن قاعيدانى تاعى ءبىر رەت دالەلدەي بىلگەن ەلدوس جورتىموۆ جەڭىمپاز اتاندى. ول وزىنەن 15 كەلى اۋىر ءارى ەڭسەلى قارسىلاسى باقتيار نۇرماحانوۆتى تىزە بۇكتىردى. ال الىپتار بەلدەسۋىندە رۋسلان قايىرگەلدىنى جەڭگەن ابزال تۇراربەكوۆ باس جۇلدەنى جەڭىپ الدى.

الدىمەن جارىستى ۇيىمداستىرۋشىلارعا العىسىمدى ايتامىن. ەكى اي بويى ءبىزدىڭ تىڭعىلىقتى دايىندالۋىمىزعا جاعداي جاسادى. سوندىقتان دا بالۋانداردىڭ ءبارى دە مىقتى بولدى. مەنىڭ سالماعىم 58 كەلى بولسا، فينالداعى قارسىلاسىمنىڭ سالماعى مەنەن 15 كەلىدەي ارتىق بولدى. ءارى ول كەزىندە ەركىن كۇرەسپەن اينالىسقان. ال مەن بولسام مەكتەپتە جۇرگەندە كۇرەسپەن شۇعىلدانعان ەدىم. بۇل جولى مەنىڭ باعىم جاندى، — دەدى ءتۋرنيردىڭ جەڭىمپازى ەلدوس جورتىموۆ.

ءتۋرنيردى ارنايى كەلىپ تاماشالاعان الماتى قالاسىنىڭ باس يمامى تولە بي وسپان جارىس سوڭىنان جەڭىمپازداردى ماراپاتتادى. جەڭىىمپاز بالۋاندارعا 150 مىڭ تەڭگە مەن ارنايى بەلبەۋ تابىس ەتىلدى. ەكىنشى ورىن يەگەرلەرى 100 مىڭ تەڭگە السا، قولا جۇلدەگە يە بولعاندار 50 مىڭ تەڭگەنى قاناعات تۇتتى.

جارىستىڭ ماقساتى – ۇلتتىق سپورتىمىزدى دامىتۋ، ونىڭ ىشىندە قازاق كۇرەسى ارقىلى سالاۋاتتى ءومىر سالتىن ناسيحاتتاۋ، مەشىت قىزمەتكەرلەرى مەن جاماعاتىن سپورتپەن اينالىسۋعا شاقىرۋ بولاتىن. وسىلايشا ۇلتتىق سپورتىمىز تاعى ءبىر رەت دارىپتەلىپ، كۇرەستىڭ وسى ءتۇرى داستۇرىمىزبەن عانا ەمەس، دىنىمىزبەن دە استاسىپ جاتقاندىعىنىڭ كۋاسى بولدىق.

اقىن ورداباي ۇلى،

ءازيز تاستاەۆ

الماتى