ەركىن كۇرەس: لاۋرا الماعانبەتوۆا ازيا چەمپيونى اتاندى

لاۋرا الماعانبەتوۆا ەركىن كۇرەستەن 23 جاسقا دەيىنگى بالۋاندار اراسىنداعى ازيا چەمپيونى اتاندى.

قازاقستان كۇرەس فەدەراتسياسىنىڭ حابارلاۋىنشا، United World Wrestling ۇيىمى لاۋرا الماعانبەتوۆاعا ارنايى حات جولداعان.

وندا بىشكەكتە وتكەن ازيا چەمپيوناتىنىڭ فينالىندا لاۋرامەن بەلدەسىپ، التىن مەدال جەڭىپ العان ءۇندى بالۋانىنىڭ دوپينگكە قارسى تالاپتاردى بۇزعانى جازىلعان.

وسىلايشا چەمپيوناتتىڭ 57 كەلىگە دەيىنگى سالماقتاعى التىن مەدالى لاۋلا الماعانبەتوۆاعا بەرىلەدى.

لاۋرا جاقسىلىققىزى قوستاناي وبلىسىندا تۋعان. 2004 جىلدان بەرى سارىكول اۋداندىق بالالار جانە جاسوسپىرىمدەر سپورت مەكتەبىندە جاتتىعادى.

ول — قازاقستان رەسپۋبليكاسىنىڭ سپورت شەبەرى، قازاقستان رەسپۋبليكاسىنىڭ التى دۇركىن چەمپيونى، ازيا چەمپيوناتىنىڭ ەكى دۇركىن كۇمىس جۇلدەگەرى، الەم چەمپيوناتىنىڭ قولا جۇلدەگەرى.

قازاقستاننىڭ 100 جاڭا ەسىمى جوباسىنا ىرىكتەپ الىنعان.

داستان كەنجالين،

استانا